2008/12/31 (水曜日)
返日本喇。 一朝早， 雖然都唔係話好早好早， 不過總之就係一朝早啦。 去到機場， 好充裕咁。 好有閒情咁飲咗杯咖啡先入去...
返香港時隔離坐咗個幾有趣嘅女仔， 不過呢程返日本， 隔離就係一個阿叔， 而且成身臭煙味鬼咁勁， 一聞就聞到， 冇法， 唔理佢咁多， 睇戲同埋打吓日記咁， 好快就到日本， 都真係唔知點解以前會覺得啲時間過得咁慢嘅？
返到日本時， 過咗關（唔知點解用咗好長時間）之後打個電話俾 H ちゃん， 之但係， 呀， バカバカバカ...
之後唔知食乜好， 求其去超市買咗盒お寿司同埋おでん食就算。 N 咁多樣嘢要執， 又要去買番個燈膽...
Anyway 就咁半忙半不埋嘅狀況之下迎接 2009...
今次喺香港影嘅相 （除咗周劉聯婚之外）
2008/12/30 (火曜日)
下晝去天后同佢食 lunch， 雖然考完試但係好似有好多嘢等住佢做咁， 好似幾辛苦咁， 希望佢冇問題啦。
嚟到港島， 分別諗起一個以前 EE 同學同埋一位舊同事， 舊同事應該要返工， 於是搵搵舊同學， 而家佢就幸福啦。 有個兩歲大嘅仔， 幸幸福福嘅少奶奶生活， 上去吹吹水咁啦。
之後見今日最後一日， 再 meet 一次周生周太， 結果同佢地走咗去睇床槈（？）， 兩萬銀一張床槈都幾係嘢。 不過一瞓就十年， 搵張靚嘅都無可厚非嘅。
之後有啲時間， 終於可以去買龍鬚食喇。 咁鬼多日都有啲咳， 今日臨番日本最後一日， 老虎都同你死過！ 不過銅鑼灣近 Time Square 呢間， 真係好唔掂囉。 麻麻地食得落肚...
夜晚屋企好熱鬧， 老媽子阿哥家姐姐夫， 難得熱鬧， 係咁食... 返到香港唔食唔通做乜？？
2008/12/29 (月曜日)
遊客 mode。 去到尖沙咀時有啲肚餓， 想食嘢， 行吓行吓諗起嗰間星座冰室， 即時走去慢慢食， 拎住部相機係咁影， 突然喺度扮遊客， 左望望右望望， 忽發奇想， 講英文， 仲要係單字一句起兩句只嗰隻。 當然其實又冇乜人理你， 埋單時個侍應就問“Japanese?”， 哈哈。 成功扮嘢， 冇人識穿...
之後周圍走， 其實都冇乜目的， 主要都係要去幫屋企買番個電話。 行行行， 由尖沙咀行到去深水埗， 當中專登行一啲平時冇乜點行嘅地方， 完來都幾得意㗎喎。
2008/12/28 (日曜日)
繼續古蹟之旅。 不過都係失敗。 本來想去屯門嘅馬禮遜樓。 去到冇得入， 因為係何福堂嘅領地範圍之內。 冇計之下去到隔離嘅鄉師同學會（？）， 其實都唔知乜嘢地方嚟㗎。 不過見幾特別咪行過去睇吓囉。
之後喺屯門會合咗 M 君之後就去元朗飲茶， 周生周太都應該忙完喇啩？ 約咗幾個人出嚟吹水， 睇見佢哋， 真係俾啲幸福オーラ嚇親...
不過見佢哋望咗成年， 今日終於都搞掂哂啲嘢， 可以慢慢準備新生活， 都唔錯嘛！
2008/12/27 (土曜日)
尋日去完婚禮， 瞓到隻死豬咁。 Anyway 下晝回復遊客 mode。 行吓香港嘅法定古蹟咁啦。
坐巴士出去， 其實唔太熟巴士線， 結果去咗旺角一帶落車， 去雀仔街（！）， 真係估自己唔到。 不過原來真係幾得意㗎喎。 死啦， 咁搞法覺得自己越嚟越唔似一個香港人添， 真係俾某個人講中， 變咗一個偽香港人.... まぁ。いいか（反應都咁多日文添）
之後古蹟之旅， 去到瑪利諾書院， 不過冇諗到， 但係理所當然唔俾入， 唯有喺外面走嚟走去啦。 好鬼大間， 跟住附近又有人喺教堂結婚， 唔， 果然最近好多人結婚， つうか僕もそろそろその年かな...
之後約咗幾個科大朋友去譚魚頭食， 好耐冇見， 唔， 冇次見佢哋嘅話題都可以幾唔同， 點都會講吓日本啲嘢， 跟住仲有經濟問題咁啦， 始終各位都出咗嚟做嘢嘛。
之後下場去咗麻布十番 orz... 都冇所謂喇， 好食就得啦。 返屋企， 聽 F 君話去豐景園落車， 行咗陣返到屋企喇。 唔， 屯門嘅地理始終都唔多熟...
2008/12/26 (金曜日)
周劉聯婚
終於都嚟到今次返香港嘅戲肉。 今日終於都到呢兩位好友嘅大喜日子喇。 好多人都問我係唔係做兄弟， 唔， 本來都想， 不過之前乜都冇傾過， 而且又夠人， 於是就決定做今次婚禮嘅第四個攝影師， 反正我本身都諗住係咁影相㗎喇。
朝早先去到食早餐， 有少少遲到， 不過都冇問題喇， 反正成大班人一齊遲嘛。 去到男家， 佈置亦都好結婚（當然啦）， 做埋最後少少準備， briefing， 準備好， 出發！
㗎車行錯路， 行咗個大運先去到女家， 唔緊要， 好似嗰邊都有啲嘢未準備好， 總之去到就開始接新娘， 哈哈。 自己唔駛做兄弟， 就睇住新郎哥同埋啲兄弟點樣俾人玩喇。 玩咗幾個遊戲， 都真係唔太想玩... 辛苦班兄弟喇！ 我有將呢個悲壯嘅情況記錄落嚟㗎！ 話時話呢班姊妹駛唔駛咁狼呀？
排除萬難， 終於都等到新娘出嚟喇， 老實講， 呢個新娘見過唔知幾多次， 不過， 今日真係忍唔住要讚一句：好靚！ 果然結婚呢日真係特別唔同啲。 之後要敬茶等等， 自己雖然係傍觀， 不過都真係好感動。
之後再去男家敬茶之後， 兄弟姊妹去咗食飯， 做少少雜務之後， 返返男家， 一行人出發去會展婚宴場地。 一去到， 因為美食節嘅關係， 好多人！ 不過都唔關事喇， 上到去場地時， 開始幫手準備， 其實都係幫手執頭執尾， 之後就去咗周圍影相...
準備得七七八八， 賓客都開始嚟， 自己都幫手影吓相吹吓水咁， 另外喺個場地嗰度， 兄弟姊妹幫手採排吓咁。 全部人都好緊張咁添... 最擔心， 應該係兩個司儀喇。 自然啲得㗎喇！
差唔多準備好時就開始喇。 新郎新娘首先入場， 白色嘅禮服同埋婚紗， 最重要嘅一刻即將來臨。 計埋兩位父親同埋律師， 五個人喺台上， 而台下， 就有眾多親友去見證呢兩個人嘅約定。 由律師引領之下， 兩個人完成咗成個結婚儀式， 由今日開始佢地成為夫婦...
就喺呢個時候， 新郎嘅謝辭裏面， 意想不到嘅對白， 令到好多人都好感動， 唔少人喊咗出嚟.... 佢都古惑喇， 之前一直都唔肯講會講乜， 一嚟， 就令到台上台下咁多人喊， 真係... 真係戳有關嘅人開心。
晚宴， 邊食， 邊影相， 呢個時候唔係咁多時間可以接觸新郎新娘， 同吓其它兄弟姊妹等等吹水， 同埋搵時間影相咁啦。
直到晚宴嘅最後都留咗喺會場， 我呢個唔係做兄弟嘅都夠哂兄弟喇啩？ 不過可以做到啲嘢幫呢對新人， 自己都會覺得好開心嘅~~
2008/12/25 (木曜日)
今日都冇特別約人。 不過有啲嘢要返舊屋拎， 冇辦法。 返返去上村嘅舊屋。 點知中途有間車場火災， 結果行咗一段路...
返到舊屋， 有啲感觸良多喇。 屋就冇乜點變， 不過一大堆雜物凌亂咁放， 特別挑起呢一年屋企發生唔同嘅事嘅感覺， 雖然自己當時喺日本， 唔算係在場見證， 不過亦唔會改變呢個事實：屋企已經同以前唔同。
返完屋企拎嘢之後亦都去咗以前小學附近一帶， 呢度就更加大變化。 真係唔認得， 以前嘅小學完全地荒廢， 今日真係特別多感觸...
之後又約咗幾個朋友， 吹吓水咁。 幾個朋友入便好多都已經結婚喇， 真係越嚟越覺得自己真係到咗結婚嘅年齡， 呀哈哈， 不過呢...
食完嘢， 遊吓元朗， 跟住早早返歸， 聽日就係朋友嘅大日子喇！！
2008/12/23 (火曜日)
繼續遊客之旅。 先去咗熟到好緊要嘅元朗， 今日又係去一啲舊地方睇， 中景壚， 細細個時已經去嗰邊走嚟走去， 而家同以前都幾大分別吓喇， 好多南亞裔嘅人喺嗰邊生活， 整體嘅氣氛好唔同。 拎部相機出嚟其實感覺上幾危險咁， 不過又真係想影喎， 冇辦法啦。 偷偷摸摸咁影。
之後由荃灣坐船去馬灣， 真係唔知幾時嚟過， 今次嚟可以話係一個新嘅地方， 真係唔太熟。 栢麗灣好似之前拍過電視劇咁， 所以地方真係可以話係幾“靚”， 不過真係一個設計出嚟嘅地方， 環境好可以話係理所當然喇， 穿過馬灣公園之後， 去到一個自己覺得係真真正正嘅馬灣－－一堆屬於漁民嘅村屋， 望落去真係幾有特色， 不過好多屋都荒廢咗， 等拆啩？ 真係望上去有啲可惜咁， 有一啲妻涼嘅感覺。
有趣嘅係， 中途經過時無端端有班細路仔喺度掟糖， 其實真係唔知發生緊乜嘢事， 跟住有個細路無端端俾咗粒糖自己， 都係莫名其妙， 不過， 感覺， 好 warm。
夜晚約咗 J さん， 幾耐冇見過佢呢？ 又一城， 真係一個幾有趣嘅地方。 畢業之後冇見 J さん一段時間， 重遇， 就係喺呢個地方。 好耐之前嘅事喇。 嗰時真係令自己諗起中學時唔少嘅感覺。 今日返嚟同佢食飯， 亦都係好多嘢諗嘅一日。 究竟四年前所講嘅嘢， 到今日佢又點諗呢？ 呀。 四年喇。 乜過咗咁耐㗎喇....?
2008/12/22 (月曜日)
下晝約咗人傾保險啲嘢， anyway 之前去咗荃灣行吓。 今日點都會自己以呢個遊客嘅眼光去睇香港呢個地方， 原來真係可以有好多以前唔會有嘅發現。 幾得意， 雖然話 Digital camera 影相係唔會在意菲林嘅問題， 不過始終諗住俾人睇嘅話就會影一啲有趣嘅嘢。 幾有趣。
去旺角時首先 join 咗一個唔識嘅人， 冇計， 托運嘛， 之後再去朗豪坊會合兩個朋友， 畫咗隻龜之後就 cancel 咗份保險喇。
之後又做遊客， 行吓油麻地一帶， 平時行有心買嘢只會沿彌敦道直行喇。 點會行去附近嘅地方吖， 今次特登走去油麻地果欄嗰邊睇吓， 睇吓睇吓， 總覺得再遲啲可能會再見唔到呢度嘅光景咁， 所以就係咁影相喇， 哈哈。 都會以呢個遊客嘅眼光去影喇。
夜晚返屋企食飯， 好耐冇飲老媽子嘅湯喇。
2008/12/21 (日曜日)
起身時屋企已經冇人， 冇計之下執好個人， 走咗落街大家樂食午餐（一路都搵唔到盒 wax）， 食完， 返屋企悠閒一吓， 走去元朗會合今次令自己返嚟嘅兩個人－－一對新人喇。
去到元朗， 會合咗 S 君， 跟住 C さん， M 君同埋 K さん都前後腳到， M 君尋日見過， 另外三個人都真係好耐冇見喇。 傾婚禮當日嘅細節等， C さん同 M 君當日做 MC， 應該冇問題啩？ 總之佢哋唔好太緊張就得。
好快嘅時間， 跟住夜晚由於要返屋企食飯， 所以六點左右就閃人喇。 返屋企去也。
去到屋企， 又走返落樓下間酒樓， 六個人食飯， 都係求求其其咁。 吹吓水， 屋企雖然有幾大嘅變化， 不過總算冇唔可以解決嘅問題啩？
一路講電話一路係咁咳添....
2008/12/20 (土曜日)
朝早就起身去飲茶， 做廳長係有啲唔慣， 所以有少少攰咁啦。 不過最大問題應該係咳都仲未好得番... 唔理咁多喇， 有嘢就食。
之後出咗荃灣處理一啲雜務， 由於屋企附近個商場冇乜嘢特別嘢睇， 屯門又唔熟路， 索性去咗荃灣睇。 最緊要係彈藥， 去銀行兌錢， counter 個姐姐仔話兌 8.59 有冇問題， 緊係冇問題啦， 差啲笑咗出嚟。 跟住做埋一啲轉戶口等等， 俾另一個姐姐仔 sell 咗個保險， 算喇， 反正都係買， 搵個 minimum 去買就算。
途中會合咗 M 君， 一齊去食嘢， 咁耐冇食香港嘢， 去咗翠華， 其實都係一般啦。 當自己係遊客俾人呃又有乜所謂？ 文昌雞飯， 真係唔知有乜特別， 海南雞走骨？
之後 M 君帶咗自己去港鐵會所閒聊， 吹吓水咁啦。 咁耐冇見， 講吓近況， 講吓點解會去咗屯門等等....
之後同屋企人食飯。 得四個人， 老豆其實真係唔知有乜好講， 而且好似有少少冇組織嘅對話， 唔係好明添。 總之和和平平食完餐飯佢啦。
返到屋企， 繼續一啲雜務。 飲咗啲咳水， 好眼瞓....
2008/12/19 (金曜日)
返香港也...
尋日啱啱喺機場返嚟， 今日又去機場。 不過唔駛好似上次晨咁早去， 都仲好少少啦。 朝頭早算有啲時間可以執吓嘢， 買埋少少嘢同埋去 renew 單車場張定期劵。 不過都比起想像中趕頭趕命。 最麻煩就係洗衫， 啲衫又未乾.... 最撞鬼係臨出門口時厠所盞燈突然壞鬼咗... 好似買咗半年左右， 仲要係慳電膽嚟㗎喎？？ .... orz
Anyway 寫埋幾張年賀狀（差啲唔記得咗）之後就出門口。 唔算好有鬆動， 去到車站啱啱好。 坐車坐車坐車....
坐到去成田機場， 冇乜嘢做。 快快手手咁 check-in, 跟住買咗本書睇吓。 冇乜好做， 就去咗登機口嗰度做嘢。 有部 notebook 做嘢又真係唔同啲嘅。
之後上機， 果然全日空真係唔同啲， 二三二嘅座位編排， 感覺上都闊好多。 坐隔離嘅一個日本女仔， 最初冇乜傾計， 後來傾咗一陣， 越傾越得意， 最得意應該係佢嘅反應喇， 因為佢其實 stay 咗喺 London 六年左右， 所以反應都好英文化， “wow”喺正常嘅日本人口裏面絕對聽唔到。 做 design， 有少少風馬牛， 不過都傾到幾多嘢， 幾得意。 話時話搭飛機時識到人， 今次都可以算係第一次... （雖然又唔係真係成日搭飛機）
去到香港， 因為之前好耐都起唔到飛， 比預定時間遲咗少少咁啦。 有阿哥同家姐， 仲有姐夫同埋姻世伯， 真係有啲嚇親。 點都好， 有車送， 一字記之曰爽！
返到屋企， 新嘅屋企， 真係唔係好慣， 不過唔慣都要慣喇。 冇乜地方， 自己張床都冇咗， 唯有做廳長啦。 都冇乜所謂喇。 之後都係瞓十日左右啫...
做少少雜務之後， 準備聽日開始喺香港十日嘅生活....
2008/12/18 (木曜日)
回程日。 朝早反正都去唔到乜嘢地方， 食完早餐， 執一執嘢， 休息咗一陣， 總算可以返去喇。 好鬼早去到機場， 晨咁早 check-in 同埋周圍行吓。 想買書又買唔到， 想睇下電子字典又唔啱心水， 算鬼數。
上機， 同嚟嘅時候完全同一個位， 之後睇戲同埋做自己嘢， 結果唔知點解好鬼快， 套戲去到差唔多完時就落機， 果然同香港差咗一個鐘頭就係唔同啲。 順順利利快快手手返到成田， 之後就坐 YCAT 返歸...
今次去到台灣有幾多嘢睇， 第一係嗰邊嘅男仔真係幾搏命讀書， 外表同日本嘅人比真係差好鬼遠。 第二係真係唔知點樣講馬路， 周街都係電單車， 亂咁講分分鐘俾人撞死。 第三係最重要嘅一件事， 如果我想話俾人知我唔識講普通話， 最簡單嘅方法唔係用英文講“I don't speak Mandarin”， 而係用國語講“我不懂得講國語”, 用英文嘅話啲人仲堅持用國語同自己講， 但係我自己首先用國語之後啲人就即刻唔用， 好有効， 萬試萬靈。
好， 聽日飛香港喇！！
2008/12/17 (水曜日)
Workshop 嘅第二日。 朝早又去到國立交通大學， 不過去到時一個人都冇， 原來係個司機帶錯咗我哋去尋日 conference 嗰個地方。 好在我有笹瀬先生嘅電話， 先至可以 confirm 番正確嘅地點。 首先係 lab tour， 行咗陣， 有啲幾得意嘅 project， 不過點講好呢， FYP 之類做嘅話都應該幾得意， 不過去到 graduate level 嘅話自己就有少少保留喇。 總之就好難講喇。
之後自己嘅 poster session， 其實就係講咗兩分鐘， 同埋同兩個人傾咗一陣自己嘅 research， 係咁多， 之後好似趕時間收檔咁， workshop 基本上就咁樣完咗。
之後食晏之後行咗陣 campus， 真係幾大， 同埋觀察啲學生時都會覺得好有趣。 之後會合埋啲 Professors 之後， 就出發去新竹嘅 City tour， 新竹有啲乜其實諗都冇諗過， 不過都幾得意， 有玻璃博物館啦， 有城瑝廟啦， 有乜鬼門（唔記得咗）， 都幾得意， 不過老實講， 幾攰... orz .... 但係幾好玩
晚飯去咗一間原住民主題餐廳食， 兩圍枱， 一張學生一張 professors， 不過同那邊嘅大學生其實唔算係太多話題， 有少少唔知點咁。 後來一路食一路咁搵話題， 我諗都 OK 啩？ 唔知太多喇。 不過呢餐， 總之就係好多嘢食， 多到完全食唔哂， 果然係台灣， 真係唔同啲。
食完嘢返到酒店， 同其中兩個 professors 同埋幾個學生吹咗陣水， 不過其實咳得好勁早啲返房應該會好啲.... 之後飲完杯嘢就即刻返房瞓喇。
2008/12/16 (火曜日)
第二日開始 workshop， 朝早去到台灣國立交通大學， 首先望咗陣 campus， 總之就覺得好大。 比起矢上真係唔知大幾多。 anyway 好快就開始講座， 好鬼悶， 加上食咗啲藥， 成個人死吓死吓咁， 不過我諗冇食藥都係咁樣死法㗎喇， 冇乜分別。
今次 workshop嚟講， 最意外嘅應該係可以再遇番 Prof Vijay 喇。 Prof Vijay 喺 IEEE 裏面可以話係一個舉足輕重嘅人， 而且好有幽默感， 本來眼瞓到想死， 不過到佢個 talk 時又好鬼精神。 我諗呢個 workshop 裏面算係一個最大嘅收獲喇。 好掂。
夜晚嘅 party， 飲飲食食， 同呢度嘅同學吹吓水咁。 佢哋英文唔算得上好好（點都好過我啲國語嘅）， 所以有時都好難溝通。
之後返到酒店， 同同行嘅另外四個 RA 傾咗好耐計。 吹水吹水， 反正聽日都冇乜重要嘢...
2008/12/15 (月曜日)
出發去台灣。 今次第一次去喇， 其實真係完全冇準備過， 感覺就好似去日本唔知邊到 camp， 準備都懶得做嗰隻。 Anyway 一朝早起身， 執吓呢樣執下嗰樣， 差少少就唔記得拎 passport, 唔理咁多喇。 出發去横浜駅， 會合咗 Madu 之後出發。 果然有個伴嘅話時間都會過得快啲。 好快就去到機場喇。
之後會合其它幾個朋友之後就準備 check-in， 不過一路係咁咳， 都唔知自己得唔得。 唔理咁多喇， 死就死。 上機之後都冇乜特別， 六個人排排坐。 吹下水， 真係好快又飛到去台灣。 入境時想問落地簽證嘅嘢， 嗰條友又叫自己照排， 排到自己時又被踢返轉頭， 玩嘢咩！ 結果俾咗二百台幣入境... orz..
去到台灣其實都完全冇計劃， 總之去咗車站先算， 連點樣去都冇諗過， 差啲俾個的士佬呃， 好在有警察... 去到台北， 本來六個人， 不過其中一個人有啲唔舒服， 結果佢同另一個人返咗酒店先， 剩低四個人去行台北。 其實都係冇乜計劃。 自己因為冇帶皮鞋， 所以要去買一對， 而 Madu 就想搵本書， 另外就冇所謂喇。 搵咗 Madu 間舖頭先。 完全唔識路嘅情況下亂咁搵， 都算係搵到間舖頭。 真係好鬼多書， 不過又唔係真係平好多。 所以自己都冇買到啲乜嘢。 之後買咗對鞋， 好鬼貴， 仲要貴過日本買， 真係好後悔唔記得帶對鞋嚟... 哎， 冇計。
之後去咗台灣最高嘅 101， 真係好鬼高。 見慣横浜嘅 ランドマーク， 同埋香港嘅 IFC， 不過都係覺得 101 好高， 入到去， 即刻諗住醫肚。 去咗下面嘅 foodcourt， 好多嘢食但係唔知點揀， 跟住索性去咗上面嘅上海餐廳。 同行三個人都係外國人， 所以唔係地道台灣嘢都冇問題。 係咁叫餸， 食食食， 食到想死咁， 都係食咗兩千幾台幣， 每人五百左右埋單， 平到死！！
之後最重要嘅， 就係上去101 展望台喇。 㗎笠鬼咁快， 好快就上到八十九樓， 展望台簡直就係絕景。 台北一般嚟講啲樓都唔係咁高， 所以真係一望無際。 四個人上到去， 買嘢， 食嘢。 好鬼爽， 之後出到去八十九樓屋外， 去到外面， 好好好好鬼大風。 真係企都企唔穩。 加上有少少傷風， 所以都係唔好勉強自己喇。 走返落去下面個 dumper(?)嗰度， 好得意。
之後返返酒店， 冇乜嘢都係快啲休息好。 咁就玩完一日喇。
2008/12/14 (日曜日)
広東語サークル嘅忘年會， 約咗去 K くん嘅宿舍打邊爐。 首先去咗渋谷買嘢食。 真係好， 有其中兩個學生係主婦嚟， 完全唔駛自己擔心買乜好， 除咗我一定要食嘅帆立貝...
去到宿舍之後， 無幾耐 H ちゃん就打電話嚟喇， 於是即刻出去接佢。 實在好耐冇見過佢喇， 成兩個月喇。好似瘦咗少少， 其它嘢都冇乜點變。 好耐冇咁齊人， 而 party 都幾好， 係咁吹水， 氣氛都真係幾好。
夜晚去咗食少少嘢， 順手傾吓二月香港嘅行程， 不過同尋日一樣係咁咳。 唔， 大件事....
聽日出發去台灣， 真係唔太覺得係乜嘢， 好似去唔知邊到 camp 咁嘅心情， 不過點都好， 要早起身....
2008/12/13 (土曜日)
今年嘅最後一次羽毛球， 都有幾個朋友嚟咗， 包括好耐冇見過嘅 M くん， 都同平時差唔多啦。
之後去新宿嘅 Sizzler 食飯， 第一次去， 感覺唔錯， 嗰個價錢剩係 main 嗰個扒嘅話就一般， 不過 Salad bar 任食， 完全唔同講法囉。 尤其係生果任食， 真係冇得彈。 不過尋日到而家個喉朧都仲痛緊， 好多嘢都冇得好食... orz...
之後有啲時間， 其中一個朋友想搵書睇， 之後就去咗附近嘅一間書店， 自己就冇乜特別書想買， 係咁等， 三個男人無無聊聊咁去咗占卜書個 corner 喺度睇生日占卜準唔準.... orz...
2008/12/12 (金曜日)
一朝早本來諗住去捐血， 不過一驗就發現白血球過多， 即係病咗喇... 冇計。 呢個時間自己都唔覺得有乜嘢所以先去捐， 不過唔得都冇計啦。
返學校做返啲嘢， 印 poster 等等， 其實都唔係乜嘢大不了嘅事，不過都係嗰句：濕碎！ 好鬼 interrupting 囉。
之後去廣東話班， 之前首先打咗個電話俾啱啱返嚟嘅 H ちゃん， 有少少俾佢嚇親， 啲廣東話好咗好多。 傾咗一陣咁大把啦。 之後上堂， 個喉嚨就越整越痛， 之前講電話時都好地地， 唔知發生乜嘢事， 由最初嘅機械人聲， 去到最後出唔到聲， 真係幾辛苦， 好似就嚟斷氣咁囉。 啲學生見我咁嘅樣俾咗包藥我食， 好鬼苦， 不過理所當然喇。 今年嘅最後一堂廣東話班咁樣完咗， 埋門一腳先嚟撻Q 咁... 算啦。 都冇計。
2008/12/11 (木曜日)
係咁寫張台灣 workshop 嘅 poster， 好煩好煩， 唔想寫呀....
開始用 Facebook， 好耐之前其實都有用過， 不過覺得太煩所以冇用到， 但始終太多人用喇， 自己睇下可以點樣用令到佢冇咁煩啦。
2008/12/10 (水曜日)
一朝早返小學， 今日最後一日喇。 好開心咁影咗好多相， 同埋收到啲小朋友嘅信， 好開心吓。 不過後來校長打電話嚟， 話冇批准唔可以影相， 要 delete 哂佢喎， 呀....
好多雜務要做， 一來要做 poster， 二來 n 咁多份申請表要填， 三來係卡片， 好鬼多鎖碎事囉。
之後去町田， 途中同 Madu 一齊， 坐 JR 時見到 JT 啲廣告， 總之就好礙眼囉。 唔想見到， 其它私鐵基本上都唔會見到㗎嘛。
之後同朋友 Y さん 食飯， 係咁吹水吹水同埋吹水....
2008/12/9 (火曜日)
一朝早又有 meeting， 跟住下晝到 M1 嘅發表練習， 整吓整吓全日冇鬼咗。
台灣 workshop， 真係唔係好知佢想點咁。 有諗過快快手做， 不過咁多嘢未定都係睇定啲先好。
2008/12/8 (月曜日)
終於都作完文， 但係即刻又要做 poster 啲嘢， 真係幾多無謂嘢做， 好就好在算係可以幫自己整理一吓 research 啲嘢， 但係始終好似用太多時間囉。
下晝 GCOE 嘅 lecture， 搵咗以前啲學生嚟開 talk， 通常都好悶， 不過今次都仲好， 講吓論文同埋實際 deployment， 自己有時覺得兩頭唔到岸咁。 聽吓都唔錯。
夜晚返到去好快就死咗....
2008/12/7 (日曜日)
尋日提過嘅早起き生活， 今日， 遲起身遲到鬼咁， 點早起法？！
約咗兩個朋友去睇戲， 之前去咗一間中式餐廳食嘢， lunch 價錢都仲可以， 不過夜晚食都幾攞命咁。 anyway 幾好食就得啦。 之後睇戲， 杜琪峯嘅“放逐”， 冇乜劇情可言。 不過就係咁槍戰， 同埋人物之間嘅關係表現得好好。 睇完之後去ジョナサン吹咗陣水...
夜晚一路寫埋份 workshop proceeding， 一路同個朋友傾佢嘅問題， 哎呀呀， 自己份文都未搞掂就唔好多管閒事喇。 但係有啲嘢又真係睇唔過眼喎。 而且睇返自己嘅 mail， 都覺得自己有少少唔夠客觀咁添。
2008/12/6 (土曜日)
尋日發現一個叫早起き生活嘅 website， 每日紀錄自己幾點起身。 唔。 禮拜六， 冇計.... orz...
羽毛球日， 好耐冇見嘅朋友 O ちゃん， 佢之前啱啱返咗泰國， 機場又唔知點咁， 亂七八糟。 Anyway 見到佢就好啦。
之後返去横浜同個朋友 K さん食飯， 吹水吹水同埋吹水。
2008/12/5 (金曜日)
冇嘢好講， 繼續 GCOE workshop 嘅作文。 呀， 好鬼煩， 不過有得去台灣玩吓， 都好過冇啦。
夜晚廣東話班， 今日嚟咗一個新學生， 係一個喺日本做緊嘢嘅中國人。 唔， 即係話文法方面唔駛點教佢都得， 係發音同埋一啲單字要執吓咁解？
話時話， あと一週間か…
2008/12/4 (木曜日)
尋日去咗生協諗住叫印卡片， 今日去對板先知收貴過 online 好多， 跟住叫佢 cancel 但係又話個版整好咗 cancel 都要收 charge 云云， 唔， 雖然自己真係有啲大意， 不過佢由頭到尾都冇講過個價錢， 所以覺得同 online 印差唔多喇。 唔。 後來個店長出嚟就話可以就咁 cancel， 唔， 唔係幾好意思咁， 不過唔理咁多喇。
下晝繼續作文。 越作就越覺得熱。 成個 lab 好似冇人發覺咁。 個暖氣 set 咗去 20℃， 唔算太熱吖。 但係睇下個 friend 個溫度計先知， 原來當時有成28℃！！ 唔怪得啦。 熱到咁， 唔怪得個人好似傻吓傻吓咁...
2008/12/3 (水曜日)
繼續作文。 唔， 其實都真係係咁寫， 真係有少少唔知自己寫乜， 算鬼數喇。 有貨交就 OK。 反正其實都冇人 care...
夜晚去剪頭髮， 髮型師就即係髮型師， 一開始就注意到自己換咗眼鏡， 剪頭髮會留意個客個面形我都可以明白， 不過眼鏡每次都係一開始就除， 咁都記得， 真係佩服！
2008/12/2 (火曜日)
返到學校， 好靜， 冇乜人。 應該要盡力寫 report， 不過 deadline 竟然喺呢個時候延遲， 唔， 咁 deadline effect 就自然冇發生喇， 悠悠閒閒。 不過其它嘅 deadline 真係逼緊埋嚟， 點算好呢？
Anyway 叫做有啲事做時就硬係有啲無厘頭嘅嘢走嚟搵自己做， 唔， 都冇所謂， 不過 S 君嘅電腦要裝 MS Office， 總之就麻煩到鬼咁， license key 都唔知點搵返出嚟...
之後返到屋企做嘢， 唔... 唔係太高効率添。
2008/12/1 (月曜日)
一朝早起唔到身， 直到架垃圾車嚟到先起到身 orz....
之後返學校， 開會， 例牌咁好多閒計， 講咗好耐先入到正題， 唔...
跟住下晝做咗少少嘢， 又開始 special lecture， 撞鬼， 今日真係做乜呢？ 夜晚返到屋企， 突然有幾個人分別求救求教， 仲有傾閒計， 唔， 平時又唔太覺得佢地會咁多 message 㗎喎？
呢一年咁就剩得一個月喇。 好在都叫做份論文誌 OK， 如果唔係真係唔知自己呢一年有乜嘢 output...