2005/10/29 (土曜日)
好肯定的， 嚴重大昏迷。
夜晚看 Fujitv 的一個 IQ 遊戲節目， 當中有一條很有趣的 IQ 題， 題目裏面有一個五百円， 一個一百円， 一個五十円， 三個五円， 究竟怎樣可以拎走三個硬幣而令得出六十円呢？ 相信不是難的問題但幾有趣。
2005/10/28 (金曜日)
avalon-works new stars live
戦利品目:
ギャラクシーエンジェル II and I デュエット CD 2 アニス・アジート & ミント・ブラマンシュ
一朝早的那堂嚴重地唔想上， 其實應該唔止我一個人咁諗喇， 坐在隔離的 Mandu (斯里蘭卡人)， 見到佢在筆記簿上畫畫， 而且畫得鬼咁精細， 就知佢幾無聊， 早知我就帶部 notebook 黎打機啦。
下午繼續和 OMNet++ 戰鬥， 唔， 唔知三個星期內可唔可以做到個 demo simulation 呢？
早了點點走， 先去新宿買今日出的 CD， 之後走番代々木和一個唔識的人合流(リカ的西班牙朋友)， 還有郁子， 還有陳林， 一行人走去會場， 唔， 和 expect 的有很大分別呢。 兩層的地方， 一個 stage， 有點煙霧灕漫， 地方細所以很迫， 沒有辦法啦。 リカ在八點左右出場， 唱了兩首歌， 和平時很不同呢？ 唱歌的聲音和說話的聲音不同雖然可說是理所堂然了， 唔， 點講都有點意外。 お疲れさま。
之後就那裏逗留了一段長時間， 吹吹水， 看見心跳一百八十的リカ感覺有點有趣， 哈哈。
晚飯(不如說是宵夜)， 去了新宿的一間中華料理， 叫了碗雲吞麵， 撞鬼， 雲吞的料同埋皮完全地不合比例。 真係有點被騙的感覺。 其實這也不重要， 最大問題係那班人趕着收工， 差唔多做到趕客咁濟， 趕客都唔緊要， 態度可以客氣些嗎？ 在日本都可說第一次遇到這種待遇....
夜晚四人由火車站坐的士回去， 先到了郁子家附近， 她落車時放下五百円和說了句"足りないですけど"(雖然唔夠)， 呀， 四個人平分的話多得濟喇。 但人都走了， 沒有辦法。
總括來說不錯的一日， 朝早走埋那堂就更加 perfect 了。
2005/10/27 (木曜日)
朝早的堂沒有甚麼心機， 第一是因為今日輪到巴斯光年 present， 聽黎都哂時間， 二來顧着玩 OmNET++， 昨日算是 install 好， 不過就係唔知點解 install 唔到個 IPv6SuiteINET， 唔， 去到下午也是一路地整， 上完堂又整， 最後 downgrade 左個 OMNet 就 work 了， 真係... 不過好像真的幾好玩， 雖然唔知比較起 ns-2 有幾大分別。 玩落咪知囉。
夜晚， 明知眼訓都唔訓， 自己攞黎賤...
2005/10/26 (水曜日)
下午一條友食飯時， 偶然見到外面一個好熟口面但講唔出名的人， 打了個招呼後冇幾耐佢走左入黎一齊食飯， 傾左一兩句， 介紹下自己， 佢聽到我係香港人之後突然轉 channel 用廣東話.... 咦？ 原來係馬來西亞人。 來了這裏一個月多些， 唔， 因為唔識日本語有時都幾多不便。 不過點都好， 難得在這個 campus 撞到個識廣東話的人， 幾有趣。 同佢講下馬來西亞的東東， 佢地都幾羡慕香港的言論自由， 講到一個有趣的現象， 話說馬來西亞的人原來幾留意香港各方面的新聞， 原因是在那裏傳媒被政府控制， 結果反而對這個有言論自由的香港有點嚮往。
唔， 的確是一個有趣和值得深思的現象， 回歸以來一直中國化的香港， 不斷的被祖國那些思想侵蝕， 香港唯獨剩下的價值越來越少， 當人認為這些東西就像空氣一樣理所當然的時候， 溫水煮蛙， 某一日突然發現言論不再自由， 那時香港還有甚麼可以令人羡慕呢？
2005/10/25 (火曜日)
唔， 好眼訓... 上堂上個半鐘好像過左三個鐘似的， 另外在 lab 雖然也算是 plan 好個 survey draft 不過不斷被睡魔纏住... 呀....
早點休息好了。
2005/10/24 (月曜日)
休息了很長的時間， 並不代表可以精神奕奕的學習工作研究， 今日撞鬼地眼訓， 都唔知發生甚麼事。 之前上那課 Network Optimization (ネットワーク最適化)時雖然覺得幾悶但都未至於釣魚， 今日， 中哂招... 上堂後期總算打起精神的時候， 這個巴斯光年不斷電話滋擾， 開會這東西自己看 email 啦， 明知人上緊堂仲 send message 過黎， short short 地。
上完堂趕去開會， 開會嘛， 是這個研究室的習慣呢， 大約一個星期一次吧？ 但不知道為何會揀在我要上堂的時間開始咁解， 唔。 開會主要是各人的進度報告等東西， 不太大問題吧？ 今日只是聽， 不過也幾有趣， 唔知點解。
近來有點回復了追電視的壞習慣。 哈哈， 好在還只限月曜。 先是七點半的名探偵コナン， 之後九點的危険なアネキ， 這套 Drama 異常好笑， 但同時也有些感人的情節， 伊東美咲的演技也的確很不錯， 唔怪得咁紅。
近來那隻自來貓開始自己打開窗走入我間房了， 唔， 要做點東西才可以呢， 如果唔係冇覺好訓 。
Notebook 的 wireless LAN 問題也算是解決了， 呀， 竟然是 2.6.13 Kernel 轉了用 wext (Wireless Extension) driver 而唔係 ipw... 真係吹脹， 等我仲整左兩日。
2005/10/23 (日曜日)
昨日的延續， 依然地沒有辦法離開張床...
不過唔覺意打開了個窗， 結果隻貓無端端走左入黎， 噢， 發生甚麼事， 肚餓定係出面太凍呢？ 唔， 近來也入秋了， 我還是最喜歡這種天氣。 加上懶懶閒的， 伸伸懶腰， 和隻貓玩下都延不錯。
2005/10/21 (金曜日)
戦利品目:
ギャラクシーエンジェル 2nd 3
ギャラクシーエンジェル 2nd 2.5
GA みち
朝早都諗緊番唔番學好， 原因係那堂所謂科學技術文化特論（好像很勁的名字）內容超悶， 離題萬丈， 最大問題呢個 Professor 成日講一埋聽都未聽過的名字， 上堂跟本就係遊魂... 唉， 最後良心驅使， 都係番學， 結果非常後悔自己點解係一個有良心的學生。 一切盡在意料之中， 加上頭上五六七隻的睡魔不斷施咒... ZzzZzz...
Lab， 哈， 發現一件事， 就是原來大家知道笹瀬先生今日沒有番， 加上今日是星期五， 齊齊偷懶。 結果我雖然人是在 lab， 不過心卻只顧着裝番 Linux 的其它的 applications， 除了中間 udev 炒一次粉之外其它也七七八八了， 剩下... ACPI／APM 和 WLAN 等東西吧？ WLAN 又唔係話唔得， 不過就是奇奇怪怪的。 唔。
早點走人， 途中見到宮澤， 一起走時吹吹水， 唔， 究竟黎緊呢個學期收唔收得夠人呢？
ギャラクシーエンジェル 2nd もやっと終わったね。 いろいろあったけど、まぁ、なんとかなるさ。
2005/10/20 (木曜日)
Gentoo Linux 的 installation 異常的順利， 也比想像中快， 証明這部機的機能真的不差。 基本的東西也算 OK， sound wlan ACPI APM 還可以慢慢來。
異常的眼訓， 也變得沒有精神看 papers... 哈， 大件事。 另外午飯的時候和斯里蘭卡的同學（唔知點解這裏好多好黑的留學生）傾計， 傾到宗教與文化的問題， 意外的一個話題， 不錯。 同場講到古龍水的問題.... 唔... 好在唔只我一個係咁諗。
夜晚又約了以前別科的人食飯， 其中一個很久不見喇。 都冇乜點變， 不過這幾個國費的學生， 到今日大家都 pass 了院試（我已經讀緊添喇）， 很好， 平常的一餐飯， 很好吃。
2005/10/19 (水曜日)
朝早上的日本語堂， 做 presentation， 最近都傾向嘗試唔經大腦講日本語， 都算係 OK， 不過亦有點口語化。 唔。 繼續努力。
之後的時間基本上用了來裝 Linux， 昨日的 CD-Drive 完全地發揮效用， Yeah! Linux notebook!
咦？ 好像沒有怎樣做過 research 添...
夜晚， 也是模型。
2005/10/18 (火曜日)
戦利品目:
名探偵コナン 51
最近也覺得上堂好像幾悶咁添， 死啦， 咁大獲。
在 lab， 突然好奇一問有冇可以俾我部 notebook 用的 CD-ROM， 點知真係有， 好極， 咁應該可以 install Gentoo 去我部機那裏。 good!
夜晚， 幫手砌模型... 吹水。
2005/10/17 (月曜日)
上堂， 都延順利啦， 沒有甚麼大問題， 始終 Master 黎講 course 都冇乜壓力， 最大問題始終係自己個 research， topic 到而家雖然有點 idea 不過都未認真整理好再搵笹瀬先生傾。 唔。
整天都落雨， 出去又落， 番黎又落， 成身濕酒... 撞鬼。
2005/10/16 (日曜日)
經過之前幾日的輪講與及生日之後， 哈， 稍為熟我的人都一定知我會做乜架喇。 冇錯， 當然係大昏迷。
下午和一些朋友 icq 時突然間地震， 感覺上幾厲害， 但之後睇番新聞先得那三四級， 雖然的確沒有甚麼破壞力， 不過真係得四級咋咩？
夜晚幫一個朋友砌模型， 建築系如果成日都係做埋這些都幾灰， 一路做一路吹下水， 都幾好。 不過做到四五點... 明日仲要只係禮拜一... 噢
2005/10/15 (土曜日)
銀禧生日
戦利品目:
魔法先生ネギま! 12
好好。 又老一歲喇。 這個銀禧生日也是第一個在日本過的生日， 問題係， 其實在這裏不太多人知道我生日， 也沒有辦法啦。 首先打了左個電話俾康少， 嘻嘻， 總算有一個鐘頭叫做大佢一歲... 哈哈， 始終， 也是和這個人一起踏入二十五歲。 好好。
經過昨日的大整天之後， 大覺訓， 訓到十一點， 執下個人， 走去新宿諗住買ギャラクシーエンジェル的漫畫， 因為 GA みち 的限定版未有貨所以冇買（好彩， 點解？ 容後再說）。 點都好， 坐車去搵澄清先生， 真係鬼咁遠。 不過抱着一點期待的去吧？
平平凡凡但開開心心的一日， 原本期待的手作蛋糕沒有， 不過那個也算幾好味， 晚餐也只不過是一碟意粉， 不過在這個和香港相隔四個鐘頭飛機的地方有人這麼有心為我慶祝生日， 還有甚麼好要求？ 吹吹水看看電視， 很不錯。 還有一份奇怪的禮物， 哈哈， 因為我最近養的貓？ 這份禮物還附送蕃茄汁... 哈， 再講落去可能會被殺...
問題在之後天公不造美， 無端端落雨， 仲要係大雨， 搞到回程時周身都濕， 背囊也濕， 裏面的東西也濕了少少， 所以好在買唔到 GA... 雖然有點可惜， 唔緊要， 下個禮拜買。
生日願望... 有點貪心呢。 很多東西想做也很多東西想實現...
2005/10/14 (金曜日)
輪講、ワインパーティー
朝早的文化堂， 唉， 有點後悔 take 這一科， 真係越黎越唔知佢想點。 不過既然都洗濕個頭咁都冇計啦。
之後看了看 graduate 的 poster 之後，總算到了研究室的 meeting， 首先是巴斯光年的 tutorial... 奇怪， 笹瀬先生明明話係 progress report， 跟住巴斯光年不斷的講些很 details 的東西， 唔。 雖然我覺得奇怪但也沒有理咁多， 反而看看笹瀬先生的反應倒還有趣， 不斷的見他看手提電話， 之後又看看巴斯光年的 handout， 應該是看看他還要講幾耐吧？ 環顧四周看看其它人， 全部表情都是一樣的 (z_z)， 我也大約只是專注自己的 handout， 不過聽他所說的東西也好像沒有甚麼特別。 CSMA 之類的東西三年前都學過吧？ 唔。
之後被他用了五十分鐘左右， 比原定超時一倍， 真係亂哂龍。 輪到我時也唯有盡快完成， 免得原本的 schedule 配合唔到。 不過始終很少做 presentaton， 少不免幾緊張（這個比起巴斯光年真的差很遠， 因為佢之前好似做左幾年 lecturer， 而我則只是成日對住個那隻engineer/programmer）， 點都好， 最重要的笹瀬先生的反應也好像幾滿意， 應該也沒有甚麼大問題吧？ 下週有時間再好好的和他傾傾具體的內容。
之後主要也是笹瀬先生和其它 labmates 國際會議的遊記。 看看其它人遊歐洲遊美國遊澳洲， 都好像幾開心呢。 努力些出論文， 就可以去玩喇（喂喂...）。
輪講散了之後是和 Intel 的庄納(笹瀬研的舊生)開會， 睇睇關於共同研究等東西。 唔， 不過結論好像沒有甚麼適合我呢。 始終 upper layer protocol 似乎不是今次研究的重心。 まぁいいか。
Wine party， 應酬的飲左兩滴（我到而家都唔明酒有乜好飲）， 其餘時間主要也是食和吹水喇， 很不錯， 很多時在 lab 裏面大家也埋頭苦幹， 通常也不好意思打擾， 今日這個機會總算很不錯喇。 即使之後 Wine party 完了也繼續吹水， 很有趣的一日。
2005/10/13 (木曜日)
一朝早的 network engineering， 今天也總算是我的 presentation， 上次因為那位同學仔用了極長時間去 present 所以延遲到今日。 發表也算是順利。 最初那段完全沒有問題， 不過後段突然有些失憶， 有點亂起上來， 唔。 不過後來問番同學整體也 OK 那也算 OK 啦？
之後下午應該還有一堂， 一點走出去， 突然驚覺搞錯左時間， 傻更更的走番 lab， 繼續準備明日的輪講， 一路準備一路準備， 到真正的上堂時間時走了去課室， 鐘聲響起， 見到小貓幾隻， 奇怪， 跟住突然話休講... 噢？ 乜事？ 真係唔係好明。 唉， 沒辦法， 繼續準備...
夜晚， 一路準備一路顧住玩数独， 呢個 Marco 真係早唔 send 遲唔 send... 擺明靠害... （哈， 賴得就賴）， 唔， 應該沒有問題嘛？
2005/10/12 (水曜日)
一朝早的日本語課， 唔， 其實幾悶。 因為到現在也未 agree 到一個大家合意的教學方法（因為少人）， 所以都只好用一些用開的教材， 唔。
約了一個很久沒有見面的朋友， 之前大家一起在三田讀日文， 因為都是香港人所以叫啱咀型， 前一兩月成日話搵日食飯點知最後都係冇左件事。 今日也總算就到時間喇。 另外今日對這個朋友來說也是幾重要的日子， 因為大学院的合格発表， 所以食飯之前同左佢去 KBS (Keio Business School) 看成績... 有點想起幾個月前的情形呢， 這個 KBS 都唔知起了在甚麼地方， 由火車站， 穿過商店街， 一些民居， 開始覺得有點唔對路， 點都唔似一個有學校的地方。 再繼續行， 終於見到一間大小小的地方， 終於到了這個 KBS， 哈。 完全感覺唔到大學的氣氛， 似間別墅多些。 點都好， 望着門口貼了的名單， ... 有了有了， 哈， 我都話唔駛擔心啦。 恭喜恭喜。 心情大好， 食飯都開心些， 傾傾傾， 都傾左好耐...
回到自己的工作， 唔， 過兩日的輪講， 暫時也沒有甚麼頭緒， 唯有不斷的看 papers.... 心配だ...
夜晚收到 Marco send 過來關於数独的 website， 之前一路都見火車上有人玩， 但唔知名也唔知規則所以也沒有理會， 一玩之下， 有幾好玩喎。 這類的 logic game 真的很不錯， 而且尤其適合搭車時消磨時間用... 哈哈。
2005/10/11 (火曜日)
番學， 雖然沒有甚麼進度， 也沒有辦法啦， 死就死， 有幾多做幾多， 進度報告嘛， 本身就係反映你做左幾多野， 咁事實上唔係做得太多東西， 所以報告的東西也自然有限啦， 點都好， 好好的準備一下點樣 present 啦， 老實講笹瀬先生都應該知道我大概的狀況（吧）。
不過雄心狀志之際， lab 的 network 卻 down 了， 原因也懶得諗， 好在仲有 wireless LAN 可以用。 咁都好少少。 起碼要睇 paper 都仲可以隨時 download。
唔， 總算看了個有趣的 topic， 希望可以找到些東西可以看看。 另外呢， 今日放學和其中一個 lab mate 木村（和木村拓哉沒有關係的）一起走， 吹吹水， 佢竟然彈出一句說笹瀬先生好像對留學生比較嚴格， 嘩大哥唔好嚇我好喎。 唔......
2005/10/8 (土曜日)
基本上是昏迷的一日， 本來約了那些一起拎獎學金黎的人一聚， 誰知其中一人頭痛結果 cancel.
雖然說是基本昏迷的一日， 不過見到那些亂黎的人真係有點點憤怒。 首先下午的時候一個最近來的中國人， 當我整緊餸預備用個微波爐的時候， 佢走左入黎跟住就把自己的東西放了入微波爐， 本來也沒有甚麼問題， 始終那個時候我都未開始用， 但望着他一面疑惑好像唔知點用個微波爐， 正想問他要不要幫手的時候佢又㩒左制， OK 啦， 只係有點不明佢點解用慢火三分鐘... 之後等佢三分鐘， 撞鬼， 唔夠熱， 用快火加多兩分鐘... 也沒說話可說， 等等等， 等完之後諗住完啦， 唔知邊度用拎多碟餸出黎， 重覆頭先的過程先到我整野食， 噢， 其實呢樣野都真係冇辦法， 個爐未開始用其它人用都無可厚非。 睇佢都應該沒有甚麼惡意。 到我用個爐的時候無無聊聊的（平時一邊用個爐時一邊會煮餸）， 望見佢已經食完... 有點無奈之際聽到些怪聲， 面向星盤的他... 好像再刷牙定洗面... 喂大哥， 呢 d 野留番自己房做好喎， 咁搞法我點洗碗呀。 真係唔好意思都要出聲... 唉， 自己都唔想覺得中國人是如此羞家， 但事實就是如此， 不只一次， 當然也不能一概而論， 但真的見得太多了。 陶傑成日講的小農社會， 的確是沒有反駁餘地下的事實。
另外夜晚， 兩個唔係住這條 wing 的女仔（因為這條 wing 全部男仔）用了個廚房， 本來也沒有甚麼問題， 極其量只是比較嘈， 這是她們的自由喇， 接着見佢地把吃完的東西， 包括紙包括膠放進星盤， 當然也包括了之前佢地未洗的碗碗碟碟， 拍拍羅友走人， 算點？ 雖然唔記得邊個教落最緊要唔好得罪女人， 但呢班人， 唔止一次（之前肯定佢地都係咁， 不過冇當場見到咁解）， 唔係太願意的情況下叫佢地執番好， 跟住其中一個人算係照執， 執完之後反問我一句“咁好未呀？”， 乜野態度呀？ 我先係受害者喎， 我唔敢講我態度好好， 但有錯的好明顯係佢自己喎？ 之後嘈左幾句， 撞鬼... 經此之後我可以肯定我將來一定唔會請菲傭印傭或泰傭...
2005/10/7 (金曜日)
理工系外国人研究者・留学生懇請会
一朝早那堂科學文化， 唔， 主線應該是進化論吧？ 進化論與宗教的關係， 本來可以係一個很有興趣的題目， 不過一大大堆不知甚麼的人名名詞， 加上星期五的魔力， 噢， 好像中途發左個夢...
之後下午在 lab 看看 paper， 中途散散步， 很寫意的。 但亦即是說進度不大。 唔， 大件事， 下個星期五要 present 進度報告， 點算好...
之後晚上的懇請会， 基本上一個食字加一個講字， 自助餐， 都算係幾豪華， 最感動的應該係生果盤上面有好耐好耐冇食過的蘋果呢。 懐かしい！ 另外吹水， 有和 lab 裏面的人傾， 一些其它學生， 也有研究科委員長， 這個委員長， 話哂都叫做這個 school 最大粒的人， 不過意外地沒有甚麼架子， 講開又係， 學校裏其它教職員都沒有特別架子的， 原因嘛， 跟據委員長所講這是因為福澤諭吉（明治時期思想家， 學校創校人）的諗法是這學校裏面不是學生從教師學習， 而是師生全體一起學習， 所以學校沒有所謂師生關係， 自然也沒有甚麼上下關係。 當然形式和事實上師生關係確確實實存在， 不過精神上似乎超越了這種上下關係呢， 在這裏日子尚短， 不過也能感受到。
晚上回到會館， 再和一些素未謀面的人傾計， 今日講左幾日的說話呢...
2005/10/6 (木曜日)
本來今日要做 presentaion, 一早看完又看， 算係準備好吧？ 上堂， 理論上我會是第二個 present， 咁心都算做足準備， 咁第一個 present 那位同學仔， 嘩， 用左都唔知幾多時間 present， 跟住又用左唔知幾多時間答一個問題， 結果剩下少少時間， 呵呵， 延期再戰。 計埋下星期研究室的論講， 連續兩個 presentation， 都咪話唔重 loading。
是但啦， 都冇乜所謂。 不過因為昨晚的 overdrive， 勁晚訓... 下午的 security 也做左姜太公， 唔， 要休息。
呀， 眼訓... 搭車搭得多， 好眼訓...
2005/10/5 (水曜日)
上堂， 冇人... 坐下， 做下自己野， 之後突然有個 staff 上黎話 instructor 請病假， 噢。 雖然不是甚麼出奇的事， 不過這樣說的話今日唔番學都 OK... 唔緊要啦， 反正都要番 lab. 番 lab， 今日和笹瀬教授傾了一陣關於 research 的東西， 有好消息有壞消息， 壞消息係唔知幾時先可以有燈泡突然醒覺， 好消息係因為工作經驗比其它人好， 只要燈泡突然一着就應該可以好順利（笹瀬先生云）， 呀， 燈泡...
有時收到 lab mates 的 Email， 望望入面的英文都幾搞笑， 其中一句： Maybe you can see my face because I am a nice guy... 講乜呢？ 完全唔明。 搞笑...
2005/10/4 (火曜日)
撞鬼， 下午上堂突然間迷失方向, networking course 無端端變左講能源問題， 死喇， 究竟發生乜事？ 就算我日本語情度有限也沒有理由揀錯科入錯課室吧？ 呀， 講左半堂先至變番正常少少。 環看四周一半人訓着左...
沒有甚麼時間在 lab， 呀， 仲差少少東西未完成， 硬係唔太舒服， 帶番會館做？ 哈哈， 九成都唔會成事啦。 結果只是一大堆雜務也沒有了不少時間了。
生日快樂！ 有時差的 Happy birthday， 很久沒有聽過的聲音， 之前仲諗住扮神秘， 呀， 誰知好像很快就被認出呢。 哈， 扮唔到神秘有點可惜不過也很開心， 之後傾， 也傾了不少時間呢， 開心的事， 擔心的事， 還有發夢也沒想過的事... 嘻， 乜都係假， 生日大哂， 任何願望也會實現！
2005/10/3 (月曜日)
第二週。 上課。 首先第一堂， 噢， 唔記得左今日 cancel 左， 聽日先上堂， 三條友傻更更走左轉冤枉路... 繼續在 lab 做東西， 今日不同的是多了部 notebook， 其實都幾好， 變相多了點機會去做不同的東西。 另外今日也要完成 course reg 的東西， 有點奇怪， 辛辛苦苦整左個 web-base 的 course reg system， 雖然感覺上比不上科大的 course reg system 但也總算完整， 但最後的一個步驟竟然係 print 張 summary 出黎俾教授簽名， 真奇。
下午的 network optimization， 呀， 最尾的一個 quiz, 企左係度， 死喇。
之後番 lab， 一個 D2 的學生宮澤從美國回來， 哈， 都幾好傾。 有趣的事帶了不少手信回來， 大部份也是筆呀電話繩之類。 我都算幾好彩， 有個寫有 Alex 的小裝飾。 哈哈， 在美國買唔到日本語名字的小飾物小擺設， lucky！
澄清先生的第一日番工， 哈， 搞笑， 成班阿伯（註： 三十五歳或以上吧）， 對着一堆不明的東西， 講到好似要死咁。 哈哈， 撞鬼。
2005/10/1 (土曜日)
戦利品目:
トラ☆トラ☆ミルフィーユ
ギャラクシーエンジェル II && I デュエットCD 1 アプリコット桜葉・ミルフィーユ桜葉
Eternal Love 大全集
IBM X40
今日應該係半年以來用得最多錢的一日了。 今日的戦利品清單雖然是長， 不過支出差不多全部也是部 IBM X40 喇。 早兩日見到， 新機， 只是 1.27kg 左右， 方便帶番學， 亦方便上堂用。 價錢... 以這個 spec 的新機來說可說是冇得再平咁濟喇。 忍痛買下， 今個月又要節衣縮食了... 不過話口未完就去了買 CD， 唔， 這些經常開支嘛， 冇得避架喇... 撞鬼， 唯有在其它地方減 budget 了。 不過開左學， 其實都冇乜機會打機， 所以都不是大問題吧？
話時話在ケーマーズ本店外面好像在搞簽名會之類的東東， 簽名那個人... 唔識， 似乎是声優吧？ 見佢逐個簽名， 和每一個人逐一傾幾句， 還有那個表情， 不覺間有點很親切的感覺， 下次有機會都排下隊先。
回到去 setup 部機， 因為沒有 CD-ROM 唯有用住 Windows 先（遲些 dual-boot）， 當然還有欣賞今日買的 CD...
2005/9/30 (金曜日)
上課的第五日。 明日的課點都唔會 take 架喇， 所以今日也就可以說是完了一個 cycle。 而今日也只是得朝早一堂， 而且是一科吹水科（本來想 take Optical network 不過撞時間）， 也是唯一一科外國人教的科目（外國人的意思即係非日本人喇）， 一入到黎大汗曡細汗， 跟手就派了一張意大利文的剪報... 想點呀？ 不過似乎這課都幾有趣... 唔緊要喇， 總之 take 番科吹水科叫做可以輕減一些 course work...
之後大半日都在 lab， 笹瀬先生時不時都會走入黎吹水， 哈哈， 有點壓力呢， 如果佢走入黎時正在 slashdot 就唔係幾好， 講開這個 slashdot 真係唔知用了我幾多青春呢... 吹水， 講了不少東西， 閒話家常亦有， WiMax 4G 等等的前景也有。 不錯。
巴斯光年的一個好消息， 佢做左人老豆， 母女平安。 唔， 雖然在同一個 lab， 但總覺得和他真的完全係兩個世界的人呢。 文化的差異， 性格的差異， 身分的差異， 唔怪得咁多矛盾啦。
一個禮拜， 嘩， 極攰。