2008/1/31 (木曜日)
B4 的 final presentation， 結果冇出現， 只是在 lab 到精神上支持 ヽ(´▽｀)/へへっ
之後一路的做自己野， 都不少雜務要處理。 做下做下， 都差唔多要出發去今日的慶功宴喇。 慶功宴中也是照慣例的吹水， 見慣了也唔覺得有乜野。 唯一沒有的是那些バカバカしい的灌酒， 這點有少少意外， 不過好事就由得佢喇。 另外特別有兩個 M2 之後都唔知有幾多機會見到， 這兩年來吹了不少東東喇。 之後真係唔知會點。
2008/1/28 (月曜日)
一朝早去了立川的第八小学校， 英語講師的實習。 老實講， 幾遠... 不過一個未黎過的地方， 比起都心或是横浜都很大分別的地方。 一句講哂：視野夠闊！ 但又唔算係鄉下地方喎。 尤其那架モノレール， 平時都真係冇乜機會見。
實習其實都好簡單， 和之前一路去木月小的情形差唔多。 不過今次自己完全係幫另一個講師手咁解喇。 之後有點時間和校長傾下計， 很放鬆的時間。
之後肚餓， 就到了立川中華街， 試試那裏的東東， 今次食的是一間上海菜館， 普通的一道小菜， 水準又的確幾好。 不過這裏真係唔知幾時會有機會再黎喇。
之後番 lab 做 report 等東東， 呢排顧住監考， 都冇乜時間做正經野添。
2008/1/27 (日曜日)
約了一個朋友出黎， 一來朋友有手信俾自己， 二來順手一齊去買少少手信給屋企人。 先去了東口的ロフト， 總算找到一件想買的東西。 但另一件那時才想到的， 就要番番去西口那邊的 Tokyu Hands 買。 點都好啦。 買到就得。 之後一場黎到， 就在 Tokyu Hands 三樓的喫茶店吹左陣水。 偶然這樣也不錯喇。
之後也是らき☆すたモード。 大概也明白個故事發生乜事。 不過還是喜歡那些簡簡單單的氣氛。 有機會再講。
2008/1/25 (金曜日)
朝早監考， 沒有甚麼特別， 慣左之後其實都真係簡單到死的工作。 不過最大問題係始終人工唔夠高。 時薪雖然係 standard rate， 不過早間太多冇用的時間冇錢收， 結果計起上黎都唔算太吸引。 唔， 下個學期諗清楚些先。
之後 GCOE 的 interview， 有點點覺得搵黎搞的 interview， 之前又話剩係書類審査， 而家又要 interview， 不過本身今日都有 Luncheon， 所以都冇乜所謂。 Luncheon 嘛， 三個學生三個 Professor， 基本上三個 professor 自己有自己講， 偶然問問在座幾個學生問題， 真係唔知想點咁添。
之後回到日吉キャンパス監考。 最後第六節好像夠人的關係， 自己臨時 cancel， 因為如果唔 cancel 的話教廣東話那邊九成遲到。
夜晚去廣東話班， 很正常的一日。 沒有太大問題。 教教歇後語， 都算係幾有趣。 好過剩係跟書教嘛。
2008/1/24 (木曜日)
戦利品:
らき☆すた〜陵桜学園 桜藤祭
ながされて藍蘭島 DVD 7
一整日基本上都係 Madu 服務日。
首先去到學校附近幫佢處理保險等東東。 生協話本人唔識睇日本語的 terms 的話唔可以申請， 沒有辦法之下自己出去外面旅行社申請， 去到 HIS， 剛剛休息， JTB， 話冇 for 外國人的保險， 呀， 沒有辦法， 唯有試下 Keio Card 的附帶保險（後來發現都係唔得）。
之後出了去御徒町找 K ちゃん食飯， 順手拎寶石展的入場劵。 話時話都係第一次找佢出黎食 lunch， 平時又有幾可會出黎先得架？ 不過沒有太多時間， 吹陣水之後就出發去 Big Site。
再會合 Madu 之後， 入到 Big Site， 誰知今日點都唔開放俾個人參加者， 有招待劵都冇用。 諗極都諗唔到方法， 唯有再回到御徒町， 去K ちゃん介紹的舖頭睇下。 途中幾大風， Madu 好像有點就黎死的感覺？！ 哈哈。 我反而覺得剛剛好， 減多一兩度就最好。
結果行左十分鐘左右， 無功而回， 因為那間舖頭就正正在 Big Site 擺緊檔， 沒有辦法， 頭先 lunch 時都留意到附近幾多舖頭， 於是一齊去那邊碰碰運氣。 結果嘛， 都算係找到一些似乎可以的舖頭喇。 今日暫時沒有買， 不過也算是 mission complete 喇。 之後再去到 HIS 問好保險的東東， 要做的東西都做完喇， 早一兩個鐘頭的話仲可以去秋葉原行下... 冇計。
之後食お寿司， 唔覺意拎左舊納豆卷， 又唔想嘥野， 結果成舊吞， 絕對有想嘔的感覺...... 不過其它就幾好食喇。
一口氣買了兩大件戰利品， 講開黎らき☆すた那邊實在幾壯觀... セーラー服....! 不過隻 game 本身就好像幾有趣喇。 慢慢玩。
2008/1/23 (水曜日)
朝早落雪！ 嘩！ 黎咁耐第二次見雪。 打開窗簾望住外面的飄雪， 零舍開心。 不過對比兩年前的話， 今次沒有太多積雪咁。
Anyway 食完早餐執好個人之後， 今日要去日吉キャンパス做 part time， 唔。 兼職監考喇。 準備好相機， 一路行出去一路影， 不過都影左唔係好多相。 諗住留番 d 時間在學校影嘛。
去到火車站， 準備入閘時，
咦？ 銀包呢？
呀。 之前因為放了部相機落袋， 以為拎左銀包喇。 大件事。 銀仔都冇個想即時買飛都唔得添。 冇辦法， 唯有用最高速度走番屋企。 因為落雪的關係最初冇單車， 都唔理得咁多了， 遮都唔擔係咁衝， 迎面而來的雪粉， 痛！， 呀。 唔理得咁多。
番到去拎左銀包之後， 即刻冒雪踩單車， 由屋企去火車站的一段路基本上係落斜， 自己大約以30km/h衝落去， 唔駛講那些雪打在面上又係痛！
總算去到車站， 等車時都沒有甚麼大問題。 但上左車之後...
好鬼熱！
已經唔係常理可以理解的熱。 車廂唔算多人， 不過唔知點解車裏的空氣很差...
大汗踏細汗， 頭暈， 呼吸急促， 隨時隨地暈低都唔出奇的情況... 自己究竟發生乜野事呢？
中暑！？
唔。 始終自己唔太熟這些症狀東東， 可能不過係太攰...
唔知， 亦都唔理得咁多， 那時只係知道這情況下在這架特急電車裏面將會好大鑊， 一個唔覺意呢架通勤特急可能變成天堂特急（有部份誇張？）
意識越黎越弱， 大鑊！ 點都好除左件外套， 不斷的抹汗...
「菊名、菊名でございます。JR横浜線…」
距離横浜站大約六分鐘， 終於都開門了！ 正想逃離這個車廂時， 一陣涼風（一般人來說應該說是寒流吧？）吹入黎， HP 即時回復了 50%， 那樣的話繼續留在車廂都應該冇問題。
就咁去到大學， 出左車站之後那陣涼風實在超爽！ 落着少少雪， 體力也回復得七七八八， 同頭先比簡直係天到地比。
點都好， 在落雪時出現中暑現象， 我都真係要睇下醫生？
之後開始一日的工作。 今日在大學幫手監考， 工作很簡單， 首先派卷， 點名， check 學生證， 之後就冇乜野做。 很有聊的數下幾多人係用左手寫字， 唔。 意外的有少少呢。 考試完左之後公佈這個非正式結果。 另外 Professor 在試場也千奇百怪， 有人很認真的巡， 有人顧住睇書， 有人訓覺... Anyway 今日沒有捉到有人出貓喇。 咁又一日。
2008/1/22 (火曜日)
之前笹瀬先生叫交個 report， 自己做左自己（正確些說係一個走左的學生的 report）那部份之後， 誰知今日突然話要 group 其它的人的 report， 本來都唔係一件難事， 不過...
屋企冇 Word...
真係老套， Open source user 的話可以用 ODF， academic 的人可以用 Latex， 但事務那邊的人就只可以用 M$ Office， 麻煩煩的。 可以做的就係用 Openoffice 做好之後 export 出去， 再俾人幫手 check。 雖然唔係多， 不過夜晚就咁虚渡左。 真係有些唔抵的感覺...
2008/1/21 (月曜日)
也是會校處理雜務， research 真係冇時間做， 點解會咁多雜務的？
今個 semester 最後一堂 GCOE， 也是那個 copyright (C) 人， 因為今日自己有份負責所以坐了在最前面， 不過也是抵抗唔到這個 (C)的誘眠電波， 坐了在最前面的關係時不時被問及一些小問題， 唔知頭唔知路的， 唯有答“そうではね”， 典型最求其的回答...
呀， 仲要寫份 report 添。
2008/1/20 (日曜日)
戦利品:
らき☆すた 4
魔法先生ネギま! 21
完全進入昏睡狀態。 下午才起身。 沒有辦法。 之後下定決心做野， 為了專心專登拎部 notebook 出街， 搵間冇乜人的 family restaurant 慢慢寫。
結果周圍都多人到鬼咁， 行左幾個圈， 買少少野和做少少雜務之後就番左屋企。 沒有辦法， 在屋企的話就唯有靠 deadline effect (又黎？？)， 寫寫寫， 好在都唔駛寫太多野。 不過唔明的係唔太關自己事的論文點解要用咁多時間處理。 自己的東西都未做好...
らき☆すた話時話真係睇上癮， 大鑊， 之後唔知又有幾多錢要進貢俾佢了。 另外ネギま的新的世界觀也很不錯， 希望個勢可以繼續去啦！
2008/1/19 (土曜日)
致朋友 P 君 -- 恭喜恭喜！！
羽毛球日。 今日得四個人， 四個麻甩佬， 三個 regular 加一個好耐冇見的人。 唔， 實力嘛感覺有點點唔平均， 不過都還可以喇。 平時都係咁。
之後因為今日東大考センター試験所以冇得去 Italian Tomato， 沒有辦法之下去了マック， 食左少少野， 吹兩句水之後也係時候閃人。 唔， 真係少見。
夜晚找到了個 mon 的 warranty 喇。 好在。 可以拎去整喇。
恭喜朋友生日快樂！！
另外 sub title 也寫了， 今日是好友 P 君的大喜日子！ 真係好想番去飲呢餐， 不過呢幾日真係走唔甩... 希望你地白頭到老喇！
2008/1/18 (金曜日)
乘着尋日 deadline effect 的勢頭， 朝早五點起身（！）， 開始寫 slide， 果然 deadline effect 不負所託， 一路的寫寫寫， 幾十張 slides 用了兩個鐘左右寫？ 真係幾快手， 我都要寫個服字俾自己， 如果 research 有一半這樣的効率就好了。
Anyway 再準備一下之後出去， 去到冇雷公咁遠的錦糸町， 早了少少到， 食個午飯之後， 會合了 Language Center 的 staff， 之後行去 AIG， 果然係保險公司， security 都嚴過人（咦？ 以前香港都冇咁嚴架？）， 上到去做了少少 briefing 之後也差不多時間。 一行廿幾個人， 二三十歲吧？ 始終都有點緊張， 尤其係對住一班完全對廣東話冇 idea 的人， 加一個日本香港協会理事， 哈。 那班學生就冇乜所謂， 不過那個理事識穿左自己有懶音添！ 呀。 冇辦法， 懶音這家東西反而 native 未必聽得出。
三個鐘頭的堂也總算沒有太大問題， 慢慢 dum 時間， 教下教下都差唔多， 不過一個很少 feedback 的堂真係幾難教， 多些人問問題的話就真係易教好多。
完了這個廣東話班之後有點時間， 到了就近的聖地（？）秋葉原！ 嘩， 真係唔知幾耐冇嚟過喇。 想搵搵 sound card 之類， 於是行行行， 不過都係冇收獲。 沒有辦法之下去了看看 game 看看漫畫， 結果也是沒有收獲！ 嚟到聖地兩手空空的走人都真係少有！
之後 regular 的廣東話班。 唔知點解成班人遲到， 唔， 仲以為佢地唔黎添。 今日唔知點解教得特別順利咁， 一陣就過左個半鐘喇（可能對下晝有比較？？）， 專登準備好的歇後語也沒有時間教...
夜晚番到屋企， 發現個 mon 下面多了條横線...... 咁快出問題？ 好在一年都未夠（都唔知係唔係好彩）， 仲係 warranty period...
2008/1/17 (木曜日)
在學校也依舊的做一些雜務， 聽日又有廣東話班， 點都要準備一下。 結果其它做 research 的時間冇左一截。
夜晚， 要準備聽日去 AIG 的廣東話班， 之前還好準備了 notes， 今次準備 slides， 不過都唔少野， 加上要畫圖等麻煩工作， 真係早知唔接呢個 task。 搵自己黎辛苦。
為左發揮 deadline effect 的奧義， 決定先搵周公諗下經先。 明日早上起身作戰！ ヾ(￣o￣);ｵｲｵｲ
2008/1/16 (水曜日)
番到 lab 時， 坐低冇耐， 諗住專心做野， 但， 隔左一個 partition 的 Bangladesh 人那邊傳出
puuuu
似曾相識的場面。 之前坐在隔離的印度人都試過幾次...
你班友的自制能力係唔係咁差呀！ 定係你地跟本冇諗過自制？？？
雖然隔左一個 partition， 但剛剛沖好的咖啡， 有點唔想飲， 唉。 呢班人真係幾攞命。
唔理， 都要做野， 下午和笹瀬先生講了講個 report 等東西， 要提前少少寫好， 結果今個 weekend基本上都係俾個 report 食左架喇。 沒有辦法啦。 另外研究室新添了 19" mon， 唔， Epson， 普普通通沒有乜特別， 出唔到 1600x1200 的話都冇乜用。 同埋自己睇慣屋企個 22"， 所以個 mon 大左都冇乜感覺 （不過再之前由 15" 去到 17" 就好大分別喇！）
都算係一個偶然， 呢兩日先同 Madu 講開 Full HD 的電視， 今日就突然黎左兩個新芒...
另外幫個同學看看份修論。 主要都係睇英文喇， 之後問左個正常都唔會諗到的深入問題， 真係唔知點答佢添。 好認真的一個人。 不過就黎畢業， 之後都好少機會見到都唔定....
2008/1/15 (火曜日)
番學校， 今日也要準備一下回港時要處理的雜務喇。 visa 啦, grant loan 啦， 試験監督補助啦， 都咪話唔煩。
之後下午和一個 KBS (Keio Business School) 的朋友食飯， 難得識得講廣東話， 一口氣就講了兩個鐘， 佢都就快畢業喇， 今個禮拜完埋個 present 就大功告成。 祝佢好運！ 今日已經大談之後的旅行大計喇！ 勁！
2008/1/14 (月曜日)
懶懶閒的一日。 睇下書咁， 晚上整理一下一堆舊コミック誌， 剩係計紙的話應該都有十幾 kg， 成本書入面得一兩套作品係自己追開的， 所以老實講都有點浪費架。
晚上做功課， 之前沒有想太多應承了的 part time 広東語班， 要交搞。 唔， 沒有辦法， deadline effect....
2008/1/13 (日曜日)
戦利品:
らき☆すた 2,3
らき☆すた 公式ガイドブック れい陵桜学園入学案内書
名探偵コナン 60
スクールランブル 19
基本上留在家休息。 下午出去買野時順手買了一大堆戰利品， 死喇。 又多一套作品上了身， budget 方面開始出現問題？！
唔理喇， 千金難買心頭好嘛。 唔， 先看了比較有緊張感的コナン， 裏面的新隣人沖矢昴， 九成係那個角色喇... (詳細自行參看近期的コナン)。
2008/1/12 (土曜日)
羽毛球日。 上個禮拜塊拍斷左線， 沒有辦法之下唯有去 fix 番好佢。 另外之前買機票都未俾錢， 結果就在旅行社同羽毛球店走黎走去。
羽毛球， 差唔多全部人遲到， 除了Kさん之外。 兩個人打住先， 其它人也陸續到站， 今日意外地投入， 用多了幾分力。 一字記之曰爽。
之後例牌的イタトマ， 會合埋朋友 E さん， 吹水吹到五點， 本來諗住去渋谷食飯， 誰知突然大人提議去 B くん屋企打邊爐， 唔。 也好， 未去過嘛！ E さん也好像沒有所謂。 結果就打擾了B くん喇。 晚上除了玩左陣 wii 之外， 最主要的活動就係睇左套電影バブルへＧＯ！， 広末涼子主演， 唔， 簡單地說是一套笑片， 笑位都算 ok， 演技都唔太重要的一類電影喇。 還不錯的。 一大班人一路食野（正確來說一路食野的應該得我一個， 其它人好快停左手）一路講戲入面邊度唔會情理等， 幾過癮。
謝謝B くん的招待喇！
2008/1/11 (金曜日)
照平常的回到學校， 沒有太大特別的一日。 反正金曜日一般都要早走去教廣東話， 做到野的時間並唔多。
今日的廣東話班， 試試教新的東西－－歇後語。 即使是熟習廣東話的香港人有時都未必識得哂的東東。 不過正因為如此可以教下教科書以外的東西。 始終成日跟書教的話真係好鬼悶的嘛。 反應來說， 雖然的確幾有趣， 不過要諗下點樣教會好容易明些。
2008/1/10 (木曜日)
番學校， 有點點異常的靜， 但又唔係冇人喇。 點都好， 走埋去自動門前， 咦？
唔郁的？ 壞左？
奇怪， 另一邊個門都好地地。 發現有個位拍 security card， 於是拎出黎試下。
芝麻開門！
即個係門冇壞啦。 咁剩下的可能性只有一個。
今日放假。
呀， 係喎。 福澤諭吉生日咁大件事都唔記得左添。
還好， 除了自己之外， Madu 也做了同樣的傻事...
一場黎到， 就照原定計劃做 research 啦。 反正係放唔放假都一樣。 只不過係 lunch 要行遠些咁解喇。
夜晚， 買機票去也。 今次因為同朋友 E さん一齊番（五個鐘頭機有個伴開心些嘛）， 就埋佢時間， 定了在二月五號番香港。 趕得切過年！
2008/1/9 (水曜日)
實驗用 public key authentication 來 login 自己的 server， 大致上也算是成功吧？ 唔？ 唔知乜野係 public key?? 唔。 簡單地說 login server 的話最常用的應該是 username password 吧？ 用日常生活的例子來說的話這個就係密碼鎖， 人人走埋黎都可以亂試， 當然撞到個密碼就可以開門大吉。 不過 public key 就有點似鎖+鎖匙。 鎖同鎖匙一 pair， 冇鎖匙理論上點都入唔到個 server 咁解， 要 login 的話冇鎖匙基冇上冇可能。 不過就要在其它地方 keep 好條匙， 所以冇咁方便， 但 security 方面就好好多。
但其實都唔係完全唔方便喇！ 只要證明到自己有條匙， 就可以同時開好多把鎖喇！ 有點和現實生活相反（一個鎖+好多條匙 vs 好多個鎖+一條匙）， 可以好方便咁 login 好多個 server， 尤其係有時要 tunnel 的話就方便好多。
呀。。。 顧住玩 ssh 冇太多時間 research 添。
2008/1/8 (火曜日)
比平時早番到學校， 也是因為今早的 GCOE lecture。 今次的 guest speaker 是美國人， 很少有。 難得的英文 lecture 喇。 雖然自己邊個 channel 都可以， 不過總有些留學生唔知發生乜事嘛。
Anyway 今日個 lecture 幾好， 講的東西和自己做緊的 research 有關， 所以都比較容易明白。 而且佢 present 的技巧好過昨日那個 copy right guy (每次黎到都係講著作權)多多聲， 雖然朝早不過都可以 enjoy 的一個 lecture。
之後正常生活， 寫埋份 RA 申請表同埋濕碎野之後繼續看 paper。 唔。 要整理 proposal 喇。
夜晚很偶然的見到“執筆膠”， 仲要係左手用的！ 很感動！ 這個年代雖然唔駛點寫字， 不過一直都想改番用好的手勢寫字， 不過一路以黎都係右手的， 所以想用都冇得用。 今日終於都俾我見到喇！ 感激！ 即買！
2008/1/7 (月曜日)
番學喇！
總算開學喇。 今日諗住都應該冇乜特別野做到， 事關下午要聽 PhD defense， 再到四點半聽 GCOE lecture。
結果下午個 PhD defense 突然延期， 唔係好知發生乜事， 不過都沒有辦去了。 突然多了出來的少少時間， 唔知做乜好， 於是走左去吹水， 去去 Docomo Project room， 吹水吹水。 跟住番番研究室呆了一陣。 上lecture, 無所事事的 lecture... 自己看書好過， 個 lecture 成日講的都係“唔知”， 唉。。。
2008/1/6 (日曜日)
新年來有不同的東西做， 今日總算可以做番個隱敝青年喇。 留在家中睇下書訓下覺咁， 不過中間因為要買少少野出去時， 去到商場先發現...
訓覺時撓起的頭髮... 冇梳好！！
真是的。 唔。 冇所謂了， 反正咁多人在街上冇咁得閒理我喇。
2008/1/5 (土曜日)
2008年第一次打羽毛球。 原來諗住冇乜人啦， 點知朋友Bくん同朋友Rさん各自帶了一村人來， 加上唔知點解今日體育館鬼咁多人... 幾驚冇位打...
近來除了羽毛球之外也會抽少少時間打所謂的軟式排球， 始終一大班人玩的東東也有它的樂趣。
之後照慣例的去了東大的 Cafe 食野。 也依然是一大班人。 但其實分左兩邊各自傾計喇。 唔。 所以自己平時搞食局的話通常寧願4-6個人， 8個以上其實都好難控制。 唔。 算了。 大家開自動波喇！
2008/1/4 (金曜日)
八景島へ
2008年第一次去玩。 約了一個朋友一齊去横浜市金沢区的八景島。 這個島用香港的常識來形容的話， 四個字：海洋公園。 哈哈。 不過很久之前都有諗過黎架喇。 就係冇伴， 一個人傻間間去咩？ 今次難得這位朋友放假有肯陪自己去喎。
十點左右坐火車去， 由横浜出發三四十分鐘吧？ 去到， 沒有說話好講。
天堂？
應該誇張了少少吧？ 不過真係好靚， 天氣又好， 海景又一流。 Anyway 二話不說的去了水族館， 好耐冇去過喇。 動物園之前都有機會去， 不過水族館就真係冇咁多機會。 不同的魚蝦蟹自然不在話下， 最喜歡的還是企鵝.... 或多或少被 Linux 所感染？ 不過看着他們， 就忍唔住諗...
乜企鵝唔係鳥類黎架咩？ 唔識飛都算了， 點解游水就快過 d 魚？
大自然的另一奧秘？？ 唔。 不過自己真的望企鵝望過龍， 朋友都忍唔住問我想望到幾時.... 哈哈。
水族館之後到"海洋劇場"(Aqua Stadium)， 感覺上幾似海洋公園那些。 海洋公園對上一次去都可能係十年前了。 所以同樣的感到很興奮（個相機都係咁燒菲林... 用 MB 計的菲林）。
大滿足， 跟住去另一個地方， 那裏似乎可以看海獅寫字， 去到， 等，等等， 等等等， 等左好耐先入到去， 不過入到去又唔知點解唔見海獅， 唔。 沒有辦法， 在那裏走左幾個圈之後， 係時候去醫肚。
去到一間中式餐廳， 鬼影都冇隻， 諗住佢準備中， 但又有人招呼喎。 是但， 叫了個小菜食， 唔錯唔錯， 日本來說算是有一定水準喇。
食飽飽之後去到海豚館， 在透明的走廊裏面海豚在自己上面游來游去， 感覺很不錯。 而館內最入面有一隻白海豚。 唔。 還是第一次見。 不過見佢游來游去的 pattern 都係一樣， 有點 infinite loop 的感覺， 或者， 那裏對牠來說實在係太細了。 有點點覺得佢可憐咁。
最後去了看企鵝電影， 唔， 變變變生命力企鵝篇？ 都幾得意的， 不過那裏暖氣實在太勁， 加上張椅又幾舒服， 有點點睡意添。
這一日的確過得不錯喇。 真的要謝謝這位朋友陪左自己一整日喇！
2008/1/3 (木曜日)
下午首先出了去買前日唔夠用的地氈和之前冇買的三格櫃， 買完番黎之後跟手就再出去買番些雜物用黎整理間房， 但一行就行了兩個幾鐘....
番到屋企， 晚飯都唔記得煮， 就是不斷的看昨日買的らき☆すた， 爆笑。 很久之前都想睇的了， 不過硬係後知後覺， 到尋日先買第一期... 睇睇下， 一個廣東話班的學生打黎， 先醒起應承左佢 skype 講廣東話， 完全冇左件事添。 結果講完先有晚飯宵夜食。 整都冇時間整， 於是即食麵...
砌埋個櫃， 再執下間屋。 唔， 有點似樣了。 不錯不錯。
2008/1/2 (水曜日)
戦利品：
Leaf Illustrations Tatsuki Amaduyu Edition
らき☆すた １
スクールランブル１８
スクールランブル小説 〜メはメガロドンのメ〜
撞鬼。 唔知點解要去到早上五點才訓得着。 結果直到下晝至起到身。 雖然話放假， 不過都未免太懶喇。 訓得太多就覺得個人傻傻的。
Anyway 昨日行街時， 其實在ヨドバシ六樓偶然的玩下部電子琴， 突然重燃興趣... 重燃？ 因為以前曾經買過（十年前吧？）， 不過因為沒有太大 effort 去練習， 加上再屋企人面前怕醜（？）， 結果在碰到 chord 時放置。 今次嘛， 沒有人阻自己， 而且昨日也說過要玩些新東東， 於是就下定決心買了一部二手的（唔太貴， 而且功能都幾多）， 和一本 for 大人用的入門書。 唔。 唔。 がんばるぞ。
再整理一下凌亂的房間。 似番個人住的地方吧？
2008/1/1 (火曜日)
お正月〜〜あけおめ！！
2007也終於成為過去了。 新一年的開始。 結果都係鬼咁遲先起身。 昨晚都係同朋友 message 之下過喇。
早餐後， 右手姆指的劇烈運動－－不停的 send message 俾一些朋友喇。 可以的話其實都想 send 年賀状， 不過冇地址都冇辦法。 又唔想一個 message send 俾 10n 個人（自己收到這些 message 的話會即時 ignore）， 於是逐個 message 打打打。 有些很久沒有聯絡的人， 收到他們的回覆時也延開心的...
食完午飯之後出去行行街。 今年沒有去神社， 反而去了看看平時放親假都多人到鬼咁的横浜駅周圍走。 結果只有很少數的舖頭有開。 大型的電器店和雜貨店？ 當然便利店就照常營業喇。 看到這麼多舖頭冇開感覺都幾新鮮的。
不過舖頭冇開， 但“福袋”就周圍都見到。 福袋嘛， 就是裝了一堆唔知乜野， 裏面的東西的定價比福袋的價錢高（一般高50%左右吧）， 亦即係叫做有平貨執喇。 不過唔知係乜， 所以冒險成份都唔低。 例如有個福袋賣15000円， 就寫住裝了一部25000円的數碼相機。 但乜野 model 等就天知。 平平地一大包零食的話我或者會買， 不過越專的東西就越唔想買喇。
講番舖頭， 其它舖頭冇開的情況下某幾間舖就自然多人到鬼咁。 抱着趁下熱鬧的心態走入去。 唔。 唔。
本來想買個櫃用嚟整理一下自己亂到飛起的雜物， 結果行行下發現地氈大特價， 即時買了四包（30cm x 30cm x 18 x 4)， 之後就番屋企舖。 一路舖一路舖，舖完之後感覺不錯。 但係。 望下望下...
好像有點似 Office?
唔緊要喇。 反正自己的房的 function 本身就係咁... anyway 有點點地方舖唔哂， 遲些再買多包黎舖。
今年嘛， 簡單地目標係想擴闊自己視野。 開托一些自己差不多從未接觸的領域。 現在， 枱面就有兩本講法律的書等自己睇... 有排睇都似。
新一年， 期待。