2008/11/30 (日曜日)
本應係不斷作文嘅一日。 不過之前訂咗本書又送到書店， 所以都要出去拎， 呀， 本來諗住唔駛執個人都得㗎嘛。
去拎咗本書之後， 突然又想行吓街， 行吓行吓， 去咗 TOKYU HANDS 間眼鏡舖， 配咗副眼鏡， 一路帶開嗰副其實冇乜問題， 不過見平平地， 所以就好爽手咁買咗喇。 應該兩副都會戴， 反正度數都冇分別。 睇心情嚟戴咁啦。 新呢副暫時仲未慣， 應該好快冇問題啩？
哎呀呀， 結果打呢篇日記時都仲未開始作文添...
2008/11/29 (土曜日)
羽毛球日。 今日都算係幾平靜， 冇乜特別事發生。 今日嚟得五個人， 而且遲到， 而且早走...
算喇， 自己都約咗 P ちゃん喺横浜， 行咗陣街， 幫佢揀吓禮物咁， 不過其實真係嚟講冇乜點揀， 佢話要揀條紫色嘅頸巾俾男朋友， 一來我從來都唔用頸巾， 二來紫色， 真係唔知點揀俾佢好囉。 結果都係不斷咁吹水多。
之後行咗一段時間， 去咗ジョイナス嘅一間泰國菜食飯， 之前都嚟過一次， 覺得都唔錯所以再嚟一次， 除咗個位比較近吸煙區之外， 整體都算係幾好， 埋單之後仲要有紀念品， 可能做緊 promotion 啩？ 詳細自己都唔太清楚... anyway 吹水吹咗成晚， 有啲話題自己聽咗都覺得有啲驚， 不過倒番轉頭講就係 P ちゃん信得過自己， 所以都覺得幾開心嘅。
2008/11/28 (金曜日)
朝早又去捐血， 今年嚟講應該最多捐多一次， 之後就睇怕要幾個月之後先可以嚟捐喇。 唔， 今次係喺日本第十五次， 之前仲諗住捐夠二十次， 不過因為剥牙等， 所以中間有段時間斷咗， 冇辦法喇。
今日返到學校都比較輕鬆， 尤其係因為叫做論文誌 OK 咗， 笹瀬先生嚟嘅壓力突然間少咗好多咁。 哈哈。
夜晚廣東話班， 不斷咁練發音， 幾好玩， 例如「殉情」同埋「雙情」呢啲發音， 咁就練咗成堂。 不過另外俾人問起「乜乜先」「乜乜添」究竟點用， 真係唔知... Anyway 唔錯嘅一日....
2008/11/27 (木曜日)
PhD 0.5
本來都冇乜特別嘅一日。 不過就係係咁做返 research 等等東東， 呀， 仲有台灣 workshop 啲嘢要做...
不過下晝突然收到論文誌嘅審查結果， 順順利利咁 pass 到。 呀， 謝天謝地喇！ 雖然自己都唔覺得嗰份論文寫得好好， 不過 anyway 總算有人承認自己嘅 effort， 而且實際對自己畢業係一個好重要嘅一步。 只要多多一份論文就應該可以畢到業啩？？
夜晚上 special lecture， 好眼瞓....
2008/11/26 (水曜日)
戦利品：
月聖ノ蒼炎曲
ギャラクシーエンジェル 3rd ６ ゲーマーズ限定版
朝早返小學， 已經係眼瞓到極點， 有少少想死嘅感覺。 不過又真係幾不可思議， 當對住啲小朋友嘅時候又唔太覺得眼瞓。 由於就嚟 Christmas 嘅關係， 唱咗幾次 Christmas Song， 唔， 小朋友基本上都好快上口喇。 幾好幾好。
之後返到學校時， 唔... 頭先唔記得咗嘅疲勞， 一次過走哂出嚟， 基本上唔係可以做嘢嘅狀態。 但係又有啲 deadline 迫緊埋身。 哎呀呀， 大件事.... deadline effect 仲未出嚟？？
算喇。 唔理喇， 聽日俾心機啦（呢句嘢唔知講過幾多次.... ）
2008/11/25 (火曜日)
又要返學喇。 一朝早返學校開 meeting， 跟住就要去聽 Techno Mall 嘅 introductory session， 總之就係雜務啦。 唔係話好難做嘅嘢， 不過就係用咗唔少時間。
做完啲雜務都三點幾， 冇計， 照做返自己 research.... 呀， 真係唔湯唔水嘅時間。 做少少嘢又要返屋企。 返到屋企理論上又要做 part time， 點樣先可以比較 effective 咁用啲時間呢？？
2008/11/23 (日曜日)
駒場地区秋季交流会Let's こらぼれーしょん世界文化の祭典
今日應承咗朋友去お祭り幫手， 朝早出動。 朝早去了渋谷會合Ａちゃん， 跟住出發去到駒場国際交流会館， 唔， 未開檔， anyway 去搵会館嘅朋友先。 終於搵到嘅時候， 發現佢地整緊嘢食， 唔， 似樣喎！ 厲害...
跟住冇幾耐開舖， 但係好多嘢食都未預備好， 哎呀呀， 而且出乎意料咁多人， 好似幾好生意咁， 結果廚房舖頭兩邊跑， 踢哂腳， 不過又幾好玩～
今日都真係遇到幾多人， 有一位早稲田嘅學生想嚟做 survey， 望一望份 survey， 唔？ 冇諗太多， 跟住見Ａちゃん出現時， 正想介紹嗰時， 就見嗰個學生「Ａちゃんここ何やっているの？」(Ａちゃん你喺度做乜？)， 呢個世界真係細.... 跟住吹咗唔少水， 哈哈， 幾得意。 之後見到喺呢度住嘅阿 Paul， 好耐冇見過佢喇。 再之後見到一對老夫婦幫襯自己嘅舖頭， 望下望下， 「川村さん？」， 嘩， 成兩年幾冇見過喇， 雖然佢都認得我， 不過唔記得咗自己個名， 冇計啦， 我都諗咗陣先講得出佢個名 orz...
除咗舖頭之外， 其實会館裏面就一路咁做 Show， 其中一套戲係又裏面由呢個会館嘅 RA 做， 其中Ｋくん做ドラえもん， 哈哈， 好搞笑～
相當唔錯嘅一日， 不過有一個目的想做， 但係做唔到... 冇辦法， 遲吓有機會先。
2008/11/22 (土曜日)
羽毛球日。 得四條友， 仲要三個人都遲到， 冇辦法啦。 反正少人嘅話打足兩個鐘頭會死人。
之後食咗少少嘢之後， 去咗渋谷行咗陣， 不過冇乜特別嘢想買， 算， 返屋企休息喇。
2008/11/21 (金曜日)
做雜務， 都唔少麻煩嘢要處理。 中途突然走咗去 set 個 printer driver， 個 color printer 從來都未 set 過， 今次終於 set 到， 幾煩， vendor 嘅 driver 剩係去到 32-bit， 自己部機係 64-bit， 所以要 set compatibility， 唔， 整咗一輪先得。 都算係最麻煩嘅 driver 喇。 Display driver 都冇佢咁煩。
之後廣東話班， 有兩位嚟參觀嘅學生， 程度只係初學， 睇嚟都好難跟得上， 冇法啦， 就得一個就唔到第二個嘛。 睇吓佢哋之後有冇機會會再嚟喇。
之後朋友 P ちゃん嚟 join 晚飯， 講咗好多無謂嘢， 其中一位學生 N さん同我哋玩咗個心理測驗， 做完個測驗嘅結論係自己嘅人生課題喎。 幾得意， 有人嘅課題係 "Happy"， 有 "romantic 嘅 date"， 另外亦有"武將"(??)， 幾得意。 我？ "魔法".... orz... 點樣以魔法做自己嘅人生課題呢....
2008/11/20 (木曜日)
繼續研究嘅一日。 冇乜特別， 算係集中到精神， 不過都真係好多嘢要 summarize。
夜晚約咗一個以前 EE 嘅朋友 E くん， 對上一次返香港時都有見過佢一次。 今晚純粹係出嚟吹下水喇， 咁啱佢過咗嚟横浜呢邊嘛。 佢講嘅嘢都有啲啟發性， 不過後來傾吓傾吓時周公突襲.... 冇計， 返屋企瞓喇。
2008/11/19 (水曜日)
返到 lab， 異常地眼瞓， 唔， 集中都唔得， 唔係因為眼瞓， 而係好多雜務要做.... GCOE 又要做 report 又要做 poster， 唔係話好多時間， 但係好多 interrupt...
夜晚寫 code， 都幾多限制， 用唔到 AJAX 都係一個問題， 唔， 冇計， 單程行車， 可以點樣 exchange data 呢？？？ orz...
2008/11/18 (火曜日)
朝早返 lab meeting， 唔， 冇乜特別， 聽完 progress report 之後就繼續做自己嘢。
可能因為係尋日個 meeting 太悶？ 眼瞓到有鬼咁.....
2008/11/17 (月曜日)
正常返學嘅一日。 做嘢做嘢， 係時候要準備交台灣 workshop 嘅 proceeding 原稿， 亦都係為咗自己嘅 research 咁。 不過都真係唔係太多時間可以做。
去到四點又要上 GCOE lecture， 上完唔知講乜之後又要 GCOE meeting， 好鬼長。 條友又話 presentation 十五分鐘， 點知用咗成個鐘， 仲長過巴斯光年， 嘩， 好眼瞓...
2008/11/16 (日曜日)
約咗幾個朋友去睇赤壁， 本來諗住早啲去， 不過整吓整吓都係遲到， 冇辦法， 其實都冇乜問題， 食嘢唔係太多時間， 不過趕得切開場喇。
套戲， 有唔少創作嘅部份， 演義或者三國志記載嘅部份都比較輕輕帶過咁， 所以冇睇過小說或者三國志嘅話好可能會追唔上， 唔， anyway main 之外嘅演員比較大問題， 尤其劉備嗰邊， 張飛都仲好， 關羽同埋趙雲真係唔得， 同埋好似啲將軍太弱咁... 不過 main 嗰幾個就真係幾唔錯喇。
之後去咗飲啲嘢先返去， 吹咗唔少水...
2008/11/15 (土曜日)
唔係好多人打羽毛球， 不過都好， 慢慢打。
之後去到餐廳， 其實幾個人都諗同一個問題： SKY 件事突然發生乜呢？ 之後就問， 唔， 結論就係不合則去。 其實我就冇諗太多嘢， 反正性格不合無謂迫埋一齊玩啦， 但係跟住 C くん同 B くん都講其實一齊玩唔係問題， 但係想佢改性格， 我就覺得奇奇怪怪喇， 不過佢哋講嘅都有啲道理。
休息....
2008/11/14 (金曜日)
捐血去也。 今年都捐得多一兩次， 捐到盡～
之後返到 lab， 做少少嘢咁， 時間又唔係太多， 盡能力啦。
廣東話班， 冇乜特別咁， 唔， 順順利利咁， 之後去食意粉， 之前都奇怪喇， 有煙味但係又唔見吸煙區， 今日先發現原來間餐廳入面有吸煙區， 唔怪得啦...
2008/11/13 (木曜日)
戦利品:
スクールランブル 23
名探偵コナン 63
幫 Madu 整少少 document 嘢， 不過從來都冇慢慢 set 部 notebook 嘅 hal/automount, 結果 manual 嚟， 唔覺意做 root clear 咗個 fstab， 好在好小事， 唔覺意 rm -rf / 先至大件事...
各人都知道笹瀬先生唔舒服， 唔返學校， 結果除咗小貓幾隻之外冇乜人喺 lab， 可以好集中精神做嘢...
到今日先買嘅スクールランブル 23， 大結局， 不過一直都冇心機睇。 其實最初幾好睇， 不過到中段已經唔知佢想講乜咁。 唔。唔。唔。 另外亦都買咗新一期コナン， 不過未睇哂就夠鐘瞓覺喇...
2008/11/12 (水曜日)
朝早返小學， 其實極眼瞓， 到而家我都唔明自己點解可以未試過遲到囉。 之前有一排係完全聽唔到鬧鐘嚮， 但係到重要時間總會起到身， 自己都覺得自己厲害...
之後返 lab 繼續 survey， 不過約咗人， 所以一陣就走咗喇。 都真係冇乜點做過嘢。
夜晚約咗 Ａちゃん同Ｋくん去做水餃同埋大根もち實驗， 寫咗兩位新朋友Ｅさん同Ｓくん， 之後開檔喎。 自己做到嘅嘢真係幾有限， 係刀法比較好啲， 所以係咁切係咁切， 原來都幾臭， 又蒜頭又韮菜。 唔， 冇所謂喇。 都係切咋嘛。 之後包餃子， 先發現自己係完住冇呢方面嘅才能... 嘩， 大件事... 不過食得就 OK 喇。 另外大根もち失敗告終...
2008/11/11 (火曜日)
返 Lab。 Meeting， 唔算太長喇。 不過例行都要聽笹瀬先生嘅一啲遊記等， 唔， 都慣咗喇。 不過 meeting 完咗之後返到 lab， 唔係太集中到精神， 主要係因為一個 F 君同一個 S 君， 成日喺 lab 裏面大聲講大聲笑， 講埋啲無謂嘢， 傾計唔緊要， 細聲啲都得啩？ 就連我呢個習慣咗嘈嘅香港人都講得佢哋嘈時， 佢地真係無藥可救...
話時話今日四條一， 有傳話係 Pocky day， 另外 slashdot 話今日係 Binary day 喎， 你問我我都係鍾意後者， 前者咪又係某公司諗出嚟嘅宣傳嘢？ 後者 binary 嚟講真係有啲得意嘛。
2008/11/10 (月曜日)
返到去 lab 就係不斷咁做 survey， 果然自己真係好多嘢都未查清楚添。 唔。 努力努力。
夜晚同一個好耐冇聯絡兼負責自己份保險嘅朋友傾咗陣， 主要都係想問自己份保險嘅一啲小事喇。 結果傾咗好耐， 呀， 唔係唔係， 係聽咗好耐， 佢係咁講健康嘅嘢囉。 聽佢講佢屋企人真係發生咗大大小小嘅問題， 不過完全講唔停口囉。 哎呀， 有啲眼瞓添。
2008/11/8 (土曜日)
今日冇乜人嚟打羽毛球， 結果決定休息。 都真係幾攰喇。
不過都係出咗街， 同朋友 E さん食飯， 諗吓諗吓其實之後就冇乜機會見佢喇。 喺東京嚟講隨時都係見多幾次咁大把？ 另外聽佢覆述， 有人話我“天然”喎。 呢個形容詞真係幾惡解， 可以係讚可以係笑， 真係唔知開心好定嬲好添。 唔， 是但啦， 反正都應該冇惡意啩？ 反正 E さん都話冇問題。
2008/11/7 (金曜日)
一朝早， 諗住早啲返 lab， 不過諗諗吓都係準備好廣東話啲 material 先啦。 結果就高速咁打打打， 唔， 其實都冇乜特別， 都慣咗喇。 返到去就係咁 print， 哈哈。 公器私用.... 研究方面都係係咁 survey， 冇乜特別。
夜晚廣東話班， 遇咗少少時間做 discussion， 諗住俾佢哋主導多啲， 自己完全去做輔助嘅角色， 結果効果好似唔係太好咁添...
食晚飯時， 其中一個學生摘咗塊葉入嚟， 跟住佢話太臭頂唔順喎。 不過自己聞咗聞， 唔係呀？ 冇嘢喎。 係有少少味， 不過比起呢個世界最惡臭嘅煙草， 真係小巫見大巫喇？
2008/11/6 (木曜日)
繼續尋日嘅反動。 冇心機做嘢， 點都要做 survey 喇， 真係正如笹瀬先生所講自己嘅 survey 真係唔係好夠咁...
差啲唔記得咗要上 GCOE lecture， 呀， 不過唔記得咗自己應該會仲開心都唔定.....
2008/11/5 (水曜日)
戦利品：
真・三国無双５
尋日嘅反動都唔定， 今日突然之間好鬼眼瞓， anyway 返 lab 做嘢， 但係都唔太集中到精神， 算啦。 唔理得咁多喇。 總之幾多嘢做到就做囉。
最近有少少赤壁熱， 嚟緊都應該會睇呢套戲喇。 anyway 當係溫書都好， 買咗隻三国無双， 其實之前喺香港時同姐夫玩過（話時話， 嗰時係最初玩 PS3）， 都想買一段時間㗎喇， PS2 版就一直都冇玩過， 所以見平平地就買咗囉。 唔。 都真係幾靚（雖然又未去到話好靚好靚）
2008/11/4 (火曜日)
又係唔正常嘅一日。 一朝早返學校， lab meeting， 做咗個短 presentation， 冇計， 真係好多嘢都諗得好 green， 所以俾笹瀬先生話 survey 唔夠。 唔。 做多啲 survey 啦唯有。
之後約咗香港嘅朋友Ａさん， 今日基本上就係俾咗佢喇。 先去到新宿 join 佢。 跟住一齊去廣東話班嘅學生Ｙさん屋企， 因為Ａさん想知點解佢地有興趣學廣東話， 二來Ｙさん畫漫畫， 對於做 design 嘅Ａさん嚟講都係一個好嘅交流機會？
話時話自己嚟日本咁耐， 其實都唔係話成日有機會去日本人嘅屋企。 所以今次都算係一個好機會喇。 未會合Ｙさん之前， 首先去咗中野 broadway 行咗一陣。 冇乜特別。 好多舊漫晝同埋 CD， 之後join 咗Ｙさん之後去咗佢屋企附近食そば， 感覺上唔係好夠飽添。
之後終於都去到佢屋企喇。 屋企本身又唔算係好特別， 不過好靜， 附近又全部都係住宅街， 所以感覺上好舒服。 最鍾意係兩隻貓（其實有三隻， 不過其中一隻怕人）， 另外睇咗一啲漫畫嘅草稿， 雖然係好多年前嘅作品， 不過真係冇乜機會睇喇。 幾得意。 可以嘅話真係想去佢個 studio 睇吓。
之後因為Ｙさん另外有事做所以同Ａさん走咗。 唔知有乜地方去嘅情況之下， Ａさん提議去神宮外苑嘅一個 design show， 都好， 不過去到時發現好似已經完咗咁， 冇辦法之下， 突然間提議去一個好多時見報嘅靖国神社行吓。 於是就坐火車出發。 去到其實都四點幾， 因為嗰度五點就閂門， 所以都唔係留意咗好耐， anyway 同Ａさん講下關於呢個靖国神社嘅問題， 唔， 睇法都有啲類似喇。 日本人又好中國人又好， 無謂俾自己咁多包袱喇。
之後夜晚本來約咗兩個朋友， 結果分別放飛機， 唔緊要啦， 反而更加自由， 結果就去咗自己嘅地頭：横浜。 反正之後點都要返嚟㗎喇。 而且Ａさん又未嚟過咁。 冇理由唔帶佢離坐下㗎嘛（講到好似去自己屋企咁添）， anyway 主要都係帶佢去我個花園 MM21（。。。）。 Ａさん好似都幾滿意啩？不錯不錯。
之後再行咗去赤レンガ一帶周圍走， 唔， 如果唔係兩個麻甩佬就真係一流喇。 之後差唔多時間， 本來想送Ａさん去埋車站先， 不過中途突然有“急事”（自己想像一下喇， 寫出嚟唔係咁好睇）。 所以中途 bye bye 喇。 anyway 多謝Ａさん幫我帶嚟嘅手信喇。
2008/11/3 (月曜日)
放假， 應承咗A ちゃん去早大祭， 都好啦。 反正認真嚟講都未去過對頭嘅早大， 而且難得有朋友喺嗰度嘛， 點都要支持下。
A ちゃん所做的 booth， 講一啲唔同國家裏面嘅問題， 例如中國北韓當然大把問題， 但所謂先進國， 好似加拿大同埋澳洲咁都有佢哋嘅問題喇。 早大祭裏面做這類學術嘢， 本來心諗會好悶， 不過又唔係喎， 幾得意， 始終介紹 booth 嘅人真係出過去留學， 見過唔同嘅嘢， 將所感受嘅嘢講番出嚟， 真係幾易明喇。
留了一段長時間之後出咗去行， 周圍都係人人人， 有啲地方仲要工程進行中， 搞到條路好窄。 冇辦法啦。 睇咗少少嘢， 食咗少少嘢， 已經發現差唔多時間， 鬼叫自己遲起身咩。 本來仲諗住A ちゃん有時間可以鼠出嚟添， 不過忙都係一件好事喇。 唯有自己行啦。
之後第一次坐副都心線， 感想：好慢！
2008/11/2 (日曜日)
死咗喺屋企， 尋晚始終都太早起身喇。 冇計。 起身， 做少少嘢， 又瞓過...
但係想成日留喺屋企都唔得， 夜晚個電飯煲無端端壞鬼咗， 應該話之前一真都有問題㗎喇。 不過今次真係返魂乏術。 冇 計之下唯有出去買啦。 遲早都要㗎喇。 九點幾先踩㗎單車出去， 鬼叫你唔早少少買咩。 話時話唔夠一個月前跟屋個爐先壞過嚟， 駛唔駛咁一不離二呀？？
2008/11/1 (土曜日)
晨咁早起身， 仲早過平時返學， 冇計啦。 八點幾就要去到小學校， 今日係佢地一年一度嘅 festival， 今年第三年去幫手喇話時話。
去到， 最初見到其中一個留學生， 平時其實都冇乜見到佢。 所以都冇乜話題。 Anyway 同上兩年一樣， 首先去到體育館 opening， 跟住就去自己負責嘅 corner， 四個人， 分別負責上下兩個 session， 自己揀咗上半。 Corner 有三個遊戲， 一個「神経衰弱」、一個 Twister， 一個双六， 自己都覺得最好玩應該係 Twister 喇。 中途自己都玩埋一份， 不過啲骨頭硬哂， 唔夠啲細路嚟， 好在中途有人話想玩， 自己先至可以大模施樣咁 quit...
到咗下半， 去咗一啲整小手工嘅地方。 唔知係唔係因為自己理科嘅關係， 特別對呢類手作有興趣喇？ Anyway 有時真係唔好睇小小學生囉。
之後夠鐘， 去埋體育館完咗個閉幕式之後再趕去打波， 遲咗半個鐘左右啦。 其實都冇乜所謂喇。 不過見到那個 SKY， 真係我諗佢都知我哋唔係咁妥佢， 不過係我嘅話就真頭唔嚟啦。 呢條友真係完全唔啱 frequency， 我地慣例去東大嘅イタトマ食嘢， 佢就永遠都係一齊嚟但剩係拎一杯清水， 佢話貴喎。 算， 自己 budget 唔理佢咁多， 總之知佢孤寒就係。 但今日咁啱イタトマ俾人包場， 冇辦法之下去咗老麥， 佢叫 K ちゃん（女仔）「幫我買杯雪榚， 最平嗰隻」... 孤寒都算喇。 仲要使人去幫你買嘢？ 完全唔明佢嘅諗法囉。個幾鐘頭入面我同埋 C くん都同佢一句都冇， 完全就係搭枱咁....
之後去到渋谷本來諗住散時， 再同 Cくん講咗陣關於 SKY 嘅問題， 咁啱 O ちゃん突然出現， 佢頭先食嘢時都應該 feel 到唔對路㗎喇。 Anyway SKY 呢單嘢真係要去認真解決先得。 最簡單嘅辦法就係佢以後都唔嚟啦。