2007/3/31 (土曜日)
羽毛球日。 得三個人打， 沒有辦法之下唯有單打輪流打啦。 不過單打所需要的體力就算沒有雙打的一倍， 不過人數少的情況下差不多兩個鐘頭直落， 也會有點想死的感覺。 尤其係對住“会長”時， 論技術的話我諗我唔會差過佢， 不過鬥耐力的話我肯定輸。 不過可以開盡 turbo 黎打， 特別開心， 意外的出了一身汗（哎呀， 沒有帶衫換）。
之後去 Cafe 坐， 友人Eさん首先到左， 吹水， 每次來這裏都吹到佢收舖（17:00）， 我諗舖頭的人都應該認得我地？
沒有太多特別事做， 回家。 今日看完了《小説 ながされて藍蘭島2 恋しくて》， 自己都覺得快過頭。 估唔到自己還有這樣的閱讀能力。 不過呢個故仔相對之前第一期好像冇咁好笑咁， 比較平靜， 也沒有類似「江楠刈婆」， さくや（女将、自称）那部份就幾好， 但好像同主線扯不上太大關係... 唔， 整體都算幾好笑喇。
2007/3/30 (金曜日)
整日用了不少時間在吹水， 唔， 當然也有做些 research 的東西， 少少咁啦。
回到學校 pet pet 都未坐暖就被人叫了去食飯， 食了一陣飯就見到一個馬來西亞朋友（某程度來說是這個 campus 入面最有親切感的一個人， 因為識廣東話）， 條友仔快快手手完成了個 master degree， 之後會去 PhD， 唔， 自己雖然也有諗過， 不過悠悠閒閒的讀好像開心些， 而且都沒有特別需要要好快讀完嘛。 Anyway 之後陪了他去處理種種雜務等。 也有機會看看一些他在馬來西亞時的相， 真的好靚。 不過剩係機票都要唔少錢， 哈， 諗下先啦。
之後在 lab 無端端同個印尼學生（男）講左唔少社會問題， 有香港的也有印尼的， 其實唔係好明點解會講這類問題， 不過又越講越 high 咁？ 話口未完跟住另一個將要畢業的印尼學生（女）番黎執野， 又傾了些無謂東西， 不過以一個 Information Science 的學生來說未見過 Google Earth， 對自己來說真的有點吃驚， 原來唔係個囚䧸都會留意這麼多無謂東西的？
晚上約了一個從香港來的朋友（舊同事）， 其實前幾個月佢先黎過， 唔夠一個月前也在香港見過佢， 唔緊要喇， 難得來到嘛。 吹水食飯， 之後去了自己一個禮拜去兩三次的ヨドバシカメラ（大型電器舖）， 睇下headphone， 睇下相機咁。 不過講到相機佢比起我這些只係識用 digital cam 的人 pro 好多喇， 幾 pro 就唔敢講， 不過投資了唔少錢就一定的了。 哈， 趁有機會問了些攝影的基本功夫， 過幾日去睇桜時試下用先。
2007/3/29 (木曜日)
又到一個學年的尾聲， 自己由於比起其它日本人學生遲了半年入學， 所以今次的尾聲和自己沒有大關係。 Anyway 今日笹瀬研有幾位學生畢業， 之後都唔會有太多機會見到他們了。 沒有辦法喇， 畢業後各散東西， 而且日本雖然細， 但比起香港， 唔覺意在街上撞到的機會真的細得有點可憐。
不過朝早回到學校還是普普通通的做自己的東西， 唔， 還是老樣子的有點點傻更更的過了大半日。 話時話就黎又有個新留學生黎， 唔， 下個禮拜就之乜野料喇。
去到傍晚， 起程去那間 default 的居酒屋。 真的已經 default 到沒有說話好說。 是但了。 今日的主角輪流地發言， 大部份也是多謝的說話， 不過其中一個留年的學生的發言， 唔知話率直好丫， 定係純粹發洩， 總之就係開口得罪先生， 老實講， 有 point 的話老實講都未必係問題， 不過我就真係只聽到他把自己懶所造成的後果轉化為笹瀬先生的責任。 唔， 自己也不算太清楚兩人之間的問題喇， 不過自己最初揀得入這個研究室也得為自己的行為負點責任吧？
Anyway 其它一部份人將快步入社會工作了。 呀， 工作嘛， 人際關係真的複雜得多， 希望他們能順順利利啦。
另外夜晚番屋企時， 偶然在附近的公園見到夜櫻， 呀， 最近也和朋友想起也差不多時候去賞花。 而且又記得聽日會落雨， 所以特地拎埋腳架去影。 最初用錯 setting 唔算影得太好， 後來較盡個快門去三秒， 感覺好了不少呢。
2007/3/27 (火曜日)
一早起身， 回學校， 真係自己都唔信自己竟然可以在九點回到學校。 回到去， 唔知自己要唔要做国際会議的 presentation， 和周さん傾了一陣， 執下些相咁。 之後十點多些開始 meeting， 先是很久沒有見的笹瀬先生突擊的三小時 tutorial， 關於 mobile wireless communication 的最新動向， 其實都幾好聽的。 不過昨日始終玩得太盡， 加上近來都慣了遲起身， 比周公多次拖走， 當然咖啡只係心理上好過些， 完全沒有作用。 好彩坐得後。
之後約略的說了国際会議的東西後， 食飯。 食飽後是三年生（下個月的四年生）的 presentation， 講 error correcting code， 哦。 ELEC332 嘛。 Year 2 時讀過啦， 那時好型咁自己一個同一大班 year 3 讀架嘛， 都唔係好耐之前， 不過係六年左右之嘛， 點會唔唔記得丫！ 於是依舊檯面放了鑵飲完的咖啡， 同周公扯大纜....
之後回到研究室都沒有太多精神做野， 傻了一會之後都係番去了。
2007/3/26 (月曜日)
またね
一位唔係識左好耐的朋友Yさん（講開黎， 幾時識的呢？）， 過多幾日就要回香港了。 如果用交情除以識了的時間的話個數都應該好大。 住在千葉的朋友， 話時話除了去機場之外， 到千葉可能是第一次？ 唔， 一程車就到， 大約要一個鐘， 其實都唔算遠， 不過唔知點解車費咁鬼貴。 其實都無關重要的問題喇。
跟住去到的船橋站， 離開了東京後算係一個大站吧？ 感覺上有點覺得似町田？ 不久後就會合了今日的主角、Eさん和Aさん， 有位大哥遲到， 唔理佢， 去食食野買買野之後就去了打搞這間 2LDK 的屋， 同我間房真係好大分別囉。 如果搵到人去一齊租番間 2LDK 都應該幾好， 當然， 我都知相見好同住難的道理啦。 想下都唔得咩？ 入番正題， 下午開始玩各種的東西， 有大鼓の達人啦， 有ラブラブジェンガー啦， 也有UNO， 亦有琴（當然， 唔識玩）。 一路的玩一路的等食（其實雖然個朋友話鍾意， 始終坐响度等食都唔係咁好咁）。
之後一路玩一路吹水， 時間真係快得有點可憐， 繼續吹水， 心裏靜靜的諗， 唔夠時間玩喎， 不如一路吹水吹到過左終電啦？ 不過最後都係好理智的走去趕火車.....
回到去， 好眼訓， 哎呀， 明日朝早有研究室 meeting 咩？ 哎呀， 大大鑊早早訓....
幾時有機會可以再見這個朋友呢？？ 保重了。
呀， 點點題外話， 坐火車時看完了藍蘭島小説的第一本， 繼之前的「聖箒『江楠刈婆』」之後， 出現了「御沙衣流(みさいる)祈願」的符， 完全的被まち這些東西笑死。 另外番外篇的「やさしくされて」比較細緻姊妹的感情也寫得不錯呢（當然不會少了中間的笑料）。 第二本都已經買左了， 應該很快就會被自己看完？？
2007/3/25 (日曜日)
由於昨日不斷的看書的關係， 今朝起身時都已經是... 唔好意思， 今午起身時已經是兩點了。 最唔高興的係被那張 display card 嘈醒的。 與其再買過風扇， 把心一横買過張新的 display card 好過。 做了少少初步調查， 7300GT 好像也幾抵用。 不過去到舖頭時就只見到 7600GS， 又唔算太貴(11800円， 800HKD左右吧)， 加上係沒有風扇的 model， 唔諗太多了! 買番去， 換了張 card 後， 改了xorg.conf 的VideoRAM去 256MB， 完全順利的換了張 card。 由於多了 RAM， 開很多個 windows 也沒有問題！ 加上沒有風扇， 靜了不少呢（不過CPU 和機箱的風扇依然係 main noise source）。
2007/3/24 (土曜日)
戦利品
小説 ながされて藍蘭島 告げられて
太鼓の達人 あっぱれ三代目
羽毛球日。 今日三男（叫做識打）三女（叫做識玩）的組合。 唔， 後來打打下女仕們都好像有些倦意， 於是打單打， 小弟輸一場勝一場， 還好吧？ 下次再有機會一定要冷靜些應付呢。 最近開始用些唔太慣的打法， 練成的話應該有唔錯的威力吧？
之後慣例的吃了點東西， 回去後買了隻 game （おいおい， 呢幾日買了太多東西了吧？）， 想玩好耐的了。 最近有個藉口讓自己買， 好野！ 不過嘈完一輪之後仍然很嘈， ？， 部機都熄左冇理由咁嘈架？ 之後發現原來係張 display card， 可能嘈左好耐的了， 現在才發現真的要佩服自己的遲純， 去了買風扇， 不過都真係幾失敗， 竟然唔啱大細... 唔.... 沒有辦法， 冇理由再買， 明日去買過張 display card 好過。
又繼續講講藍蘭島， 這本小說其實都出了兩年了， 今日先黎買真係遲得要命， 算， 有心唔怕遲。 本來諗住小說可能會冇咁好睇， 不過完全的錯了， 看了少少（都已經看到凌晨四點）， 最有趣的是那個「聖箒『江楠刈婆(えくすかりばー)』」， 有玩 RPG 的人大概也會聽過聖劍エクスカリバー， 看了之後在火車裏差點傻笑了出來， 好在收掣收得切... 有排看的一本小說。 很期待。 哈， 話時話加埋之前漫畫中的妖箒村正， 那種威力真的不能想像？
另外一個中學時期的一位好友（當然， 現在也是）的消息， 他計劃結婚了！ 恭喜恭喜！ 由於未有 details 所以不說太多了。 不過以很熟的朋友來說， 結婚的人還不算很多。 很替他高興喇。
2007/3/23 (金曜日)
在家中繼續寫 paper， 也算是沒有大問題吧？ 始終在家中的進度不算太好， 不過昨日開了個頭之後也算係過得去喇。 始終萬事起頭難這句說話也有它的道理。
在家中也少不免進入休息mode， 再次完成了テイルズオブシンフォニア， 也完成了るろうに剣心的剣客激闘， 不過也真奇怪， 很久沒有玩最初就連點樣用九頭龍閃和天翔龍閃都唔太記得， 但卻一口氣的打到最後（雖然比古戰也是僅僅完成）， 完全唔明， 之前很熟練的情況下也未必做到。 唔理了。
2007/3/22 (木曜日)
戦利品
ながされて藍蘭島 10
ながされて藍蘭島 10 初回限定特装版
小説 ながされて藍蘭島2 恋しくて
スクールランブル 16
終於回到學校， 前日突然的病倒所以乜都沒有做過， 今日好好補番數。 總算回復少少作戰能力吧？ 一口氣的整理好要做的東西， 希望下個禮拜前可以做到大部份的東西喇。
繼續的藍蘭島モード， 等了很久的漫畫（由於是月刊連載， 所以出得比較慢）， 今次很オタク的買了兩本基乎一樣的漫畫， 不同的是封面唔同， 還有就是特装版附送的フィギュア， 自己不算儲フィギュア的人， 不過真的製作精美， 很想買番之前那些不過都幾難了。 沒有辦法。 講番今期的藍蘭島， 承自上期的物狩り競争大会， 細節唔講了， 不過まち（女主角之一， 巫術、召喚術、体術、呪術了得）同からあげ(島上最強、西のぬし、公鷄)做了 last boss的角色， 很得意之餘也很有型, 尤其是てるてるごっち一二三式村正（まち的六隻式神的合體）， 完全笑死。 不過大戰（？）前的一幕， 行人（男主角）在和大牙(北のぬし、老虎、比からあげ弱？)戰之後まち的一幕也很不錯呢。
うわ、完全地脱離了現實世界添。
2007/3/21 (水曜日)
戦利品:
ながされて藍蘭島 恋してMAGIC SOUL PARTY 踊らされてディスコ島
燒也退了， 昨日真係無端端唔知乜事。 走出街， 咦？ 八百屋（菜舖）冇開？ 今日放假咩？ 唔理咁多了， 食點東西和買了種種雜物之後回家休息下， 買了支探熱針， 叫做放在屋企預備吧？ 始終一個人住的話每件事都要小心些。 36.4℃， 冇事了吧。
話時話， 今日出了藍蘭島的第一隻キャラクターアルバムCD， 即時地買了， 每首歌也很有趣， 歌詞也是跟據故事裏面的角色的性格等寫成， 不錯。 而最尾的一首中的「宝物は思い出じゃなく あなたの手のぬくもりヨ 離さないで、そうずっと… お願いよ 約束してね」算是這個アルバム裏面最喜歡的一句吧？ 題外話， 從這隻CD開始就有所謂的「目指せ! 名誉島民」的企画， 儲到 75分的話就可以做名誉島民... 順帶一提， 這隻CD有三分...
2007/3/20 (火曜日)
好， 準備回學校。 話時話， 前兩日在首都圈（東京以及其上下左右幾個県）終於也有PASMO， 簡單地說就是八達通喇（唔， 心裏雖然覺得八達通方便不過還是有條刺）。 之前一直都有 Suica， 不過只限於 JR， 轉其它私鉄麻麻煩煩的， 而今日開始就終於可以一張咭行哂成個首都圈喇。 買了張定期劵， "pi"的那一下真的有點點感動。
回到學校， 即刻處理番之前沒有做的雜務， 拎番些 form 處理 grant/loan， 不過回到 lab， 坐下時開始有點唔妥， 上吐下瀉左幾云之後， 坐底， 全身冇力， 休息一下， 但都係唔妥， 飲幾杯水後， 唔得， 去了保健室， 當值那位護士稍稍問了些身體的問題後量體溫... 38℃... 唔係掛? 不過全身沒有力， 於是在保健室訓了一會， 兩個小時左右吧？ 焗了一身汗， 感覺上好了不少， 再量體溫， 37.4℃， 算好了不少吧？ 體力也回復了點點， 應該可以行到番車站吧？
之後食點點東西補充體力， 雖然還是四肢乏力不過還好吧？ 不過諗住去搵醫生睇， 結果周圍都鬼咁多人， 沒有辦法之下直接回去休息。
晚上起身， 算是回復了七成吧？ 不過諗極都唔明發生甚麼事。 或者是近來無形中給了自己不少壓力吧？ 唔， 都有可能食錯野？ 點都好， 兩方面都要注意一下。 好像今日咁， 嚴重少少的話真係唔知邊個幫到自己。
2007/3/19 (月曜日)
本身應該回學校的了， 不過都係老様子的唔夠意志力， 或者運動不足， 或者營養不足， 總之就係唔得。 不過關於研究方面雖然算是完了国際会議， 不過之後再進一步， 前面那幅牆比起自己想像中高， 或者將來看番轉頭會覺得係一個考驗， 就像以前超越了會考， 高考， 工作及遠離家人的留學生活一樣， 超越了之後就係另一個境界， 不過當想像一下自己在會考當時也沒有甚麼信心完全超越它呢（咦？ 好像那時有人唔溫書讀日本語）。
講太多了， 其實都係藉口。 今天算是浪費了， 還有明天。 不過， 明天卻又不是很多個。
2007/3/17 (土曜日)
一番黎當然就是打羽毛球（咦？ 乜唔係寫好份 paper 咩？）， 今次打羽毛球， Bさん帶了兩位新朋友黎（不過其實上個禮拜已經來過一次的了）， 兩位也算打得不錯的人呢， 所以可以盡情打（有時太多超初心者的話會有點悶）。 點都好， 有些機會識多些新朋友也是一件好事喇。
之後食了點東西後， 佢地有 party， 本來自己都想去， 不過還是想回去做下野所以推左， 但， 結果， フジテレビ的 IQ サプリ在這個時候有兩小時sp， 看完後食埋飯都準備訓了......
2007/3/16 (金曜日)
日本に戻るヨ
戦利品:
まじっく快斗 4
四個星期在香港的生活， 今日也總算完了。 再次回去日本過一個人的生活。 朝早有老豆和老媽子送機， 不用太早飛， 也算是悠悠閒閒的在機場過日辰喇。
飛機好像很多人似的， 不過半睡半看書， 三個多小時的機程一會就完了， 回到日本覺得空氣有點冷， 真舒服， 入了境之後坐火車回去， 不過 miss 了一班車的情況下等了很久， 火車車程又兩個鐘， 真是的....
回到日本的家中， 已經很倦了， 好， 休息下。
2007/3/15 (木曜日)
今次的 trip 在香港的最後一日。 還是靜靜的把時間留給家人吧？ 上次番黎也是， 不少時間也用了在朋友身上， 反而有點忽略了家人。 唔， 家裏這一年都發生了不少事， 深深感受到家家有本難諗的經這句說話的意思。 Anyway 朝早去飲茶， 唔覺意叫了鬼咁多野食。 食唔哂， 沒有辦法了。
連續三日的 WCNC， 始終也筋疲力盡。 回家休息一下， 之後再出去和家姐阿哥食飯， 普普通通的茶餐廳， 咦？ 好好食喎。 哈哈， 真的不捨得香港的食物喇。 之後再到家姐的家中， 玩貓， 比起上年肥了不少喇！ 很有趣。 又唔怕人， 真係幾好玩。 問我鍾意貓定狗多些的話， 真係唔知點答.....
和阿哥傾了不少家庭的事， 唔， 自己而家身在海外， 對不能對屋企負太大責任一事有點點內疚， 真的要感謝自己的阿哥家姐， 還有， 老媽子也辛苦了。
2007/3/14 (水曜日)
IEEE WCNC その３
第三日的WCNC。 今次因為兩位要做 presentation， 點都要黎捧下場。 不過因為撞時間， 唯有去其中一個比較聽得明的同學那裏喇。 鬼咁早起身， 真係整鬼， 仲慘個番學。 Anyway 本身第二個 present 的他， 因為第一位沒有來所以變了做第一個。 一路的 present， 一路的影相。 哈哈， 完全唔係路。 不過是但了， 反正之前都聽過佢 present 唔知幾多次...
之後有少少 session 想聽， 其餘的時間也只是和那些 helper 吹吹水講下燕窩， 點解講燕窩？ 因為周さん想買嘛。 講講下突然間見到自己大學的大槻先生， 呀？ 乜佢都有黎咩？ 嚇了一跳（不過好像其它人見到我突然間轉了日本語 channel 更加嚇一跳咁）。 原來來都有學生在今次的 conference present， 哦。
唔理， 跟住lunch 約了一個中學的先輩， 她在附近番工， 今次番黎都未有時間找找她， 就用今次的機會喇， 反正酒店的食物都唔特別好食。 去了LCX一間餐廳， 幾好， 又唔太貴而且又幾舒服， 真的不錯的推介。
下午沒有甚麼好聽， 便和周さん行過去旺角買佢的燕窩。 行不算太耐吧（自己就行慣行熟， 唔知佢點諗了）， 去到那十幾樓的舖頭， 首先兩條友的共通語係日本語， 入到去舖頭的人都唔知點算好， 之後一路講， 開始分別用廣東語和北京語同舖頭的人傾計， 相信佢地會頂我地唔順， 哈哈。 最後也總算買了要買的東西喇。
好好， 去捐血喇！ yeah! 概然在旺角就近近地去那裏的捐血站喇。 出奇地少人， 唔知點解， 是但了。 最近每年也是在日本捐兩次， 然後在香港捐一次， 香港那邊也很好人的送了那個定期捐血章給自己， 今年那個粉紫色的， 一般啦。 小小的禮物， 算是給自己持續捐血的一種獎勵吧？ 好好， 下一次就三十次喇！
會合阿輝佢地， 去了旺角一間甚麼避風糖甚麼甚麼的東西， 還好可以避到那些蝦兵蟹將， 不錯的一餐。 之後上了些樓上 cafe， 見佢地打那隻 monster hunter 打得好開心， 自己都有興趣買番部 PSP， 不過， 是對其它 game 有興趣多些。 另外跟 Freddy 上了一課投資， 唔， 買樓完全係蝕的， 唔， 也終於知道甚麼叫窩輪（要查還是查到的， 不過沒有心機查）
延充實的一日呢。
2007/3/13 (火曜日)
IEEE WCNC その２
繼續IEEE WCNC， 今日自己不用發表， 同學暫時也未需要， 於是只是悠悠閒閒的去了聽聽幾個和自己的 research 有點關係的 presentation 喇。
午飯時間也是自己一個， 偶然的坐在兩個新加坡人中間， 再側邊的是南京人， 香港人， 還有澳洲人， 三種 language 横飛， 轉 channel 都想死， 講講下自己都試下講左些港式加日式的普通話， 結果當然係冇人聽得明。 一早講英文就仲簡單啦！
之後繼續回到會場， 見到昨日識的 helper 和一個美國人傾計， 自己走去傾埋一份， 延有趣的一個人， 之前他去過大阪一段時間所以都識得講日本語（！！！）， 和他傾傾三個地方的文化等東西， 出奇地投契， 之後去了看他的 presentation， 佢做埋 session chair， 幫了沒有來的人 present， 未免太好人了， 因為 official 的指示是人沒有來的話只不過丢空二十分鐘， 不過他的想法是唔想來了的人白坐。 他算是第一個自己有較深入接觸的美國人吧？ 今日在研究方面沒有新的 idea， 不過對人方面有了新的理解喇。
本來想去捐血， 不過唔夠時間， 衝入元朗和一個小學同學及阿嫂見面， 這個人都真係自信狂， 但和他一起相處又不太覺得不舒服， 或者是已經慣了吧？ 不過以他的年紀（即我的年紀）能有這樣的成就又的確抵佢驕喇。 在職場方面自己真的不能適應， 但這個朋友可算是去到爐火純青的地步（掛？）， 真的很不同的人生。 之後上佢屋企， 很有趣的史立莎女， 精力旺盛， 而且極之聰明， 很過癮。
2007/3/12 (月曜日)
IEEE WCNC その１
今日總算是這個月回香港的目的， 就是在這個IEEE的国際会議發表自己的論文， IEEE有每年舉辦不少的国際会議， 而這個WCNC就是其中一個喇。 不同的国際会議難度有高有低， 這個WCNC應該是中等程度吧？ Anyway 份 paper 叫做 accept 左， 都算係度自己一個交待。
首先到了Sheraton報到， 好像有少少唔知點咁， 自己拎了少少資料之後過了隔離的半島酒店準備， 因為很多論文要被發表， 自己就在其中一間房中準備， 插一插部 notebook， 沒有問題， 有點時間就在外面走走。 走了一陣就見到周さん同Sannさん。 之前仲唔知點聯絡佢地添。 好好。
同一個 session 入面有另外幾個人發表， 不過自己發表時都唔理得咁多， 到自己發表時， 大約有十幾個人聽吧？ 不是想像中的多。 發表沒有太大問題的完了， 被問了的幾條問題， 也可以喇。
之後一身鬆哂！ 非常重要的重擔在二十分鐘後完全冇哂。 開心！ 不斷的和朋友吹吹水， 其中今次有機會識到兩個 helpers， 一個係以前公司的老細的學生， 一個係 Gary 的學生， 世界， 原來真係幾細， 不過因為有共通的地方吧？ 出奇地0岩傾。 自己聽聽下 session 悶悶地走出黎搵佢地傾下計也不錯。
下午 lunch hour， 由於有三個吃飯的地方， 和朋友不能一起， 沒有所謂， 自己去了Sheraton的 sky lounge， 景觀一流！ 不過自己一個人就真係無無謂謂的， 搭檯時一起坐的兩位日本人， 嘩！ 突然好有親切感， 相信如果是香港人的話也會如此（當然大陸人的話就沒有東西好講）。 吹水吹水， 不斷的講講講... 真係有點興趣到他們所屬的 NICT 工作...
下午繼續聽下其它人的 presentation， 其實很多也不太明白， 唔， level 可能未夠呢。 算， 之後和周さん同Sannさん遊遊尖沙咀， 在外面食晚飯， Sannさん就理所當然， 不過就連周さん也很少吃這種台式料理呢。 不太貴而且也很滿足的一餐。
之後周さん先行回到酒店， 自己就和Sannさん坐坐小輪， 周圍影相咁啦。 似乎佢呢幾日唔會有太多時間周圍玩， 今日就帶他去玩玩吧。
2007/3/11 (日曜日)
番黎咁耐， 好耐冇打過羽毛球， 今次有人約， 點都要去玩。 去到體育館， 知道有另一班朋友都在打羽毛球， 首先玩了一舖。 有點懶都好， 塊拍真係重到鬼咁， 不過“朋友”真的幾勁， 打唔掂， 不過很好玩， 之後打乒乓波， 又係打唔掂， 真係完全唔得， 生疏哂。 是但了， 好玩就得喇。
之後去文小姐推介的“打冷”店食飯， M先生做主角嘛。 不過那間點睇都唔係一間打冷舖， 唔， 雖然都幾好食喇。 最有趣的還是S先生那些食字IQ題。 不錯不錯。
明日開始国際会議， 唯有早點回去休息了。
2007/3/10 (土曜日)
久違了的 Japanese Cafe， 自己去日本前除了片岡先生之外真的沒有甚麼機會說日本語， 而這裏雖然是一間公司， 卻出奇的親切， 而且在這裏真的知道了不少東西。 今日成功過了日本讀書， 每日也有無限的機會說日本語， 不過現在和了香港三個星期， 真的有點封印了呢！ 也為了見見那些 staff， 於是和一個朋友上了去。
一路以來也在的N大姐和K店長也在， 還有其中一位未見過的人。 anyway 今日的參加者甚麼人也有， 年紀大的人似乎也不少， 而今日所說的話題是日式的婚禮， 自己就沒有參加過， 不過之前偶然在鎌倉見過就是了。 一個感覺上非常嚴肅的儀式， 外面卻有一大班圍觀者... anyway 講到理想的婚禮時， 真的有點吹水吹過頭， 兩位很特別的參加者（用另一個形容詞說， 就是騎呢）， 一個話 BBQ 婚禮， 另一個話杯麵婚禮， 真係估唔到， 這種唔合常理的想法， 從來也沒有在自己的腦中出現過.... 完了之後
之後先和朋友在附近吃車仔麵， 好耐冇食過喇！ 有點感動！ 不過有點唔知好嬲定好笑， 呢個朋友不斷的笑自己的口頭蟬「まあ、いいや」（是但的意思）， 唔， 唔， 唔， まあ、いいや
之後去到元朗再會合一個朋友， 唔， 一個很重要的朋友喇。 做的東西就沒有特別， 食飯食糖水行行街逛逛書局咁啦。 唔， 怎樣說呢， 之前有些東西不是太清楚， 直到今日兩個人也沒有再提。 就連相關的東西也沒有提過， 心裏其實很想問問的， 不過另一方面自己又打算讀 doctor 的話， 或者清楚一點比較好吧？ 不過今時今日又更加難以啟齒， 在這方面真的有點自己也看不起自己， 想點呀！
2007/3/9 (金曜日)
下午和了阿姨加老媽子食飯， 去了元朗的泰國餐廳。 下午叫了幾個小菜食， 其實都幾大食。 唔理了， 偶然一餐都沒有問題啦。 講開這間餐廳， 連兩個泰國人都讚的話， 真的幾有水準呢。 唔知如果去之前和朋友去的兩間的話佢地又有乜感想呢？
回家休息一會之後就由新界西走去港島東的林宅， 先到了太古會合朋友Mさん。 不過被佢點了去另一個出口的情況下完全唔知點好， 後來好在有地膽教路。 水族廣場， 第一次來呢， 雖然對魚毫無認識， 不過只是看看有時都幾開心的（唔好叫我養就得）。 之後等多位朋友H君之後就走上林宅， 開門兩條有驚搵錯門結果閃了去後面， 唔會掛？ anyway 開門， 見到位印庸， 之後就見到家裏另外三人－－ 林生， 林太， 還有... 林小BB。 很有趣呀！ 最有趣的是這個小朋友在Mさん打算接近時就會即刻咸， 而我和H君都冇事先好玩! 很可愛。 後來E君上黎一齊玩， 都係冇咸， 証明了異性相吸是錯的。 呀， 還有還有， 很多謝林生林太的招呼呢！ 食物很不錯喇！ 這麼快有一個幸福的家庭， 真令人羡慕。
2007/3/8 (木曜日)
一個例牌的活動， 就是回到香港火雞大學玩。 實在很久沒有去了。 首先就去到中菜廳（南北小廚）， 會合林氏夫婦， 一對自己當時有份撮合的夫妻， 見到他們如此自己都幾開心。 不過講下講下發現他們連仔都有了！ 啊！ 聽日一於上去佢屋企睇下玩下。 另外林氏夫婦補擺酒， 六月， 唔， 非常困難的時間呢。 不過真係唔知點樣拒絕， 算啦。 到時先算。
之後好彩仲有利是， 勁開心。 之後在走廊見到 Gary， 可惜佢要開會沒有時間和他慢談。 諗住走的時候見到一個以前的 EE 同學， 而家都讀緊 PhD 了， 吹水吹水， 講下閒話講下日本和香港做 research 的分別， 發現一個幾大的分別在於錢。 自己在日本， 或者起碼現在的學校或是研究室， 基本上可以做到有 paper 出就可以俾錢去 conference （好似今次番香港咁）。 香港就未必有咁多錢可以用， 而家講好似有些吃不到的葡萄， 不過起碼而家去到的時在科大時代之前已經想去的地方， 這樣的人生已經沒有甚麼可以挑剔吧？
之後番出去， 幫朋友買電腦。 唔， 突然改了 budget 的關係整了部非常基本的 config， 等等等， 好慢， 一路等時後面那班砌機的人發非常低能的笑話， 真係想打佢地...... anyway 叫做買好部機， 都總算完成任務喇。
2007/3/7 (水曜日)
在家中呆了一整個下午， 夜晚去了旺角食飯， 所見的一位朋友是和自己幾熟的人， 可以講秘密的那種人呢。 結果提到的一些家中的麻煩事。 本來真的沒有打算說太多， 不過這種事情一開了口就口若懸河的不斷的說說說， 有點說得太多的感覺。 心裏明白說了對事情沒有任何幫助， 不過心底裏或許想得到一些認同， 又或是希望得到一些意外的觀點...
繼續看上帝之死， 或者跟本不明白那份文章。 每隻中文字也認識， 或許有些專有名詞不明白吧？ 但那文章怎樣看也覺得是把原文放入 google translate 譯出來一樣， 跟本就不是中文來的。 但文章問題以外， 裏面的理論， 某些東西自己也有想過， 不過比起自己所謂的反基督的思想， 尼采所說的實在是完全不同的層次， 完全沒有想過的不計其數－－儘管現在還有許多不明白的地方。
2007/3/6 (火曜日)
回了香港差不多二十日， 差不多全部日子也是浪費時間， 唯一一樣滿意自己的， 就時突然重新拾回一些書卷氣， 或者是一種逃避實際需要的工作的方法？ 算， 最起碼不是完全浪費時間就好了。 今日看完那本“系統思維”， 另外一口氣買了兩本新書－－“上帝之死 反基督 (尼采著)”和“醜陋的中國人（柏楊註）”， 兩本之前想看很久的書。 有想過去圖書館借， 不過還是買下去看吧？ 哈哈， 兩本都是一些比較具批判性的書呢。 上帝之死看了少少， 不過， 由於翻譯的問題加上本身對背景知識缺乏的關係， 完全睇唔明！ 撞鬼了。
會合舊同事， 去了尖沙咀的一間韓式餐廳， 雖然自己提議的， 不過有點點後悔（當然沒有說出來）， 因為自己好像有點點熱氣， 昨晚還少有的流鼻血！ 雖然很快便止了血...... 不過應該沒有大問題吧？ 傾了很多不同的東西， 尤其之後講到關於 design 一行的種種東西， 雖然和自己無太大關係， 不過都好像幾有趣的， 有趣在香港也好像有意外地多的人材呢。 講下講下， 已經十一點幾， 番到屋企差不多一點！ 時間未免過得太快呢。
2007/3/4 (日曜日)
和一大班朋友去天水圍的濕地公園， 在天水圍的校園生活長達六年， 卻沒有想過這裏會有這樣的一個旅遊點。 今日的主要目的是幫兩個朋友慶祝生日， 不過其中一人未到， 另外搞手也因事遲到， 結果一行五人先入去公園。 和自己想像的出入甚遠。 環境本身絕對是不錯的， 設計上也算是盡量自然， 只用了最少限度的金屬。 不過那種人頭湧湧也是出乎意料的， 甚麼大廈的旅行團等， 內裏總有一些鍾意吹水但唔鍾意用腦的人。 甚麼這個濕地公園可以起唔知幾多樓等等。 算， 這些人理得多都無謂， 自己望望周圍的景色好過。 反正那些人全香港也是， 只不過是平時帶着耳筒聽唔到。
之後再會合另一位壽星後到了一間泰式餐廳吃晚飯， 外面的環境很不錯， 不過和自己沒有大關係， 坐了在裏面的座位， 很多人， 食物很好吃， 部長態度好差， 不過熟我的人都會明白， 如果係一大班朋友的話這些東西通常都唔太介意喇， 最多係下次黎唔黎會再考慮一下咁囉。
題外話， 電視上提到九型人格， 晚上無聊做了一個 test， 發現自己屬於第一型的改革者。 理想主義加上有點清高？ 哈哈， 不過個 test 得三十條問題左右， 未敢肯定自己是否真的是這類了。
2007/3/3 (土曜日)
下午先到朋友屋企 certify 部電腦， 機都開唔着， 雖然換下版換下 CPU 或者有得救， 不過身邊沒有零件， 朋友又有打算換機， 再加上自己都唔太夠時間慢慢睇， 所以早些幫部機安樂死算了。 去元朗走走， 一路看新電腦一路傾下自己最近一些問題， 延煩人的。 不過沒想到這位朋友就連當年中三四時自己的一些感受都仲記得， 心裏總有點感激。
之後去了家姐屋企玩， 主要也是望望她繼剛嫁的老公之後的新竉－－金毛尋回犬是也。 才三個月大， 不過已經比起家中十一歲的肥狗巨型了。 現在仍然訓練中， 不過總之就有趣喇。 之後四個人去了樓下的餐館打邊爐， 質素唔錯， 最掂係那些生蠔， 任食唔嬲， 當然同你搏命了。 之後繼續悠悠閒閒的， 看看相吹吹水， 又一日。
2007/3/2 (金曜日)
也是探訪中學恩師的一日。 不過見有點時間， 先到深水埗看看東西， 之後記錯時間， 以為六點半集合， 所以早得濟去到旺角。 哎呀呀， 發傻。 沒有所謂了。 在旺角走走。
之後會合了Pくん和他女朋友Sさん後坐車到林老師的家中。 差不多每年拜年都住唔同屋企咁的， 相信問佢搬過幾多次屋的話佢應該會答錯。 是但了， 時間關係只是吃了一餐飯， 吹吹水。 有趣的是他們家中有一盒曲奇餅， 佢地三個人都食唔出乜野味， 本着挑戰精神一試， 一試之下不禁問一句“係唔係頭先餐飯一些蒜頭味剩下？”， 三人突然恍然大悟的樣子.... 哈哈， 有趣。 而家諗番轉頭， 應該係因為蒜頭其實是我自己煮野食時用得最多的材料之一， 所以特別認得吧？
2007/3/1 (木曜日)
休息日。 連續幾日都食飯， 今日都真係應該抖一抖。
晚上Pくん send 了一個 MBTI 的 test (關於 MBTI 請參閱 wikipedia )， 見無無聊就玩下啦。 得出的結果， 發現自己是一個 INFP (Introvert, iNtuition, Feeling, Perceiving， 亦即內省， 直覺， 感性， 感知)， 熟識我的朋友可以自己諗下喇。 講真大部份也偏向中間， 除了內省和直覺方面叫高少少吧？ 所以關於感性和感知還是可以不理吧？ 內省和直覺， 自己都覺得係架。 不過那些問題都問得幾直接， 所以唔準就反而奇怪呢？