2007/11/30 (金曜日)
Research 的進度比想像中好， 不錯。 希望下個禮拜可以 keep 到啦。
夜晚去廣東話班， 今日來了一個香港人 K 君， 港大精算系出身， 而家在這裏的保險公司做緊野， 後生可畏。 Overall 也算幾有趣的一個人， 唔。 雖然還不算認識太深喇。 不過之後也希望佢多些黎這個廣東話班坐坐呢。
夜晚突然興緻， 把機裏面的新 harddisk 重新 partition， 順手移左個 /home mount point 過檔。 完全沒有問題， 才幾個 command 就搞掂。 我都有點覺得自己好厲害呢！ 哈哈。
2007/11/29 (木曜日)
晚上又再陪 Madu 去賣電腦， 今次佢帶埋爛鬼 Office 幾隻碟， 照上次的價格來說應該可以多番 10000 円左右吧？ 放低部機 check， 等左一陣之後， 唔知點解多左二萬幾？ 後來 check 番， 冇左的 Floopy drive 由上次減 12000 到今次減 500， 差天共地。 完全唔明白。 不過多錢收就唔理太多喇。
無端端比預期中多錢收， 於是有人請食飯。 去了就近的 soup curry， 不錯。 不過仲諗住 Madu 食得辣， 點知 level 5 佢就話辣.... (中辣的話大約是 level 3， 最辣可以有 level 100)
2007/11/28 (水曜日)
戦利品:
ながされて藍蘭島 DVD 5
朝早又去教小學。 不過今日小息時沒有回去校長室休息， 留了在課室附近陪班小朋友玩。 原來都幾好玩的。 最突然的係有兩個女仔走過黎， 其中一個話「この子ね、先生のこと好きだって」真係嚇左一跳， 有點唔知點應好的感覺。 -->之後有點時間， 去了附近的電腦舖行行。 又冇特別東西買....
之後繼續 research， 又一日。
2007/11/27 (火曜日)
過了一日的 research 之後， 陪了 Madu 去 Sofmap 賣 notebook， 沒想到一陣間就之道價錢。 於是就在店內打發時間， 反正平時無所事事的時候都會走黎行。 之後查定結果， 部 notebook 只值 23000 左右， 其中因為冇左 Office XP install disc 同埋 USB floppy drive 所以減左二萬幾。
呢兩件垃圾值二萬幾？？？ 真係唔係好可以接受！
事實歸事實， 問番 Madu 垃圾一的 Office XP 好像放了在屋企， 於是第日再算喇。
夜晚， 成功 convert video 去 PSP， 雖然係煩左少少， 總算成功喇。 唔係好明點解唔可以用 mencoder 一嘢過搞掂...
2007/11/26 (火曜日)
繼續做 research， 突然的好像有點方向性似的。 雖然， 始終睡魔的誘惑從來沒有停過...
之後也是遁例的 COE lecture， 也是講著作權等問題。 本身這個問題其實幾有興趣的， 不過那位大叔真係悶得要命， 雖然今日也盡最大努力讓自己唔訓着。
完了 lecture 之後即刻衝去新宿， 會合幾個廣東話班的學生食晚飯， 這間餐廳甜品任食唔嬲， 不過就有個很奇怪的 rule， 就係男性一定要有女性陪同先可以入...
...
影貼紙相咩？
不過好食就得， 還有可以利用這個規距作為約女仔的藉口？ まあ。 點都好， 甜品生果還有熟食特種類也算夠多吧？ 而且也幾好食， 價錢也不算高得去邊， 有機會真係應該再黎食下喇。
2007/11/24 (土曜日)
很當然的新屎坑， 新入手的 PSP， 當然就唔理戶外戶內都要玩盡佢啦。 不過又真係幾好， 坐車的時間就“縮短”了不少。
應朋友的招待， 去到平時唔多點去的上野， 和羽毛球友Kさん走了幾個圈， 去埋 Tsutaya 租電影－－無間道。 前一排電視好像播了無間道II， 所以佢突然有興緻睇無間道I， 也好， 自己也想看看配音版會係點樣。
於是晚上四個人就一路的吃朋友煮的泰國料理， 一路的看無間道， 一路的吹水。 話時話無間道配音裏面最奇怪的應該是韓森把聲吧？ 本身曾志偉的聲線比較高， 但配音那位阿叔聲線卻很沉， 完全兩回事。 其它人都還可以喇。 Anyway 不錯的一晚。
2007/11/23 (金曜日)
駒場祭
戦利品:
PSP
上個禮拜才認識的友人Cさん的邀請， 今日去了東大駒場 campus 的駒場祭， 平時黎都係打完羽毛球食 Itanlian Tomato， 今次來參加駒場祭， 心諗， 乜呢個 campus 有咁多人的嗎？ 唔。 點都好啦。
其實校園祭好多時都係飲飲食食， 同埋吹水咁啦。 Anyway 這位澳門朋友Tくん， 之前也說過是遲我一屆拎 scholarship 過黎日本的。 而佢今日帶了個“前輩”， 即早佢一屆拎 scholarship 的一個人.... 咪即係同我同屆？ anyway 總算有機會再見面， 不過， 唔認得... 完全唔同樣呀！ まあまあ....
駒場祭， 其實真的和其它的校園祭大同小異， 對我來說始終也是志在吹水喇。 不過有個 Planetarium， 都幾有趣， 氣氛也很不錯喇。
之後同屆的澳門人去了幫其它人手做野， 百無了賴的， 決定同Cさん到附近 McDonald 吹水打發時間， 認識的時間真的很短， 不過話題又出奇的多。 感覺很不錯喇。 んんんん…
之後再和Tくん會合， 到附近的一間拉麵食晚餐。 都幾大碗， 也算係幾好食喇。 講開拉麵， 今時今日都未去屋企附近的吉村家食過， 次次去到都有成十幾人排隊...
回到家之後， 發現昨日買的 PSP 已經送到了！ 於是即刻去郵局拎， 也即時開始玩。 唔。 二手的東西嘛， 算是比期待好， 畫面有點花， 不過電池沒有問題， 操作也沒有問題。 合格吧？ 即時開始 TOW...
2007/11/22 (木曜日)
戦利品:
テイルズ オブ ザ ワールド レディアントマイソロジー
朝早出了去渋谷， 傾關於一個廣東話班的東東， 順手吹吹水。 之後突然有興緻行下那裏的 Bigcam， 結果都係冇乜特別。
以自己來說算遲吧？ 終於都買 PSP 了， 不過也是 auction 二手機喇。 但機都未送黎， 夜晚就很快手的買了 memory stick 和 game 等。 唔。 聽日或者後日可以玩了吧？
2007/11/21 (水曜日)
朝早的時間大概也在發傻， 認真諗下這日做過乜， 諗唔到...
下午有個 visiting professor lecture， 基本上悶到飛起。 不過佢講野就好搞笑， 每句句尾唔知點解都會加個"yea"在後面... "He is really a strange professor.. yea"。
2007/11/19 (月曜日)
回復正常的一日。 唔。 怎樣說好呢， 之前兩日都要去 course， 雖然唔係太難， 甚至可以說幾好玩， 不過始終都要唔少精力喇。 所以嘛...
今日 research 的進度都係麻麻地 < 藉口？
另外， 上完 GCOE lecture 之後， 山中先生請食飯， 雖然只是飯盒， 不過有個機會幾個 RA 一齊吹下水講下無謂野其實都唔錯。 當中也提及 GCOE 的一些發展大計(?)等。 唔。 有點點努力的動力呢。
2007/11/18 (日曜日)
繼續昨日的小學教育 training (?), 都係去四谷， 今日的講師阿部先生， 很有趣的一個人。 對住一大班廿幾三十歲的學生， 就好像教小學的， 唔， 不過參加這個 program 的人相信心境都很後生吧？ 成班人就像小學生的， 一路玩遊戲一路學一些技巧。 相信對自己本身教小學都會有幫助。
另外在這裏有機會認識一位澳門人， 傾下傾下發現佢都係拎 scholarship 過黎， 不過係 undergraduate 咁解。 由於都係講廣東話的關係， 特別投契。 日後食飯又多個 partner 喇。
上完 course 一班人去了附近的居酒屋懇親会， 我那檯好像沒有甚麼東西好傾咁添， 始終成班人都冇太多機會傾計。 運氣唔太好吧？ 之後回到家， 即時死亡... 週末始終都想休息多些嘛。
不過今日點講都好， 可以認識到那個朋友的確是很大的收獲。
2007/11/17 (土曜日)
英語講師講座 その一
一朝早起身， 幫個朋友預約 idol master 的超限定版， 咦？ 個網又好番喇喎。 咁即係 OK 啦。 好好， 總算完左朋友的一件心事。
之後出發去四谷， 英語講師的 training, 主要是一大堆說明喇。 由協會的背景， 去到小學校的教育， 小學生的心理等等都有提及。 幾有趣的
不過坐在隔離的一個印尼女仔， 十足十我研究室裏面的 F 君， 只不過 F 君係男仔而今次的係一個女仔。 就係咁多。 另外有個馬來西亞人， 識講廣東話， 自然也有多些話題。
今日都識了延多人的。 應一個朋友約到高田馬場那邊食廣東菜（好懷念！）， 介紹左三個朋友俾我識。 其中一個， 望下望下， 唔。 有點似堀江由衣（？）！ Anyway 都係志在吹水， 吹吹吹， 都總算幾開心喇。
2007/11/16 (金曜日)
試圖改良自己的 program， 因為之前有不少 parameter 都未加。 而且唔係 Object oritented， 改少少地方就全世界都要改。 終於明白 OO 的好處。 Anyway 改完個 program 都算到行到， 不過 result 就奇奇怪怪的。 要慢慢 debug 添。
下午又去 K2 campus， 也是做些諗唔通的東東－－ 將紙皮箱的 label 撕走， 就係咁多。 這些工作用不着幾個 PhD 學生做吧？ 就連 professor 都有怨言。 唔。 不過撕然之後諗買野（K2 campus 的設備）， 唔係自己錢都真係諗得特別豪。 包括了按摩椅， PS3 等諗唔明的東東...
之後走人。 去廣東話班之前， 第一次的上了網吧。 因為要幫個朋友訂限量版的 idol master， 諗唔明， 六點開始預訂， 時間真的唔湯唔水， 一到六點鐘， 想話㩒制走人啦， 點知個網死鬼左。 冇計。 夜晚番到去都係死。
夜晚廣東話班之後和其中三個同學去了食寿司， 任食唔嬲， 食到個肚都真係再食唔到其它野。 勁好食！ 不過當然埋單都唔平啦。
2007/11/15 (木曜日)
朝早番學校做少少野， 其實都真係做唔到太多野。 之後食完飯， 去影集體相（卒業アルバム用）， 跟住加上人齊， 於是就在今日提早慶祝笹瀬先生的生日。 一大班人番 lab 到切蛋糕， 還不錯的。
之後想回復番 research mode， 完全失敗， 一直的釣魚...
晚上滿有期望的去買個 figure 箱， 結果， 唔啱 size... 失敗。
2007/11/14 (水曜日)
朝早去教小學， 沒有太大特別。 不過成日都會諗， 每次連自己在內有三個人在等學生叫自己上去， 但好似次次都係我最遲的， ，唔知點解， 雖然完全唔係一個大問題。
之後做自己的 research, 進度都係一般， 就係點都唔可以出到全力。 沒有辦法， 我這個人就係要借助 deadline effect 先得咁。 另外一個十年前在這個 lab master 畢業的 Professor 黎 visiting, 坐了在自己隔離（理論上啦， 而家自己多數都去另一個 lab)， 之前都見過佢一次， 今次似乎有三個禮拜會見到佢...
晚上到渋谷食飯， 應承左朋友Eさん食飯喇。 食的是不少香港人都很熟識的小肥羊。 自己以前在香港都係食左一次定兩次， 不過都記得係幾好食的。 Eさん望住小肥羊個 logo， 突然話覺得隻羊好似我... 下？？ 唔係掛？？
於是整晚也就吹了不少水， 其中有趣的， 是知道一些關於當年申請獎學金的內幕。 這個文科省獎學金， 真的可以說是三顧草蘆， 第一第二次都衰左的。 但問題就係這兩次點衰法呢？ 冇人知。 不過今日總算知道了... 每年推薦四個人， 而自己呢？ 在這兩年也好似排第五第六咁？ ... 總之就係差少少啦。 真係可惜。 不過第三次好似 interview 成績係最好， 也總算沒有浪費之前的經驗喇。 唯有在這種時候才明白最老套的“失敗乃成功之母”....
2007/11/13 (火曜日)
心諗要快手些去趕 research， 不過今晚約左牙醫， 又諗起係時候捐血， 於是就被捐血站吸了過去。 入到去， 就和平時一樣的填 form， 不過填完之後個 staff 就問左句
今日有冇時間？
係？ 乜事？
如果可以的話想你做成份捐血。
哦！ 話時話真係未試過， 在香港好似得京士柏有得做成份捐血。 黎到呢度， 又唔駛預約， 點解唔做先？ 於是就一口應承。
成份捐血嘛， 簡單地說就是先抽血， 然後抽出來的血會份離成為血槳和其它部份， 其它部份就會送番入體內。 這個過程大約要 40 分鐘吧？ 感覺上和普通的捐血差唔多。 不過那些其它部份走番入去時， 因為是室溫的關係， 感覺涼涼的怪怪的， 幾過癮。
而最重要的， 是三個禮拜之後又可以捐血喇！ 好嘢。
回學校都已經午飯時間， 做少少東西之後就要去睇牙醫。 話時話最近大牙有點痛， 總是覺得係智慧齒作怪。 不過檢查結果嘛...
大牙應該冇問題喇。 不過刷牙始終都未夠乾淨...
係？？ 唔。 佢咁講冇理由唔信喇。 不過真係奇奇怪怪的， 算了。 唔理咁多。
2007/11/10 (土曜日)
果然係雨男， 想去玩都一定落雨， 完全諗唔明。 Anyway 今日約了一個朋友Kさん去中華街食嘢， 落雨嘛， 唯有在室內食飯吹水咁啦。
今日去的一間廣東料理， 自助餐也！ 以中華街的標準來說， 才千六円的價格簡直係冇得彈。 一口氣拎左唔少野食， 一齊的朋友都嚇親。 不過一路吹水一路食， 食食食， 食左一段時間也總算食哂。
之後慢慢的行下中華街， 平時黎這裏都係食完就走。 好少可慢慢行這裏的舖頭。 有些舖頭其實都幾有趣的。 行左一陣之後， 去 MM21 那邊飲些東西。 那裏嘛， 與其話係一間 coffee shop， 不如話佢係一間煙房更加實際。 好多人入到黎買一杯咖啡， 跟住就連續地煲三四支煙。 真係諗唔明呢班人諗乜。 不過話時話 MM21 多了些禁煙區。 唔通有些關係？
在 coffee shop 裏面Kさん給我看了之前佢去平遙時的相， 算是保持得幾好的一個地方。 不過更加有趣的係佢那本旅行日記。 圖文並茂， 而且畫也畫得很可愛。 覺得係整理一下就可以出書那種囉。 畫裏面會有路人甲乙丙丁， 全身黑色。 好像在那裏見過... 唔...
コナン裏面的犯人？？
好搞笑。 看了很耐， 看完也差不多晚飯時間。 就在附近食一間咖喱烏冬。 很不錯的一間舖頭。 就咁就玩左一日。 不錯不錯。
2007/11/9 (金曜日)
朝早回到學校， 時間唔湯唔水咁， 結果差唔多乜都冇做就冇左個上晝。
有乜事做呢？ 就係要去做傢俬佬。 都唔明點解。 理論上另一個 campus 有一個專俾 GCOE RA 的 lab， 如果申請的話可以用那間房。 不過一個人而家都有兩頭“住家”， 一個在自己的研究室， 一個在 PhD room， 仲要多張檯黎做乜？
不過叫到， 幫手砌檯砌椅也並無不可。 於是一行人坐車去 K2 campus， 一大堆傢俬， 當然係未砌的狀態。 於是砌砌砌， 工具都唔多夠， 開始有點倦意時， 負責的Y小姐走了來， 說了句令人意志激昂的說話:
唔該你地將些紙皮箱拆開壓好等清潔的人好做些
... 砌傢俬要搵男丁都算了。 拆紙皮箱這些工作唔係應該搵其它人做咩？ 第一本身我地黎幫手已經係盡哂人情， 最低限度買支水過黎飲飲都好丫？
算了。 做到五點幾左右， 由於要去教廣東話所以早了點點走。 教得比較順利， 沒有太大問題。 不過拼音真的要搵時間認真學。 上完堂去食飯， 講了很多東西， 頗為開心的一日。
2007/11/8 (木曜日)
GLPK 總算叫做到些東西了。 寫了最基本的 variable， syntax 也總算 OK， 算係解到最基本的問題。 不過還有很多問題未解決， 很多 variable 未 set， 還有很多 constraints... 唔。
2007/11/7 (水曜日)
朝早教小學去也， 對住小學生， 比起尋日對住那班大陸團完全兩個唔同感覺。 真開心， 另外和其中一個家長傾開私人教授， 自己完全唔合格.... 點解？
因為日文講得太好
沒有辦法， 似乎佢想找個人差不多完全唔識日文。 可以介紹 M 君給它看看吧？
在小學食完野之後， 和教另一班的一個印度人一起走。 這個人也算是一個幾好傾的人喇， 之後佢突然邀請自己去佢屋企坐坐， 偶然一次也好吧？ 兩個人住的房間來說不算太大， 不過沒有所謂喇。 但坐了一陣， 佢就突然問我介唔介意佢食煙。 完全的不意打ち
“冇所謂， 呢度你屋企嘛”
バカ！！ 死蠢！！連個 NO 字都唔識講架！ 唉。 雖然除了煙之外也沒有太大問題....
Anyway 回到學校， 繼續做 research 的東東。 冇乜進度添。
2007/11/6 (火曜日)
今日都係 workshop， 尋日係法國的リヨン大學， 今日是西安交通大學。 基本上都係悶到嘔， 加上影相的工作被搶走， 更加悶。 不過也不是完全沒有得著， 今日有機會看到這個世界最差的 presentation， 簡單些說就是將論文抄落去 Powerpoint slide， 在 Page 8 突然用 (1) refer 番去 Page 3 的 Equation (1)， 文章完全照抄照讀。 好野！
另外這個 workshop 相信大部份 RA 都不想參加？ 但莫明奇妙的憤青自發參加， 都唔太難明喇， 總之同大陸有關的東西佢都有興趣喇。 就連夜晚的 party 都不請自來， 我就早些番屋企訓覺好過
2007/11/5 (月曜日)
整日也是 Global COE workshop, 晨咁早番去， 無限 presentation， 去到下午再加上自己的 poster presentation， 理論上係悶足全日， 不過之前突然有 mail 叫自己幫手影相。
Yeah! 影相！
影相佬嘛， 就係可以在會場走黎走去企唔安坐唔定， 不過那部 Canon 真係唔太好用， 而且影左半日就冇電。 之後出動私伙機， 効率即刻高了十倍， 完全得心應手。
晚上的 party， 算很不錯， 除了影相之外很多時間也是和一個名古屋出身的人吹水， 講左很多東西， 都唔記得講左乜喇。 不過記得的係佢教左自己兩句方言： 一句いっこか， 即"Let's go"， 一句ケッタ， 即單車， 哈哈。 有趣。
2007/11/4 (日曜日)
很多香港人來日本旅行時都會提到所謂“宮崎駿博物館”， 正式來說應該是“ジブリ美術館”， 這個位於三鷹的美術館， 應該是宮崎駿 fans 必到的地方吧？ 不過來了日本兩年有多， 今日才踏足這個地方， 大約也知道自己 fans 度有幾高吧？ 他的作品也只是看了幾套， 不是朋友叫來的話今日也不會來。
點都好， 到了這個美術館， 不愧係周末， 很多人一家大細的走來， 有來過這裏的朋友說這裏其實是宮崎駿的貨倉， 也錯不了去那裏。 這裏由菲林到他的畫具甚至煙頭也有， 很能夠重現那種工作室的環境， 另外一些關於動畫的製作， 也是今日才有機會大開眼界， 尤其係以前未有 CG 時， 逐幅逐幅的圖畫， 可見這些動畫“技術上”的價值。 加上劇本等“靈魂上”的價值， 實在嘆為觀止。
很快就入黑， 沒有辦法之下走人。 去到渋谷食野， 食完之後走了出天台， 夜景真的一流。 不過影唔夠兩張相就有 security 趕自己走... 真掃興。 不過也好喇。 玩足一日。
今日的相， 不過館內唔可以影相所以影唔到好多
2007/11/2 (金曜日)
ふれあいフェス
朝早晨咁早去參加木月小的ふれあいフェス， 天氣也算不錯。 今年第二次參加， 也是負責英語那部份。 手辦眼見工夫， 不過和這些小朋友玩真係幾開心的。 另外有位家長都和自己吹左好耐水， 這位媽媽以前好像做過旅行社等工作， 去過唔少地方旅行。 講下唔同地方遇到唔同的人都幾開心。 另外上年教的一個二年級生， 今年三年班開始負責攤位， 正正就是英語活動的攤位。 小朋友真係有無限的 energy！ 厲害！ 而這位小朋友又特別 smart， 有時又好鬼馬。 真係開心！
玩足一個上午之後， 食埋飯都差唔多要去幫手 setup 下個禮拜會場的東東， 完全冇時間做自己野。 算了， 有機會接觸多些其它 lab 的學生也未嘗係一件壞事。
夜晚廣東話班。 大致也算是順利吧？ 不過被問到點解炒魷魚＝解僱， 真係唔識答... 之後食老麥， 好少可食， 唔， 真係偶然一次都還可以吧？
2007/11/1 (木曜日)
在 PhD room 那裏， 基本上同一個 office 差唔多樣， 左幾個 partitions， 每個 partition 坐四個人咁。 而呢個 PhD room 基本係應該 keep silent， 理論上要傾計的話就要走出去或者去discussion room。
而自己個 partition， 斜對面坐了一個印度人， 最初都冇乜野， 多左個人最多都係視覺上多左些東西咁。 但係越坐就越發現嗅覺和聽覺都受到這個人影響。
嗅覺其中之一， 就係這條友煲煙。 自己對煙臭一向都比正常人敏感。 所以坐佢附近對自己來說係幾大獲。
聽覺方面其中之一， 這條友在這個唔可以傾計的地方 voice chat， 離哂譜。 撞你個鬼。 靜 D 啦！
上兩段都寫了“其中之一”， 換言之就係另有攻擊啦。 有甚麼係嗅覺同聽覺同時攻擊呢？
...
...
砵砵 pupuupu ぷぷぷぷぷ
冇錯， 條友在這個特別靜的地方放屁。 放完之後都冇乜反應， 就好似係自然的事似的...
想像一下在圖書館有人放響屁？ 再諗下自己就在這 source 的半徑米之內？
乜 mood 都冇哂。 撞鬼呢條友...