2005/9/29 (木曜日)
繼續上堂和 research， 今日上了堂 networking， 教官是寺岡， 這個名字在一年多前已經出現在我的 inbox 了， 點解呢？ 因為那時申請 scholarship 時找人認投時已經找過他一次了， 那時他以沒有時間指導留學生為由拒絕了我的要求， 兜兜轉轉現在又做了他的學生... 講番上堂， 形式都幾特別， 梅花間竹， 首先由佢教現時的 Internet technology， 接着第二堂就由學生 present next generation 的相類似 technology... 咁先決條件就是找人認投。 第一次問， 四個人舉手， 包括我， 另外三個人， 哈， 都是笹瀬研究室的留學生， 哈， 有趣。 證明笹瀬研真的很 proactive? 哈哈， 五個 topics 最後再由另一個日本人學生認投， 不過堂中有點點衝突， 唉， 又係巴斯光年， 算了， 唔講太多， 反正唔關我事。 不過細聲講句， 非常沒有風度的一件事。
之後下午的 network security， 由於這科日本語 only， 包括巴斯光年以內的留學生也自然沒影沒踪， 剩下的自然大部份就是日本人了， 這個教授除了細聲少少之外各方面也教得很不錯。 坐前些應該沒有問題吧？
剩下的時間也要好好做番自己的 research， 不過也應該找多些機會和 lab 裏面的人傾多些計呢？
晚上偶然看見 IBM X40 以十萬円低價發售， 很引誘... 過兩日去睇下先...
2005/9/28 (水曜日)
一朝早坐火車時無端端有個芬蘭人火車， 點錯路， 那班車雖然方向沒有錯不過中途掉頭， 好在中途突然醒起叫佢轉車， 如果唔係真係非常唔好意思。
今日沒有專科， 只是幾堂日本語， 因為這裏 level 的 scale 和之前唔同， 所以走去了上 level 4 level 5， 似乎 level 5 都唔係好深， 唔緊要， 少人， 吹下水都好。 講番 level 4， 見到好耐冇見的菅野先生， 不過呢班只係中級程度， 所以也沒有緣上這科了。 又另外算係識得一個朋友， 以前一直也在三田キャンパス見過， 但一直也不知道名字的人...
之後剩下的時間， 專心（？）溫書...
2005/9/27 (火曜日)
第二日上堂， 哈， 話時話今個學期冇乜邊科晨咁早九點上， 所以可以遲些少起身。 點都好， 現在有個固定的據點， 上堂也方便了不少。
今日上左兩堂， 一堂關於 Communication system， 另一堂關於知識産權， 頭那堂都還好， 有點擔心日本語能力不及， 問一問個 professor， “明就得喇”， 嘻， 這樣說也沒有甚麼好擔心了。 另一堂知識産權， 嘩， 悶到飛起， 睇黎之後都唔會上了， 加上又唔知佢想點計分...
另外就是聽 CoE (Center of Excellence)的 PhD 學生 poster present， 果然兩個世界， 之後特地走了去其中一個 thesis 前問三問四， 一來想知多些個 RINGO (Ring Optical?)， 二來苦練一下日本語... 哈
研究方面， 唔， 可能先專注一下 WiMax， 之後再番 Protocol 會好些？
2005/9/26 (月曜日)
上堂了！
過左幾個月， 終～～～於番學了。 昨晚被 Peter 的切金條所折磨， 直到今日晚上才解決， 撞鬼。 講番今日， 首先去買昨日未買的定期劵， 撞鬼未開門， 唯有去附近悠悠閒閒的飲番杯咖啡， 唔！ 正！ 之後買完出奇地平的定期劵之後起程番學， 都叫做早番到學校吧， 呀， 冇人在 lab， 唯有去一去圖書館， 再去 computer lab， 坐下坐下見到斯理蘭卡的同學， 唔， 都差不多時間再上一上 lab， 好， 上到去見笹瀬教授， 唔， 想起當初四月最初到這裏的時候初次見教授的情景呢。 講下講下， 噢， 到了上堂時間呢， 唯有急急腳去上當， 噢！ 闊別了很久的 lecture （唔計之前日本語課）
第一堂 Digitial Wireless Communication， 是 IGP (International Graduate Program) course， 即係用英文教， 只見佢英日夾雜， 哈哈， 正好， 對我來說這樣夾法也很不錯。 三個 reports， 唔， 似乎不太難， 應該只是交 Matlab， 似乎和以前的 ELEC343 差不多吧？
之後上 lab， 終於有自己的電腦了， 雖然裝了 Win XP， 不過也好， 連部 notebook 都唔駛用。 其實有個 Putty 和 network 已經夠我用了。 哈。 聽了不少垃垃雜雜的東西， 呀， 又夠鐘上堂。
ネットワーク最適化(network optimization)， 基本上是 algorithm 吧？ 主要也是 graph problem... 唔。 莫非是 COMP271? 不會吧？ 睇定些先。 之後去 meeting， 呀， 也是 B4 的進度報告。 其實不聽也 OK... 不過完了後笹瀬先生就預先送了份生日禮物給我了， 那就是下個月中的發表就會輪到我了... 噢， 可以說甚麼呢？
之後再處理一些雜務也總算可以食飯... 呀， 忙了整日。 之後也直接走人了， 在渋谷行左陣， 沒有甚麼特別， 回去看コナン， 正確來說是工藤新一的第一個 case （一單在飛機上的兇殺案）， 應該很久以前畫的吧？ 畫功完全唔同...
總算完了一日。 之後的日子應該也會超“充實”吧？
2005/9/25 (日曜日)
千挑萬選的揀左幾科， 不過這個學期應該讀三四科就夠， 花多眼亂的情況下， 沒有辦法， 今週的 introductory 全部去！ 唔理咁多揀番幾科好科先算。
Peter 出的 IQ 題， 很有質素呢， 很久沒有見過這麼高的問題了， 亦即是說很久沒有用腦呢， 哈哈， 不過另一條問題完全摸不着頭腦。 點算呢？ 訓唔着， 聽日要番學添架。
夜晚突然發現唔記得買定期券， 大件事， 即刻飛出去千歳烏山， 唔， 唔， 乜？ 明日請早？ 唉， 撞鬼， 為乜走出黎呢？ 算了， 當做運動。
明日真真正正的上課了！ 好！ 俾心機， 頑張るぞ！
2005/9/24 (土曜日)
望望那些選科的東東， 頭都大埋， 雖然只是要揀七科， 不過都唔係想像中容易。 唔。 沒有心機的情況下俾周公捉走左添。
繼續努力的炒菜， 嘗試在清淡的白菜上加點東西， 洋葱？ 蒜頭？ 唔。 果然蒜頭是最香口的呢。 不過諗黎諗去， 都唔知炒菜以外有些甚麼又易又快的菜式。 唔。 煩腦中。
2005/9/23 (金曜日)
發呆的一日， 之前兩日都積落唔少疲倦， 今日也應該好好休息一下。 呀， 話時話還未好好的選科呢。
昨日買的レイヴ已經是大結局了， 真是的， 最後大佬竟然草草地完左， 之前未免出得太多二打六吧？ 雖然不能說是爛尾不過那個句號畫得有點差呢。
2005/9/22 (木曜日)
新入生ガイダンス
戦利品目:
レイヴ 35
昨日旅程的延續， 雖然位是比起來的時候舒服些， 不過始終也是受到巴斯光年的追蹤彈所折磨， 成日周身郁， 人又大份， 鼻鼾又大， 無端端俾佢批左㬹， 撞鬼。 每逢中途站也忍不住落車抖抖氣， 抖半個鐘也好過冇， 但上到車就見佢連我那半邊位都霸埋咁濟， 唯有推開佢... 救命。
挨下挨下總算回到東京， 回到房吃過早餐再執下個人， 總要番學校了。 首先是身體檢查， 大致也順利， 不順利的， 哈哈， 檢尿時“冇料到”， 唯有 skip 左佢先， 另外醫生問到有冇心口痛， 唔， 最近訓得唔好， 起身時好像真的有點心口痛， 結果去了做個心電圖， 都正常， 希望這個睡眠問題盡快好轉啦。
之後本來想去聽 guidance, 不過因為那個 guidance 係 for 日本人學生， 我的學生證也未準備好， 諗住去 lab 啦， 又冇人， 唯有去 Cafe 坐下， 結果又係巴斯光年， 還有另外三個人（包括兩個新學生）， 也好， 傾下計， 最憤怒係巴斯光年那句“I sleep very well yesterday on the bus, and when I wake up I was already in Tokyo”， 你就真係訓得舒服， 完全唔駛理其它人的感受。 突然明白， 其實佢這種態度先係我最唔滿意的。 亦同時間以前相識的一個人的影子浮了出來... 身型巨大， 不顧人感受... 撞鬼， 以外的共通點。
之後的 guidance... 個 Professor 的英文好像唔太靈呢， 節奏很慢， 但也算明明白白， 之後也順手開了 Unix account， 總算似番個學生了， 也應該可以從家裏 access 學校的 network 吧？
回到會館， 做了些鎖事之後， 預備準飯， 但浸完飯之後被困了在張床上面， 醒來已經差不多一點了... 晚餐唯有變成宵夜了。 吃完之後， 終於見到香港朋友了... 噢， 太掛住佢喇， 點解在万博見唔到佢... 噢...
2005/9/21 (水曜日)
愛・地球博
經過了長時間的車程， 終於終於到達了名古屋。 睡眠質素極低。 頂腳不在話下， 隔鄰的巴斯光年大大份佔了1.5個位， 自然地剩下半個位可以坐... 落車， 可以說是一種解脱...
去會場還要一程火車， 也未算太多人， 但已見到會場外面的蛇長之列。 睡眠質素低的情況下有點心情不爽， 巴斯光年可說是主因... 跟住在會場外面其實有點混亂， 巴斯光年左插右插的走去前面， 見到也覺得羞家， 其它人又好像唔好意思話佢， 唉， 我還是企在後面好了。 見到佢叫我行前我都唔想理佢， 始終外觀和日本人唔太大分別的我打尖的話十成會做靶...
等等等， 開場了， 見到一班人衝去唔同的地方， 唔， 我就本身約了香港的朋友， 因為佢之前早了來所以也就嘗試等埋佢先行動， 巴斯光年完全唔明， 叫佢自己去玩先佢又唔去， 一齊等又一面不爽， 最後收到朋友的 mail 話可能遲少少， 唉， 沒有辦法， 也得控制一下自己的心情了。 希望遲少少可以和香港朋友會合啦， 整天和巴斯光年一起的話人都顛。 呀， 冷靜冷靜。
看了不少展品和表演， 很多也很有趣的。 其中一個占卜的機器， 結果倒幾有趣的， 內容大約如下：
你屬於“知の精霊”， 性格基本上是冷靜沈着， 頭腦轉數也很高。 成績通常也位列前茅， 相信亦得到老師的信賴吧。 好奇心旺盛， 到知識的吸收很有興趣。 一旦對某事物有興趣... （唉， 唔記得 scroll down， 之後寫乜呢）。 至於占卜結果， 最近和朋友的關係好像略有暗湧， 最近是不是常常炫耀自己呢？ 太過炫耀自己有時也顯得像個小孩呢， 反省一下吧。 今個星期好像很想去戀愛呢， 積極些去參加各種公開場合吧。 很可能在意想不到的地方有懈逅呢。 對有興趣的人， 不妨 send 下 mail 給他， 互相了解一下吧。 對自己正直， 相信對方也會理解你的想法吧。
很有趣的占卜， 當然也不是相信這個結果， 但對一些要注意的地方也得提高警覺呢。 好好， 繼續周圍走， 看一些 show， 主要也是對那些各國的資料館（Global common）有興趣， 有點在短時間內還遊世界的感覺， 很多地方很有特色東西， 只是望望這些東西也覺得入場費是值得的。當然這個愛・地球博的主題－－自然の叡智， 也得到相當的體現， 自然， 科學， 人類能如何的共存發展延續， 正是世界必須正視的問題， 過去人口澎脹， 科學發展不斷破壞自然， 人類為求更富裕的生活導致生態系統的失衡， 現在很多包括日本在內的先進國家的科技發展不得不講求環境效益等問題（而這些技術也在博覽會中見得到）... 也反思一下， 現今的世界工廠中國， 不是在走回頭路嗎？ 五年後的上海國際博覽能否承接這個不得不關注的主題呢？
繼續的行， 行行下巴斯光年話要休息， 我又唔想停住， 也是時候自己行開一下， 加上之前收到香港朋友的 mail 話去大地之塔等， 所以自己出發去日本 zone， 也是一個很靚的地方， 加上丢下了巴斯光年， 突然感受到自由的空氣。 雖然最後也不能會合香港朋友（佢好像電話冇電）， 不過也自己慢慢地遊這個 area， 尤其是日本庭園， 那個環境真的異常舒服， 也可以好好在這裏休息一下。
之後也重新回合巴斯光年（始終很難避）， 算了， 再去看看 Global common 等東西， 佢有佢行我有我行， 很不錯， 之後看了超電導磁浮列車後也天黑了， 佢又話腳痛... 不過老實說我也沒有太好的心情再和他周圍走， 亦沒有那樣的體力... 休息一下等九點來的巴士... 早了幾十分鐘去到等巴士的地方， 佢見唔到巴士竟然黎問我係唔係行錯路， 唉， 冇咁好氣慢慢解析， 佢走去問周圍的人又唔識日本語結果又係搵我黎煩， 今日本來大好的節目， 會合唔到香港朋友的結果就是和巴斯光年行足一日（順帶一提巴斯光年是香港朋友邀請的）， 無奈之極， 不過始終和這個人在同一個研究室， 也不能把關係弄得太差， 不過心情始終很難控制... 走之前見到另一個香港朋友， 沒想到他今日會在這裏， 我以為佢早幾日已經和女朋友來了， 唉~~~~~! 點解臨走先見到佢。 冇計， 上巴士， 又係頭等...， 不過唔知點解巴斯光年搶先上車（佢又唔知自己坐邊個位）， 也好， 佢坐了內側的位置， 我也有多少少空間....
極好與極差相遇的一日。 不過點都好， 這個万博也是值得來的。縱然美中不足， 也是一個好好的機會讓自己訓練一下控制自己的心情... 相信入場的二千幾萬人裏面， 只有我一個覺得這個万博是一個心靈的磨練？
2005/9/20 (火曜日)
大学院入学式
戦利品目:
スクールランブル 10
ギャラクシーエンジェル 2006 カレンダー
終於 back to school， 雖然還未上堂， 不過也回到校園感受一下學校的生活氣息。 不錯不錯。 早上先要會合那個新來的同學， 呀， 佢竟然遲到... 沒有辦法， 東京的鐵路未免複雜過頭。
去到講堂， 異常異相， 差不多全部人也 formal dressing， 只有包括我的幾個人 casual dress， 撞鬼， 雖然沒有人說甚麼， 不過零捨怪相... 點都好， 聽完了安西祐一郎塾長和稲崎學科長意外地不太長的演說也正式完了這個入學式。 意外地快。 安西塾長， 唔知點解有點朱經武的感覺， 不是一種很威嚴的人但望上去已經覺得很令人尊敬的感覺...
之後帶了新同學周圍走一陣， 食點東西， 幫佢開埋個戶口也就完了今日的行程， 好， 係時候去新宿走走， 買了最新一期的スクールランブル， good! 依然地超好笑， 不過最近天満的出場率好像低了少少？ 以一個主角來說真的過低呢， 雖然這也可說是這套作品的特色...
夜晚和巴斯光年（巴基斯担同學的代號）出發去愛知万博， 希望順順利利... (不過車程已經不太順利， 坐前排頂腳， 隔離那個巴斯光年周身郁加上鼻鼾.... )
2005/9/19 (月曜日)
昨晚真係一個謎， 坐火車的時候眼訓到死， 但回到房時繼續失眠。 真係整鬼。 結果呢， 朝早八點起一起身， 又訓過， 訓到兩點幾三點， 醒都醒唔哂... 沒有辦法...
終於食完一包米了， 呀， 開始玩煮飯仔一個月左右吧？ 咁計法每餐飯都用左至少五十円（三四元）， 如果以現在唯一一款自家製小菜來說， 雞肉一百， 菜五十， 即係每餐大二百円左右（港幣十五元前後）， 都 OK， 唔算太貴吧？
明日， 總算開學禮， 希望可以正正式式和現在的頹廢生活告別。
2005/9/18 (日曜日)
朝早有點百無了賴， 又去了租碟睇。 又是以前睇過的コナン劇場版「銀翼の奇術師」， 唔， 劇場版來說這集我覺得最好睇。 有キッド應該是主因吧？ 哈哈。
剩下的不少時 service 時間， 先是 Christopher 的 Gentoo installtaion， 到現在個 X 好像都怪怪地。 哈， 佢好豪咁俾左個 root account 我， 心郁郁有點想試下傳說中的 "rm / -r"... 講笑講笑。 大致上都好像沒有大問題， 改番些 script 加兩句 debug message 等佢再試。
下午自己走去做估喱， 澄清先生新居入伙， 很多雜物買， 今日就陪佢買啦。 係咁掃一間巨型ダイゾー（請想像一間五層樓高的日本城）， 還可以啦。 不過想去 Starbucks 飲杯野都唔得， 八點就收舖... 在香港生存唔到喇。 唔緊要， 之後去佢屋企附近的一間餐廳食， 那間幾不錯喇， 煙三文魚很好吃不過唔太抵， 那碟炒飯就大大碟亦很好吃... anyway 很滿足的一餐
2005/9/17 (土曜日)
熱情如火的再挑戰
訓到下午才起身（奇怪， 昨晚都唔係好夜訓）， 不過睡眠質素應該好番少少喇， 之前幾個禮拜都好少發夢。 今日雖然發了個怪怪的夢（唔記得左了）， 都總算尋回失去的夢鄉。
下午失蹤了的澄清先生突然 send 番個 mail 過黎了， 哈， 仲以為佢得罪左人定欠下周身債， 又改電話又改地址，講笑講笑。 講下講下也為近來的自來貓命名, 也就是澄清先生的英文名了， 唔， 還不錯的名字呢。
晚上再次挑戰昨日多油得濟的白菜炒雞肉（順帶一提， 現在很多時也要兩晚食同一款菜， 因為一個人份量的菜很難買）， 結果就出事了， 因為一個字蠢， 昨日買的膠鑊鏟抵不住熱報銷（又話好抵得熱... ）， 連累埋個鑊都報銷（好在唔值錢...）， 出哂煙... 也好在只係落左油。 沒有辦法即刻出去買番些似樣少少的架餐。 好好， 重頭黎過， 唔， 大致都算成功， 雖然都係炒唔番老媽子的一半功力， 算啦， 唔好咁高要求。 炒多半年應該就會似樣些的了。
偶然收到朋友的壽堂的死訊， 又係 cancer， 記得在這個 blog setup 之後（約一個月）就聽到三次這樣的事。 雖然和這個朋友（更準確來說是舊同事）都唔算太熟， 不過始終感覺也不好。 隨着人的成長這些東西都應該會不斷出現的了， 要盡快習慣一下。
2005/9/16 (金曜日)
感動的白菜炒雞柳
朝早看了看書， 唔， 始終都被個 internet distract 了個注意力， 壞習慣就是壞習慣。 不過也 OK 啦。 另外收到一個新來的人的電話， 唔， 一口唔知甚麼地方口音的英語， 不過在這個會館住得耐都慣左了。 下個禮拜也可以見一見面。
下午搞左一輪， 出街去也！ 不過也不過是去剪剪頭髮。 今日這間髮型屋還真清閒（平日嘛）， 和個髮型師傾多幾句， 傾下平時食乜， 自己煮？ 厲害喎， 煮乜？ 即食咖喱... 「凄くないかも」（似乎不是很厲害）， 哈哈， 命中要害， 自己知自己事， 不過還是希望食好些。 唔。 突然間發憤圖強， 買油買鹽買菜買雞買“架餐”， 決定挑戰一下以前在家老媽子經常煮的一味－－豬肉炒菜， 不過為了健康點點改用雞肉， 也預備了白菜。 好！ 落手炒！ 炒炒炒, 油都彈得幾厲害， 不過雖然只是用了油和鹽而沒有其它調味料， 不過出奇的香， 唔， 心理作用？ 好， 炒起的菜自己都覺得幾滿意（以生平第一碟完全自己炒的菜來說）， 味道... 不錯不錯， 如果早少少和用些其它調味料醃那些雞肉會好吃些。 不過油好像多了點點。 唔。 但整體非常滿意的一餐， 那句老套得很的說話“自己有份煮的東西總會好吃點”， 果然沒有錯。 很感動！ 哈哈。
Wow よくがんばったね えらい!
たまには自分にご褒美
おいしいごちそうを食べたら
次への力になります
ほら なんだかうれしいことが
起こりそうな気がした
2005/9/14 (水曜日)
身心還是未在狀態， 唔。 去了租以前看過的コナン劇場版「世紀末の魔術師」， 幾鍾意這一集， 雖然畫功和剛剛或之前的一兩集有點距離， 不過劇情很好。
下午發現個 server 炒左， 唔， 最近因為 config files 有大變動所以一個亂字。 尤其當左搭一個 JK， 右搭一堆 virtual host 的時候就更顯得煩。 冇計。
晚上聽收音機才知道一件幾好笑的事， 就是欣兒扮白雪公主被人投訴到去廣管局， 真係一個反常的社會。 反常在咁都好投訴， 反常在欣兒和白雪公主拉上關係， 反常在廸士尼又好像任無記擺欣兒上檯， 唔， 奇怪。
還有數日就和現在的極度悠閒分手了。
2005/9/13 (火曜日)
呀， 唔覺意又完了 Grandia III， 真係短的一隻 game... 其實玩的時間雖然長， 不過大部份時間也在戰鬥， 故事的情節反而少。 雖然每當有 event 的時候也是動畫， 也算幾好看， 不過真的過短了， 我反而希望佢反撲歸真用番以前的方法， 讓故事更加精采仲好。
繼續為萬博的事籌備， 唔， 可以成行了。 不過有點趕頭趕命的感覺， 哈哈， 沒有辦法啦。
2005/9/12 (月曜日)
依然地等待開學， 唔， 報了名參加 Intel 的一個 joint research seminar... 希望可以成事， 起碼會有個清淅的目標。
唔。 不過話時話仍然被 holiday mood 所拆磨... 呀， 救命。
2005/9/10 (土曜日)
結果昨晚都係訓唔着， 真係要命， 凌晨無無聊聊開着電視， 竟然聽到廣東話， 做緊一套多年前的港産片， 我估都有廿年？ 套戲勁好笑(因為而家睇番特別好笑), 張曼玉做主角， 男主角唔知乜名， 大奸角元華， 故事大概係男主角同元華原本在明朝， 一個兵一個賊, 跟住有個甚麼大輪廻盤將兩個人送了去現代（正確來說係八十年代）， 這樣男主角就遇到了身為妓女的張曼玉。 接着男主角就當然不知不覺地歡了女主角， 而同時又要面對現代的生活， 同時元華當然就大奸大惡... 宿敵在碰頭當然戰一場， 之後兩人又同時消失於大輪廻盤之中... 其中一個鏡頭真係印象難忘， 兩人各執一劍， 走到屋頂對峙（對望？）， 呆了兩秒鐘， 跟住一架飛機飛過， 兩人又大打出手... 哈， 搞鬼...
亦因為晚上的失眠， 唉， 日抖又識起身...
2005/9/9 (金曜日)
好！ 終於可以準時起身， keep 住一排這個習慣等開學先得（唔， 雖是這樣說， 明日， 星期六， 係一個大考驗呢）
不過今日也沒有回 lab， 主要是要準備的東西還未準備好倒不如唔番住。 結果呢， 哈哈， 因為今日有得租コナン最新的劇場版「水平線上の陰謀」， 所以一早就去了租番黎睇， 之後也總算成功的用 mencoder， 成功的由原本的 5.5G 壓到 800MB 多些。 quality 都算係不錯。
不過整下整下都已經三點幾了， 點解時間過得咁快的， 結果留在會館， 主要動作， 哈， 打機。 真是的...
講番轉頭， 今次的コナン， 比起之前的劇場版好像少了點驚喜， 唔， 今次的犯人有兩個， 其中一個一開始已經爆光（在觀眾的立場）， 所以很簡單， 另一個都其實非常明顯.... 當然劇場版的謎團通常都傾向簡單一些， 加多點動作情節， 這方面就和平常的劇場版差不多。 唔。 不過個人還是覺得有怪盗キッド那些吸引些。
2005/9/8 (木曜日)
戦利品目:
グランディア III (With History of GRANDIA SOUND ADVENTURE BOX)
唔可以再俾自己的生理時鐘再亂下去， 唯有對自己施軟功， 哈， 到秋葉原朝聖去也。
今日主要行的是一些 Character goods 和 game 的舖頭， 真的多到離譜， 很多東西看， 哈， 不過銀包沒有太充足的子彈， 也為了避免自己失控喇。 要儲點錢預備日後搬屋。 點都好， read only 也可以過一整天， 話時話近來沒有定期劵的確地少了出街呢， 哈， 偶然出街調節一下身心也是一件好事。
今日總算買了グランディア III， 唔， 之前的グランディア II 的故事是其中一個我最欣賞的故事（好耐之前也寫過些 comment， 簡單地說就是人有堅定的意志就不用被神所控制的故事）， 今次也幾期待， 雖然男主角的設定麻麻， 都過得去啦。 慢慢玩， 哈， 唔可以好似上次サモンナイト咁一口氣玩完（現在最重要最重要的是調節好身心喇）。 話說回頭呢間舖頭真係平得離譜， 之前見到二手要 4700 円， 這裏新的都只是四千， 還有 sound track... 真唔明。
2005/9/7 (水曜日)
依然被紊亂的生理時鐘節磨， 唔到天光都訓唔着， 都算， 中午時間勁累， 夜晚十點左右亦是， 但過了一點之後卻鬼打咁精神...
算了， 反正都訓唔着都係溫下書好過， 呢個禮拜完全沒有番 lab， 其實唔係幾好， 不過番去釣魚的話都於事無補， 哈， 明日出街叉下電， 等自己唔好在中午時睡着都好。 反正都好耐冇去“朝聖”了。
2005/9/6 (火曜日)
很辛苦的起身， 唔， 其實或者有點唔舒服了， 最近的確是過度食無定時吧？ 體力不足加上生理時鐘混亂， 噢。 自己攞黎。
不過都要繼續向前行， 唔行唔得。 也好， 繼續溫一溫 programming （溫左都好耐）， 不過也不宜過勞了， 首要還是調理好身體。
多謝阿豪送的親子丼， 很不錯。
期待 Openoffice.org 2.0 的正式版， 相信是繼 Linux, Mozilla, Firefox 等之後另一個對 M$ 頭痛的問題， 痛快！
2005/9/5 (木曜日)
雨繼續的落， 就連早餐也沒有心機去買。 整下整下個人好像暈暈地咁添。 生活規律太亂所致吧？
サモンナイト的另外兩個結局也完了， 基本上整隻 game 也算真真正正的完結， 不算太複雜的一隻 game， 不過前前後後用了四十個鐘在這裏， 真係...
2005/9/4 (日曜日)
依然是沒有集中力的一天。 不過還是算了， 結果也是留在會館打機， 這個サモンナイト還有三個結局， 先完成了其中一個。 之後要用另一個主角去玩埋另外兩個結局...
夜晚突然落雨， 更加覺得悶焗...
2005/9/3 (土曜日)
完全地昏迷。 唔， 星期六還可以吧？
還有三個禮拜左右就開學了， 唔， 到而家都未知下個 semester 會開甚麼科目， 另外也唔太清楚自己究竟 take 英語的課好還是日本語的課好， 雖然兩者（應該）沒有太大分別。 唔， 到時先算？
2005/9/2 (金曜日)
力撑！ 點都要起身， 點都要番 lab.... 用前所未有的意志力... 總算起到身， 執好個人， 出門口。 嘩， 高難度動作。
也算有點成果， 雖然整日也是勉強用咖啡掙起個人， 不過也算是有點進度， 其實也是看書等等喇。 不過更重要的應該是調節生理時鐘。 呀， 究竟自己在說甚麼， 有點語無倫次添。 還是早點休息好了。
2005/9/1 (木曜日)
前兩日不斷サモンナイト的反動， 完全地麻俾狀態（註：今晨三點時已經打爆了， 不過有四個 ending， 睇怕起碼要多一段時間才能真正 finish）， 唉， 如果讀書有打機一半的衝勁就好了。
嘗試 upgrade 去 Kernel 2.6.13， 唔， Nvidia 個 driver 好像有點問題， 遲些得閒再試。
始終也要用點時間看書， 有個小問題， 就係始終睇唔慣日本語的 technical 書。 始終很多細節和上文下理， 不能像漫畫一樣容易地看呢。 四百頁的書， 過左成個月都只係看了未到一半...
身在日本卻接連地收到來自香港的死訊。 之前收到 Chanson 的死訊， 雖然完全沒有被他教過但亦不禁覺得可惜。 今次收到的是一個中四中五同班同學的死訊， 雖然期間不算熟落， 但一個二十幾歲的人話去就去真的很令人不開心和可惜。
唔。 突然有種奇怪的感覺。 一個沒有宗教的人在面對這些生生死死的問題時， 好像沒有甚麼可以做。 祈禱又唔係， 念經又唔係， 只可以嘆一聲無奈可惜， 以及希望周圍的人可以懷念死者...