2008/10/31 (金曜日)
突然間發現好大件事， 就係隔咗成兩個月都冇去過捐血... 之前都係兩個禮拜去捐一次， 自從對上一次剥智慧齒， 跟住就有一排傷風， 另外加上一段時間有各種事忙， 總之就真係好耐冇捐過啦。 每次行街見到啲“緊急”之類嘅牌就想去捐， anyway 今日總算搵到個空檔去捐喇。 話時話， 去開嘅西口， 八月尾重新裝修過， 之後都冇嚟過， 所以今次係裝修之後第一次嚟喇。 唔， 感覺上新浄咗（當然）， 不過好似有少少冇咗嗰種 feel like home 嘅感覺囉？ 太敏感？
Anyway 捐完血之後返研究室， 冇乜人， 大家都知道今日笹瀬先生唔喺度啩？ 不過唔理咁多喇， 雖然知道笹瀬先生最近玩 take attendance， 不過自己都係比較我行我素喇， 早少少返到嘅咪返囉， 有事做就乜都冇所謂喇。 自己做自己嘢， 中途緊係會有啲 interrupt， 唔， 真係唔知幾時可以集中到精神喇。
夜晚廣東話班， 真係發現自己控制時間幾差， 雖然要頼都可以頼佢地唔少人遲到喇。 最初可以快快手手嘅文法結果用咗唔少時間， 但之後應該俾多啲時間嘅 listening 就真係幾趕囉。 冇辦法啦。
夜晚食飯， Kくん帶咗佢嘅一個香港人朋友嚟， HKU 嘅 exchange student， 而家算係自己嘅後輩（都係K大）， 都係問咗啲好表面嘅問題啦。 唔， 不過佢學咗日文四年， 感覺上好過自己咁。 唔， 發音方面都真係仲有唔少嘢要學喇。 自己嘅發音一向都比較求其嘛。
2008/10/30 (木曜日)
老早返到學校， 開始 run 個 simulation, 個 simulation 一改咗個幾 parameters 就發現要 run 好鬼耐， 雖然都預咗， 不過諗落都要搵其它辦法整整佢先得。
下晝有兩位「情報工房」嘅 OPNET sales 嚟做咗個 introduction， 講嘅嘢都好表面， 係一啲我覺得 OMNet++ 都做到嘅 function 囉。 當然我大概都知道 OPNET 用起上嚟可以有幾唔同， 不過最大嘅問題係， 母公司美國那邊 offer 俾大學嘅 University program （可以免費用個 tools）去咗邊呢？ 問個 sales 又含含糊糊咁答， 不過喺佢立場又真係理所當然嘅....
夜晚約咗一個澳門朋友去食飯， 總之就係吹水吹水同埋吹水啦。 難得， 其實真係見唔過唔係好多次面， 不過唔知點解可以講好多嘢囉。 都幾搞笑。 亦都唔知為乜， 無端端被請咗一餐飯...? 多謝哂喇。
2008/10/29 (水曜日)
朝早返小學校， 隔咗成個月喇。 啲學生有唔少都唔記得咗點樣打招呼， 重新教過。 都好。 另外今日由於臨近萬聖節， 教三班都係南瓜， 唔駛用腦都得。 不過平時最好玩嘅一年二組， 真係會發生意外。 無端端個小朋友喊， 又唔知佢喊乜先慘... 好在有教師 follow， 自己可以專心教...
返到學校， run simulation， 唔， 結果唔係太靚， 有啲嘢要確定一下先得。 雖然心裏面有另一個 proposal， 不過真係要認真搵時間諗下先。
夜晚， Opensocial， 有啲碰釘嘅感覺添... 俾多少少時間諗下先。
2008/10/28 (火曜日)
朝早研究室 meeting， 兩個人 presentation， 理論上係 security team 嘅 meeting， 唔知點解其中一個人講咗去 Ad-hoc P2P file sharing？ 有少少諗爆頭...
之後努力工作。 唔係太多進度， 不過寫返好個 simulation framework， 都真係俾咗唔少時間寫。 暫時都 show 唔到乜嘢結果出嚟， 不過幾期望以後可以幫手提供唔少 data？
夜晚本來想寫 Opensocial 嘢， 不過食飽飯之後就俾張床吸咗入去， 返唔出嚟...
2008/10/27 (月曜日)
尋晚傾到都幾夜（四點幾？）先嚟瞓， 結果今朝要成差唔多八點先起到身。 都冇辦法， 八點起到身都算係咁啦。 起碼趕得切掉垃圾嘛。
返到 lab， 其實顧住 fix 番部 notebook 個 GLX 都用咗一段時間（後來發現係 x11-drm 裏面唔記得 set Intel 個 useflag）， set 返之後照常運作。 好好好。
之後 GCOE lecture， 有兩位公司嘅 guest speakers， 兩位嘅 Powerpoint 真係睇到想死。 不過其中一位其實真係幾睇得通自己要講嘅內容， 我覺得佢唔點用 Powerpoint 嘅話反而可以講得好好囉。 不過另一個就真係照讀， 嘥錢嘥時間， 你估我唔識睇你寫乜咩？ 不過 anyway 近來睇完本 Presentation Zen 之後對 Powerpoint (或者任何其它 Slideware)嘅標準真係高咗好鬼多。 似乎近來真係冇乜邊個可以 pass 到咁囉。
夜晚因為要俾個 harddisk Pちゃん， 去咗綱島嘅一間お寿司屋食飯， 講咗好多嘢， 太多喇， 自己都唔記得太多， 不過佢都覺得自己係適合住喺日本， 同埋適合搵日本人做自己伴侶？ 唔， 唔太否定喇。 將來嘅嘢就真係好難講喇。 唔知點呢？
死， 仲未寫好啲 code 添...
2008/10/26 (日曜日)
始終一到禮拜就冇心機做嘢， 機又唔想打住， 索性去咗行街街。 由於懶嘅關係， 近近哋走去 MM21 散步。 又唔知點解今日突然間想食老麥喎， 咁就諗住求其搵間老麥食啦。 點知 MM21 周圍都鬼咁多人， 排哂長龍， 冇辦法之下唯有行遠幾步。 行吓行吓已經離開咗 MM21 嘅範圍， 去到野毛一帶， 嗰邊其實真係冇幾可去， 今次認真嚟講可以話第一次去（踩單車經過都試過嘅）， 感覺上好舊， 冇乜生氣咁， 真係想像唔到呢度只係同 MM21 隔咗一條路... 不過今日嚟講算係啱啱好喇。 冇乜嘢想做， 只係想周圍行吓。 當係探險都好喇。
夜晚同其中一個廣東話學生傾計。 傾咗好多嘢， 最初都係傾啲無謂嘢， 不過唔知點解突然話題轉到一啲 top secret， top secret 就冇可能喺呢度寫喇， 不過冇諗到佢會同自己講呢啲嘢囉。 一方面呢個學生咁信賴自己， 某程度都幾開心（識咗唔係好耐咋）， 另一方面， 所講嘅嘢其實完全唔係自己可以俾意見嘅內容喇。 純粹咁聽， 比想像中深入嘅地方， 感覺上就好似入咗一個滿佈地雷嘅山洞咁... 雖然爆咗自己都唔會死... 但係心臓病發都唔出奇囉。
不過當被話到係一個“有一個可愛嘅笑容， 而同時有穩重嘅性格， 落差好大”， 真係唔知點應好... 呢句說話仲要原來係讚緊自己， 更加無可適從....
2008/10/25 (土曜日)
朝早悠悠閒閒咁， 不過就永遠都係咁， 悠悠閒閒之後就係衝衝忙忙， 去到差唔多出門口時就發現呢樣未搞掂嗰樣未搞掂....
Anyway 趕到去球場時， 發現自己原來係第一個到， 唔， 咁趕做乜鬼呢？ 唔緊要喇。 今日得四個人打， 慢慢嚟啦。 唔駛打得咁急。 始終 C くん嘅打法有好多地方可以學嘛。
打完之後發現一個衝撃嘅現實， 就係 K くん突然間又開始番吸煙！ 唔係啩？ 好奇怪囉。 真係諗極都諗唔明。 咁鬼臭嘅嘢點解可以吸入個肺入面...
另外今日吹水時都唔知點解突然講到一啲好認真嘅問題， 唔。 有少少跟唔到添。 而且有啲 眼瞓.... ZzZZzzz
2008/10/24 (金曜日)
尋日過早瞓覺， 結果今日五點鐘就眼光光等天光， 起身做嘢都唔係話唔得， 但係一諗到今晚有廣東話班， 休息多少少應該會好啲啩？
返到學校， 進度就一般啦， 唔算係太清醒所以都係做啲細眉細眼嘢， 不過真係發現自己寫 Java 係好過寫 C++ 好多咁囉。 始終以前有經驗嘛。 有時間其實應該執番好過 JNI 去 call GLPK， 不過都係遲下先算喇。 反正都唔會有乜嘢大變動啩？
夜晚廣東話班， 見好耐冇教過文法嘅嘢， 執番好佢先得， 唔， 始終教文法時有少少難度喇， 之後繼續 RTHK 嘅 Podcast， 去到呢度就連比較高 level 嘅幾個人都覺得難喇， 不過認真嚟講呢啲先係正常嘅速度喇。 所以都覺得應該練習下會好啲。 要擔心嘅係有幾個比較 beginner level 嘅人喇， 唔。
夜晚吹水團， 唔， 坐位嘅關係比較多同新參加嘅 E ちゃん傾計， まあ、仕方ないか。
2008/10/23 (木曜日)
今次真係有啲頂唔順， 喺學校已經唔知自己做緊乜， 個 simulation program 有嘢要 improve， 但係又出唔到全力... 唔。 Anyway 逐啲做啦。
返到屋企， 食飽飯， 即時死亡。 本來打算剩係瞓個半鐘， 不過一瞓就起唔到身..... orz
2008/10/22 (水曜日)
朝早繼續做嘢， 不過可能尋晚搏命得濟， 冇乜精神咁， 都冇辦法啦。
下晝又 meeting， 兩個留學生嘅 report， 結果唔關自己事都要去聽（因為其它日本人嘅英文唔係好得）， 都幾攞命。 好多都聽唔明， 不過因為人數少咗， 所以 discussion 都叫做容易過平時喇。 唔。 唔。
Meeting 之後唔知點解又突然好好進度。 唔， 唔， 個simulation program 都叫做差唔多完成喇啩？
夜晚租咗劇場版名探偵コナン「戦慄の歌譜」睇， 之前其實入戲員睇咗， 不過碟都想翻睇幾次， 始終打電話嗰一幕唔係好信囉。 呢次劇場版同平時唔同嘅係少咗好多 action 場面囉。 爆炸場面就基本上走唔甩， 不過其它嚟講就真係冇乜（中間狙撃嗰幕都算係啩？）。 冇計， 考慮到犯人係那個 xxxx (保密情報)。 Anyway 都算幾好睇嘅一套戲。
2008/10/21 (火曜日)
研究室嘅例會改咗去朝頭早， 同以前唔同嘅係而家開始分組討論， 今日由其中一位 Iくん開始， 唔， 咁多個 B4 入面佢應該係最勤力嗰個喇， 不過佢份 Powerpoint 真係睇到想死， 好鬼多字， 照讀， 咁真係唔知開 meeting 嚟做乜囉。
之後返返自己嘅 simulation， 大概嘅嘢都搞掂， 突然心癢開始 log4j 同埋 generate javadoc。 有少少認真做呢個 program 呢。
夜晚繼續做嘢， 玩 OpenSocial 嘅 development， 雖然都撞唔少板， 不過幾好玩咁喎！
2008/10/20 (月曜日)
唔知發乜嘢神經， 好鬼好精神囉。 難得咁好精神就係咁寫 code 寫 code， 寫咗唔少。 lecture...
不過亦都唔知發乜嘢神經， 一去到 GCOE lecture 就即刻悶到飛起， 完全冇能力保持清醒。 撞鬼。
2008/10/18 (土曜日)
羽毛球日。 不過今日到搭車時都唔知有邊個會嚟囉。 一個唔覺意剩係得我同埋嗰個 SKY 嘅話真係唔知點算好。
結果 SKY 冇嚟喇， 反而 C くん帶咗位朋友嚟， 印尼人， 羽毛球一講到印尼就得個勁字， 果然佢不負所望， 我同 C くん好險先勝出（主要係我拖 C くん後腳喇）。
之後照慣例去 Cafe 食嘢， 傾咗好多嘢， 但最唔同的係今日 channel 主要係英文， 一來印尼新朋友唔識日本語， 二來 K ちゃん嘅外甥仔（！）都唔算太另日本語喇。 唔， Kくん感覺上有少少一頭霧水？？
返屋企， 好早就休息， 涼都未沖.... 昏睡...
2008/10/17 (金曜日)
一朝早返 lab 做咗少少嘢， 比起平時算係做多咗少少嘢咁啦。 之前擔心嘅嘢真係發生咗， 就係因為笹瀬先生開始玩點名嘅關係， 逼到平時唔多嚟嘅學生返 lab， 不過真係重量不重質， 其中一兩個人嚟到時真係係咁顧住吹水， 吹水都唔緊要， 自己都成日吹， 不過唔駛吹到成個 lab 都聽到呀嘛？
食埋個飯， 做多少少嘢之後同 Madu 去咗台灣整 visa 嗰度（唔叫大使館， 冇計啦， 台灣嘛）， 自己應該可以落地簽證， 不過都係問清楚穩陣啲嘛。 Anyway 去到四點左右， 去到有個四十歲前後嘅女人， 一開波就對我哋講
你哋仲乜過咗四點先嚟呀？
吓？ 網上面同埋入口都寫住辦公時間係去到五點， 我唔覺得有乜問題囉。 就算真係四點， 妳都唔駛咁嘅態度呀嘛？ 個女人用日本語講， 但係連唔太叻日本語嘅 Madu 都聽得出佢態度有幾差。 真係離哂譜。 好在都算係問到要問嘅嘢， 冇白行一趟咁。 真係唔明...
之後同 Madu 去飲嘢， 冇幾耐就去廣東話班。 今日多咗一個新學生， 睇嚟可以幾好傾咁。 呀， 不過話時話今年剩低嘅廣東話班冇咗一個好重要嘅要素， 唔， 冇辦法...
夜晚去食飯， 朋友 P ちゃん亦都嚟咗， 主要同我同埋佢第一次見嘅兩位學生吹水， 不過冇諗到， 第一次見都好多話題， 意外地有趣囉。 哈哈。 估佢哋唔到。
2008/10/16 (木曜日)
尋日顧住幫個朋友整機， 夜咗瞓， 今朝亦都遲咗起身。 冇辦法啦。
返到學校做嘢。 發現好似出席率真係高咗少少咁， 唔。 咁就煩喇， 有幾個人真係特別嘈， 佢地返齊嚟嘅話真係唔知可以點做 research...
不過都要照做！ 寫寫寫， 改返好個 GLPK 嘅其中一個 constraints parameters， 意外地用唔係太多時間， 哦哦哦！！
夜晚， 開始寫個 part time 嘅 application， 正確啲嚟講係 part time 嘅 environment setup 喇。 唔， 話時話聽日嘅廣東話都未 prepare 添... .
2008/10/15 (水曜日)
Happy birthday to me!
戦利品：
水樹奈々 Trickster
十月十五日。 開始於東急東横線， 亦同時在東急東横線完結。
いやいやいや、當然唔係成日都喺㗎火車上面過啦。 人都顛呀。 尋日幫個朋友整 部中咗毒嘅 notebook， 但係整唔掂， 拎返屋企慢慢玩。 於是廿八歲第一件做嘅事， 估都估唔到， 竟然係同 Windows 格鬧...
唔。 一路都係搞唔掂， 其實都決定重新裝過喇， 不過電源好似唔係咁穩定咁， 成日自己熄機， 唯有 try and error 咁做啦。
今日蛇王冇返學校， 但下晝又冇乜特別嘢做， 去咗醫肚先。 難得嘛， 揀咗間泰國嘢， 跟住破戒叫咗碗冬陰功（因為有蝦）， 少少應該冇事嘅。 食食食， 又真係幾好食喎。 啲蝦有定冇都冇乜所謂， 不過個湯真係幾正。
之後自己買咗自己嘅生日禮物之後返一返屋企。 新 CD 嘛， 當然即刻聽啦。 三首歌， style 都幾大分別。 都幾唔錯。 感覺上中間嗰首 Discotheque 最好聽？ 唔...
之後入正題。 約咗 H ちゃん同 A ちゃん去渋谷食晚飯， 話時話如果佢地冇約到自己嘅話今日隨時一個人過。 唔... 唔... 結果冇問題就得喇！ 天堂同地獄都真係一 mail 之差... anyway 天氣轉涼， 去食しゃぶしゃぶ就真係啱啱好喇！
嘢食其實好唔好食自己都唔記得咗喇（之前都嚟過呢間舖頭， 應該係一般啦？）， 反正都係顧住吹水嘛。 其中最有趣嘅係講到香港人會送乜生日禮物時， 提到送 puzzle 時佢地兩個即刻極為驚訝， 唔... 好出奇咩？ 雖然自己都未收過， 不過有人砌俾自己嘅話應該都會幾開心㗎。 誠意夠多嘛。 不過似乎呢兩個日本人唔太受咁， 唔， 都唔係唔明佢哋個 point 嘅， まあ、ね。
之後再去 Starbucks 坐陣， 叫咗杯巨型抹茶ラテ， 幾好飲， 繼續傾咗唔少嘢。 唔知講開乜嘢， 跟住拎部電話出嚟睇 address book (???)， 睇吓睇吓， H ちゃん個電話都算， A ちゃん個 address book 裏面有好好好多個名都完全唔知點讀囉。 雖然有好多名就算日本人都未必識讀.... 但未免真係多咗少少...
今晚真係好多謝佢地兩個喇， 又食又拎咁添(≧∀≦)／， 而另外亦都有唔少好朋友都記得自己生日喇。 多謝哂！！ ありがとう！！ 呀， 仲有仲有， 康少！ 生日快樂！！
今日嘅相， 唔係影咗好多....
2008/10/14 (火曜日)
一早返學校， 話時話笹瀬先生朝早未去 APCC， 所以留咗喺 lab， 傾咗啲閒計， 唔， 點講呢， 反正今日都冇乜時間留喺 lab， 吹吓水都冇所謂喇。 食完飯， 臨趁住走時撞正笹瀬先生準備出門口， 放時唔知點解又傾咗成半個鐘。 あれれ、APCCは？
不過話時話笹瀬先生今年真係幾擔心研究室嘅情況， lab 裏面日本人學生嘅水準好似一路咁低咁， 今年嘅進度， 真係好令人擔心咁囉。 於是佢就出咗一招： 點名。 真係估唔到， 但係唔俾啲壓力嘅話又真係好難迫啲學生勤力啲喇。 自己擔心嘅係， 如果迫咗學生返嚟， 但成班人顧住吹水嘅話， 自己又可以做到幾多 output 呢？
下晝約咗一個香港 friend 幫佢睇電腦， 唔， 果然自己真係唔太熟 Windows 喇， 唔重新 format 都諗唔到計， 剩係幾隻 virus 都搞唔掂， 果然 Windows 唔係一般人可以用得到？ 結果下晝搞到夜晚， 都係唔得， 仲要越整越衰， 最後連 login 都唔得。 冇計， 朋友又趕住用電腦， 唯有幫佢拎返屋企 format 啦。
話時話， 整整吓電腦時， 突然收到嘅兩個 email， 唔， 由個心到笑咗出嚟， 朋友當時同另一個人傾緊計應該冇留意， 不過自己都知當時應該係喺度傻笑。 ありがとう！！覚えてくれて…
2008/10/13 (月曜日)
無端端又有假放， 冇好似上次咁發傻走咗去返學。 學精咗嘛。 今次比較悠閒咁留喺屋企做吓啲雜務， 同埋打下機咁啦。 放低咗一段時間嘅 PS3， 點講呢， Trustry Bell 完咗最後個不思議空間， 忍唔住問咗句： so what？ 咁難先幫クラペス復活， 但之後就真係冇其它嘢喇喎（唔， 極其量就係可以一齊去迎接個 ending 喇）， 唔， 都好，不過呢個月睇怕都比較忙， 二週目唔知幾時先有時間玩添。
夜晚約咗 P ちゃん， 主要工作就係幫手做咕喱， 一個女仔好難拎咁多行李喇。 反正自己有時間， 咪就幫吓佢手囉。 之後搞掂後去咗食飯， 吹水吹水同埋吹水， 好奇咁問咗佢
我想問妳點睇我呢個人？
佢諗都唔諗就答：
好人囉。 幾好傾吖
唔， 雖然唔係話對 P ちゃん有興趣， 不過都想知吓其它人點睇自己喇。 某個程度嚟講呢個答案早就預咗， 都冇乜所謂。 不過就係一個太容易預測嘅答案， 自己都覺得有少少悶咁添。 唔。 Anyway 之後再傾咗唔少嘢， 唔錯啦， 始終講廣東話嘅感覺都好唔同。
2008/10/12 (日曜日)
尋日 A ちゃん提到約個朋友出嚟， 反正冇嘢做所以一齊出咗嚟。 一位之前好似見過一次， 但係完全唔記得咗囉。 今次見番，傾咗一陣， 兩年之前好似見過一次咁大把囉。 唔。唔。。。 記得就有鬼喇。 anyway 當係識一個新朋友咁囉。 感覺上都唔錯啦。 幾 nice 囉一個人。
之後去咗睇戲， 宮崎駿嘅「崖の上のポニョ」， 自己唔算得熟宮崎駿嘅電影， 不過今次呢一套基本上係一套唔駛用腦諗嘅戲囉。 都冇乜特別嘢收埋， 簡簡單單嘅一套戲。 畫依然係畫得好靚喇。 感覺上好似好短咁...
之後會合另外兩個朋友， 雖然話去食飯， 不過嘢食都未落格， 去咗間居酒屋坐吓， 食少少嘢咁。 吹下水咁， 始終嗰個朋友第一次見， 問嘅都係一啲比較基本嘅問題喇。 唔。 都幾有趣。
2008/10/11 (土曜日)
去打羽毛球， 不過就係唔知點解冇必要都咁鬼早起身咁解。 是但啦。 有啲鎖碎嘢做， 其實好快就用哂啲時間。
今日七個人打羽毛球， 包括好耐冇見嘅 H ちゃん， 都幾好玩， 實力算係幾平均。 同埋新買那筒羽毛球， 幾好用喎。 又唔貴， 個店員果然好介紹。
之後照慣例咁去東大個 Cafe， 本來一路傾計都幾開心， 跟住那位新咖坡人嚟到之後氣氛即刻變哂。 話時話， 不知不覺間原來佢俾人改咗個名叫 SKY， 最初完全諗唔明， 不過知道 S = Super 之後就乜都明哂。 的確， 完全冇改錯名。 (KY：空気読めない。完全唔理當時環境亂咁講嘢嘅人)
點冇改錯名？ 都唔知佢為乜嘢乜都要覺得自己啱囉。 呢個世界總有啲嘢冇絕對㗎嘛。 今日講起 on-line shopping， 對於我自己嚟講其實唔係太方便， 成日要預時間等收嘢。 但佢又係咁話可以指定時間同埋點樣點樣... 好叻呀好叻呀！ 鬼唔知咩！ 咁我唔知自己幾時喺屋企嘛！ 個前題係“對我嚟講”， 當你忽略咗個前題之下已經係另一件事啦！ 用下腦好唔好！
算， 無謂為呢種人太上心。 之後去咗渋谷， 本來諗住去影下相寫 blog 用（廣東話班個 blog）， 搵唔到， 唔緊要喇。 之後去咗打卓球， 之前打完全唔得， 今次都唔係太得（rule 都唔太清楚）， anyway 都冇拖累一齊打個 partner （啩？）
去咪食飯先返屋企， 一間尼泊爾餐廳， 真係唔係有人帶都唔識嚟囉。 食咗唔係好多嘢， 不過都幾好食喇！
2008/10/10 (金曜日)
未来先導基金シンポジウム「慶應義塾理工学の歩む道」
一朝早去日吉 campus 新起好的「共生館」， 聽咗成日 talk， 講嚟講去都係一路聽開嘅嘢， 冇乜特別新嘢（參加得呢個 GCOE 就預咗喇）， 十點去到五點， 唔計 lunch 都有成六個幾鐘。 好在醒目帶定 notebook 先至覺得冇咁悶咋。
挨咗成日， 因為趕時間， 冇聽埋個閉幕致辭就走鬼咗。 趕去青山（同屯門間精神病院冇關係喇）， 廣東話班嘛。 上兩個禮拜都休息， 咁講原來已經隔咗三個禮拜喇。 唔知係唔係之前睇咗 Presentation Zen 呢， 莫明奇妙咁多咗自信， 自己都覺得有少少脱胎換骨咁。 其實唔同嘅不過係個心態喇。 反正都唔係用 slide 嚟教書（不過一個白板其實都係一個好重要嘅 presentation 工具喇）， anyway 真係有啲得着， 好建議各位買呢本書， 就算唔買本書， 都可以去聽下個 presentation， 認真推介！ 呀， 得閒寫下個書評先得。
夜晚， 一路食飯一路睇 A ちゃん部電腦， 之前佢話有啲問題嘛。 跟住永遠嘅奇蹟依然出現， 就係當我喺現場時問題係永遠唔會發生嘅。 用電腦嘅常識好難解釋喇， 試下用物理學嘅話， 自己應該有某啲特殊力場 (field)可以左右某啲可能性？ 一字記之曰：勁！ それは確率無視ってことかな？？
今日嘅相， 可以睇到今日幾悶...
2008/10/9 (木曜日)
廣東話 private lesson， 今次算係最後一日喇。 教嘅都係比較基本嘅嘢。 不過有個幾有趣嘅問題。 消磨同埋消耗， 喺日本語裏面基本上只係得「消耗」， 但呢兩個字讀「しょうもう」， 唔。 總之讀起上嚟同埋廣東話嘅「消磨」差唔多發音啦。 一時間有啲混亂添。 orz
去咗 lab 坐一陣， 基本上冇做同 research 有關嘅嘢， 收到新 part time 嘅 specification， 係時候 study 下喇。 Anyway 做番老本行， 總好過好似之前一次做一啲日雇い part time 喇。 好， 俾心機先得！
夜晚約咗好耐冇見嘅澄清先生。 真係唔記得幾多個月冇見喇。 今次見名目係下個禮拜生日喇。 Anyway 去咗横浜駅附近嘅一間甜品屋， 嘢食就普通啦。 都係吹下水咁。 不過因為任食嘅關係， 得70分鐘， 係咁狂食先得。 傾計嘛， 都唔係完全傾唔到嘅... anyway 多謝今日特登嚟到請我食飯喇！
2008/10/8 (水曜日)
一朝早去咗ヨドバシ買咗個 PSP 嘅 GPS receiver， 即刻試啦緊係， 不過， 睇下睇下， 好似唔係好 work 咁。 奇怪， 點解會發生咁嘅事㗎？
唔理咁多， 總之返學校做嘢。 唔， 眼瞓， 冇辦法， 基本上永遠都係眼瞓㗎喇。 有嘢就做啦。
最近先啱啱睇完嘅 Presentation Zen， 裏面題到一個叫 TED 嘅 website， 睇下啲識 present 嘅人點樣做 present 啦。 其中睇咗 Al Gore 一個關於環境問題嘅 presentation at TED. 真係明白自己平時做嘅 Death by Powerpoint (雖然冇用到 Powerpoint）係幾咁低 level (事實上好多人嘅presentation都係咁上下)， 太多嘢要學喇。
夜晚本來諗住平平靜靜咁過， 買餸煮飯啦。 點知一開爐即刻跳 fuse! 呀， 可能係尋日洗個爐嗰時漏水喇。 不過呢個爐反正一向都覺得佢唔夠力， 想買個新爐好耐㗎喇。 趁佢今次 down 鬼咗， 即刻走去 ヨドバシ 買（今朝先買咗個 PSP GPS receiver）， 幾順手咁買咗個唔太平唔太貴嘅爐（output power 都係 1.4k， 都唔知其它幾個有乜 function 咁鬼貴）。
買到返去， 趁住可以開始煮啦。 諗唔起原來一直用緊個 fry pan 原來唔 support IH， 冇計， 飯都煮好， 冇理由食白飯嘛， 唯有去買， 買到返去終於可以開始煮， 用一路以嚟嘅速度一路煮一路切， 發覺， 唔掂， 個火力比起想像中大， 好容易燶！！
新爐上任， 要啲時間去適應喇。 不過以前因為唔夠火力冇乜心機試新嘢， 而家可以試下啲唔同嘅嘢喇（不過腦入面暫時未有 idea， 有冇人有意見？？）
2008/10/7 (火曜日)
朝早落雨， 唔， 但係又積咗成堆衫要洗， 冇辦法。
下晝 lab meeting. 依然係好長嘅 presentation， 尤其係 B4 嘅學生， 根據笹瀬先生所講， idea 似乎幾麻麻， 不過自己望見最擔心嘅似乎係佢地嘅 presentation skill， 唔， 真係要由自己一啲 presentation 出發， 嘗試一下改變吓個 style? (應該會好難， 不過照一路咁落去都唔係辦法. やるしかない！)。 另外研究室分 group， 暫時冇 group (可以去 security 嗰邊玩下先)， 但係笹瀬先生就突然飛咗個 network coding 埋嚟叫我做 survey... 唔， 都好。 睇吓係乜嚟都唔錯喇。
夜晚見平平地， 買咗みんなの地図2. 比起 Google Map 好多地方都唔算太清楚喇， 不過幾有用， 輕輕地拎出街都方便嘛。
作為 IEEE student member (正確嚟講係 Graduate Student Member)， 今年起會有免費嘅 Windows license， 既然唔駛錢就 setup virtual machine 再裝個 XP 上去玩吓。 裝好冇幾耐， 唔， 算係幾快， 雖然 Windows 就預咗越行越慢， 不過到時成個 virtual image 抄返過去就係喇。 不過裝完一大輪之後（upgrade SP2 再 upgrade SP3， 都唔明點解唔可以一次過）， 忍唔住問自己： 裝完又點？ 對自己嚟講 Windows 真係冇乜用... 唔， 都唔係嘅， 之後 parttime 寫 web application， 或者都要 test 下都唔定？？
2008/10/6 (月曜日)
第三日去渋谷 Private lesson， 算係認認真真咁教咗啦， 之後無端端個學生借咗一堆漫畫同埋一部 NDS + Tales of Innocence， TOI 之前都有少少想玩， 不過唔明點解 Namco 要喺 NDS 出囉。 搞到我冇得玩。 Playstation 咪幾好？
傍晚嘅 GCOE lecture， 提到 control system. 完全唔明， 好眼瞓... 話時話最近睇一本叫做 Presentation Zen， 大約了解到 presentation 可以點精彩法。 唔。 就更加聽都唔想聽呢類 Death by Powerpoint 式嘅 presentation 喇!
夜晚， 作為延長線， GCOE meeting。 依然係好長， 都未至於全滅狀態... 不過都唔知有幾大作用， 交待進度嘅話 send 個 email 咪可以慳番大家時間囉？
2008/10/5 (日曜日)
ズーラシア
2008/10/4 (土曜日)
IEEE SB ワークショップ
一朝早返學校， 唔？ 今日禮拜六？ 我知呀， 不過都要返學校， 唔係做 lab 嘅嘢， 不過要幫手搞個 IEEE Student Branch 嘅 activity， 出得嚟行， 遇咗要還喇。 上年開開心心咁走咗去京都玩咗三日， 今次總要做番少少嘢。
不過話雖如此， Chairman 都冇叫自己做啲乜嘢。 咁就算啦。 Anyway 今日返到去， 都係係咁易幫下手掛下旗咁。 都冇乜特別。 本身已經有幾個山中研嘅人幫下手咁， 所以真係求求其咁啦。
之後開始 workshop， 同舊年一樣， 都係介紹下自己， 介紹下每間學校， 介紹下 student branch 應該搞嘅活動（呢 part 最悶）， GOLD (Graduate Of the Last Decade)， 跟住 workshop 做 discussion。 唔， 京大那位仁兄好似好不滿咁， 唔知點傾， 一 show 個議題出嚟就拍枱（如果佢係香港人反應該係門字加個小喇）， 有少少難傾， 唯有照試下問問題啦， 都算係交到貨咁。
夜晚懇親会， 同下啲教授傾計， 跟住其它時間大部份都係同山中研的人傾計， 其中一個下年會讀 doctor course， 幾好傾， 好可惜係一個煙鏟， 另一個以前都會為意過嘅人， 冇諗過佢竟然有香港居留權！ 雖然唔識講廣東話喇。 最後一位少有的女士， 傾咗都好耐， 冇諗到又幾好傾喎。 唔。 山中研嘅人果然大部份都幾好玩....
走時， 之前那位京大嘅人兄突然話漏咗副眼鏡， 唔， 真係估你唔到， 結果去咗 security office 搵。 最後都叫搵得番。 唔， 對自己嚟講唔見眼鏡真係一件諗都冇諗過嘅事。 Anyway 之後一齊走， 傾咗陣計， 又唔係太難相處嘅人， 不過呢世都未必有機會再見到佢喇...
2008/10/3 (金曜日)
今日又去咗渋谷廣東話 private lesson， 今次醒少少， 揀朝早。 一來迫自己最起身， 二來下晝有事要返學校， 所以只有朝早可以揀喇。
Anyway 今次因為比較早， 去咗間 family restaurant， 不過可以講嘅係：好臭！ 已經揀咗個最遠吸煙區嘅位， 不過之後都係成身臭味， 頂唔順。 下次再揀已經係要揀另一間餐廳喇。
Anyway 今日除咗廣東話之外， 又講咗唔少關於漫畫嘅話題。 哈哈。 真係冇乜幾多人可以講呢個話題喇！
返學校， 聽咗個 special lecture (都唔明點解係自己個 project group 每次都係 compulsory)， presentation 最初都仲幾好， 不過後來越嚟越悶， 原因嘛， 可能係佢啲 slide 越嚟越多字？ 最初簡簡單單有啲圖都仲好啲， 後來真係不敵睡魔... 感覺上有一半係浪費時間喇（前半真係唔太差㗎）。
2008/10/2 (木曜日)
返 lab, 寫返 simulation 嘅 program， 寫到咁上下， 又走返去 set 個 廣東話班嘅blog。 FCKeditor 睇真啲， 似乎比起想像中更加之 powerful， 好好咁 set 嘅話可以直接用佢個 interface 去 upload photo/file， 當然要一定程度 server side support 先得喇。
尋日都講過下改呢個 blog 嘅 source code， 不過又唔知 official 嗰邊幾時會有 update， 可以諗下 contribute source code， 過多一排睇吓有冇心機先啦。
夜晚同一個學生 Messenger 傾計， 佢話我 "Poker face".... 對自己嚟講 poker face 算係讚多過彈喇。 不過個學生就話我係唔會咁易俾人知自己諗乜嘅人...
唔... 係咩？ 記得好耐以前香港最後一份工嘅一個同事話過自己係“冷面笑匠”， 到今日都仲記得。 Anyway 其它人睇自己， 真係好多意外嘢...
2008/10/1 (水曜日)
返 lab, 用咗唔少時間 fine tune 個廣東話班嘅 blog。 好耐冇落手寫 website 嘅嘢喇。 例如呢個 blog 雖然自己都係用 HTML 係咁寫， 不過內部啲嘅嘢都冇諗太多。
不過呢個 pebble 就咁 customize 表面幾個 files 始終都有極限， 結果走咗去 source code 改咗少少嘢， 唔。 呢個就真係 Open Source + 以前自己寫過 JSP 嘅好處喇。 有能力嘅話將個 blog 改到完全唔同樣都得。 呀， 除咗能力， 仲有心機同埋時間， 呢兩樣都好似冇乜咁添... 改咗兩三幾行 source code， fix 咗啲小問題就算鬼數喇。