2009/3/31 (火曜日)
平靜嘅一日。 朝早瞓晏咗少少， 不過都仲 OK 啦。
返到學校， 做咗少少嘢之後就去咗食 lunch， 不過真係早過平時好多囉。 唔係好慣， 冇計， 一點有 meeting， 唔早啲都唔得。 但係因為笹瀬先生有事遲到， 個 meeting 延遲咗..
個 meeting 結果喺笹瀬先生未到嘅情況下開始咗。 唔， 冇乜所謂喇。 反正都唔係聽。 去到兩個由於有 ITC (Information Technology Center) part time 嘅 briefing， 所以中途走咗喇， 唔， 結果 part time 都係做返自己最熟嗰行。 仲好， 唔駛點 pick up， 一齊做嘢嘅人起碼都有啲共通話題啩？
有啲意外嘅係元 GCOE 嘅一個同學都喺個 briefing 裏面， 呀， 唔記得咗佢已經冇喺 GCOE 做 RA， 結果嚟呢度做 RA， 唔， 人工偷睇到都叫幾 OK 咁啦。 畢咗業之後未搵到工嘅話都可以考慮吓。
Briefing 完之後， 總算可以專心返個 research， 唔， 之前諗到嘅嘢好似有少少問題... 不過唔掂咪整到掂囉。 冇乜嘢好煩！
2009/3/30 (月曜日)
平靜之中又有啲變化。 本來今日冇乜人喺 lab 到出現， 可以專心咁做吓嘢， 不過收到學校 office 嘅通知， 可以上去七樓嘅 PhD room， 老虎都上去睇吓乜嘢環境啦。 本來五樓個位真係俾嗰個印度人搞到坐唔落囉（又嘈又臭）。 上到去， 環境幾好喎！ 兩個人拍住， 後面係窗口， 可以望到富士山同埋 Landmark Tower， 唔錯唔錯。
有新地方， 即刻去五樓執嘢走人。 唔， 搬咗啲雜物上去七樓先， 之後點整慢慢先算
另外下晝本來有研究室 meeting， 去到一半嘅時候走咗去 ITC 嘅 part time briefing， 唔， 唔做 part time 支持唔到生活喇... orz...
2009/3/29 (日曜日)
お花見＆追いコン
一朝早起身， 都唔知點解仲早過個鬧鐘囉。 自己有時都覺得好勁㗎， 到而家基本上都未試過因為瞓過龍而遲到（當然， 因為其它原因遲到就多的是）
準備好之後就出發去吉祥寺， 地理上嚟講其實都幾遠， 不過加埋結果都係一個鐘頭左右， 意外地快囉。 去到， 等咗一陣就會合 Yさん， 今次好彩有佢咋， 唔係都唔知點霸位。 自己其實真係乜都冇準備咁濟囉。
Anyway 舖好個陣之後， 去咗附近搵啲嘢食， 話時話吉祥寺一帶真係冇乜點嚟囉。 有乜嘢類型嘅舖頭真係一無所知， 唔理咁多喇， 有嘢落肚咪得囉， 理咁多仲乜鬼丫。 本來去イタトマ不過太臭煙味所以撒退， 結果去咗一間墨西哥風嘅舖頭咗碟腸仔...
之後再去原本嘅陣地， 要嚟嘅人都陸續嚟到， 首先開餐， 不過自己啱啱先食完嘢， 所以剩係食零食就算， 之後玩咗一樣好耐冇玩嘅嘢 -- UNO， 香港嘅 UNO 真係加咗幾多無厘頭嘅 rule 㗎， 尤其係 cut 牌呢個動作真係佢哋想像之外， anyway 好在全部人都有興趣玩喇！ 於是就係咁係咁 draw 人 cut 人同埋俾人 draw， 都唔記得咗幾勝幾負喇。
玩到咁上吓都差唔多時間， 執嘢走人。 今日之後唔知幾時先有機會見到 H ちゃん同埋 A ちゃん喇， 兩個人都開始返工， 太多變數喇， 唔， 呢排終於都發現三月真係一個離別嘅季節（起碼喺日本嚟講）
之後去到日吉參加 farewell party， 研究裏面嘅 M2 同埋其餘幾個人， 某程度都係離別， 不過呢... どうでもいいや。 都冇乜邊個係特別熟落囉。 所以都冇點放喺心度。 反而今日有趣嘅係不斷咁同其中一個 B4 吹水， 其實之前一直都冇乜同佢講過乜嘢， 但原來意外地幾啱咀型㗎喎。
食完都係唔夠飽， 返屋企再食...
2009/3/28 (土曜日)
羽毛球日， Kちゃん帶咗一個新朋友嚟， 不過可惜佢剩留喺度唔係太長日子， 咁難得識多個朋友嘛。
夜晚返到屋企就係要準備聽日花見嘅嘢， 唔， 其實都唔知點解自己會做咗執行委員囉。 雖然都樂意做嘅， 好在之後都總算搵到人一齊去霸位， 如果唔係一個人真係唔知點同你死過。
2009/3/27 (金曜日)
返學校做少少 research 嘢， 其實之後都冇乜時間。 有時啲時間真係過得鬼咁快... 新嘅 algorithm 算係寫
唔理咁多喇， 下晝廣東話班係咁易準備一吓， 唔， 最近好似有啲懶過以前嘅傾向， 俾着以前會用多好多時間去準備囉。 不過好多原因嘅， 教嘅內容又唔同咗嘛。
三月嘅最後一堂， 之後四月開始嚟得到嘅人睇怕都會同以前唔同。 至少佢同埋佢都唔會有太多時間嚟得到喇。 唔... 都冇辦法， anyway 今堂其實都同平時冇乜分別喇。
不過要問自己嘅係， 其實呢個廣東話班仲可以做得幾長呢？
2009/3/26 (木曜日)
朝早起身， 食食吓早餐， 突然望去出面...
落雪？？
有啲懷疑自己對眼， 於是走出露台， feel 吓， 又真係落雪喎， 不過奇就奇在呢日好似都仲好暖吓， 望一望天氣報告， 三度... 哦？ 三度？ 唔係啩？ 仲要連個天氣報告都有個雪人喺度， 冇計， 唔信都唔得。
不過好快就停咗喇， 過雲雨， 呀， 唔係， 過雲雪。 準備一吓， 返學， 做嘢， 依然係悠悠閒閒咁。 連笹瀬先生都走咗過嚟話自己冇嘢做， 吹咗陣水， 講吓溫泉講吓其它話題。
2009/3/25 (水曜日)
其實都好似唔係第一次講， 有好多時朝頭早都可以莫明奇妙咁用兩個幾三個鐘頭先準備到出門口， 始終唔係好似以前返工或者上 lecture 有一個定咗嘅時間， 自由有時唔係一件好事囉。 呢個時候諗起笹瀬先生提過， 自由嘅時間俾一個唔識控制時間嘅人， 同俾一大筆錢一個仔其實冇乜分別。 自己喺呢個層面嚟講， 其實仲係一個仔。
不過呢， 唔知點解有 part time 嘅時候又真係未試過唔記得起身㗎喎。 呢方面嚟睇自己又可能冇乜問題... 唔...
唔理喇， 之前 simulation result 唔係好得， 冇辦法之下唯有重新諗過個 algorithm， 算係有辦法， 跟住其實可以落手 implementation 喇， 今次寫啲 code 都算係幾 extendable， 所以要寫新嘢上去應該唔會用太多時間啩？
不過反正都趕唔切 deadline， deadline effect 自然就消失咗， 好悠閒...
話時話， 最近突然有興緻重新練琴， 不過放低咗咁耐， 手指又硬返哂...
2009/3/24 (火曜日)
繼續 simulation， 不過其實個結果睇到喇， 再繼續做落去其實都冇乜意思， 冇計，今次嘅 Globecom 唯有放棄啦。
唔， 嘢始終都要繼續做， 之前諗到嘅嘢唔係行唔通， 只不過係 improvement 太細， 交上去都冇意思。 仲有地方可以做 improvement 嘅， 不過都算係要大改喇， 唔緊要， 照做照做， 做咗唔得先算， 諗太多都係假， 諗過另一個方向反而更加嘥時間嘛。
夜晚 IEEE GOLD 嘅聚會。 其實都幾遠， 去到上野， 平時山手線上半部真係冇乜幾可去囉。 今次有一位香港嚟嘅 IEEE GOLD member 嚟咗， 算係一個聯誼活動啦？ 自己雖然都係香港人， 不過係日本呢邊嘅 GOLD committee， 身份都幾曖昧... 唔緊要， 都係吹水， 呢位 guest 果然係香港人， 聚會裏面講咗好幾次“no money no talk”， 咁係嘅， 冇經費又真係好難搞活動。 結果係一個好奇怪嘅 meeting， 得嗰六個人， 唔知點解可以出現廣東話， 英文， 日本語， 普通話四個語言囉。 唔， 有趣有趣。
話時話， 今晚食嘅墨西哥餐廳， 有一杯叫黄金可樂嘅物體， 一飲... 玉泉忌廉梳打...? 有啲俾人搵老襯嘅感覺...
2009/3/23 (月曜日)
朝早 set 好部機做 simulation， 之後返學校， 兩部 notebooks 加埋屋企部機係咁做 simulation， 出嚟嘅結果麻麻， 用咁多時間個差別都係 0.5% ~ 1% 左右， 唔係話唔可以 submit， 不過真係冇乜特別囉。 要諗吓點樣 improve 個 result...
唔， 成日就係咁樣 simulation， 結果唔太滿意所以都好難寫落去份 paper 到喇。 唔.... 悔しい〜〜〜
2009/3/22 (日曜日)
成日都留喺屋企 take data， 唔， 其實聽起上嚟好似好忙咁， 不過係改一改啲 parameters， 跟住就由得部電腦係咁 run 番一兩個鐘， record data 之後再改 parameter， 所以其實好得閒吓。 唔， 都要趁呢個時候就吓其它平時唔多會做嘅嘢， 例如睇吓書啦， 清埋啲 game 啦 （おいおい）。
唔， simulation 嘅結果始終都係麻麻哋咁。 唔， 點算好呢， 不過又唔想放棄住， 再睇多幾個 scenarios 先算。
呀， 今日 M 君生日。 生日快樂呀！
2009/3/21 (土曜日)
羽毛球日， 由於冇哂羽毛球嘅關係， 冇辦法， 要去買個筒新嘅， 不過間舖頭好似搬鬼咗咁。 冇辦法， 去到渋谷不斷咁搵， 都幾難搵唔， 唔係講笑。
之後去到， 得 H 君一個人嚟咗， 吓？ 雖然知道有三個人嚟唔到， 不過其它人呢？ 後來另外三個人都總算出現， 但係其它人冇聯絡囉。 唔， 講真自己同埋 C 君都有少少不滿喇。 一個唔覺意得兩個人嚟點算？ 唔... 唔... 算喇， 照打， 唔理咁多。
話時話算係新 member 嘅 N さん， 由於佢唔多識日本語， 結果去吹水時其實用咗一半時間去翻譯， 冇計啦， 算係比較熟日本語同埋英文嘅得我同埋 C 君， 但就算點講都好， 有時有啲位都真係唔知點同你譯好囉。
之後返屋企， 繼續 simulation， 唔， 出事， 個 proposed scheme 同埋 conventional scheme 嘅 performance 好似冇乜出入咁添。 之前 test 嗰時都仲好啲㗎... 冇計， 試多幾個 data point 同埋 configuration 睇吓先算。
2009/3/20 (金曜日)
春分
春分， 放假。 不過都係留喺屋企做嘢， simulation 嗰個 bug 終於都搵到出嚟。 原來係 sub-class 嘅 method 唔記得 close buffer， 但係個 error 出喺個 parent class 另一個 method， 搞到搵咗好耐先搵到個 bug， anyway 萬事俱備， 就由得部機慢慢 run。
一路 run 都做唔到其它嘢， 冇辦法， 唯有做其它嘢消磨時間， 打吓機， 睇吓書咁（おいおい）， 中間更加瞓着咗...
瞓瞓吓有人㩒鐘， 嗰時個腦完全冇時間觀念仲以為係乜嘢人。 之後先之原來係宅急便， 之前買咗嘅プリニー到咗， 哦～！ 唔錯唔錯。
不過話時話， 咁鬼多雜物， 隻プリニー擺邊好呢？
2009/3/19 (木曜日)
繼續 test 個 program， 不過個 program 剩係識得 run 都冇用， 最緊要係識得 collect 啲 data， 結果就係咁寫。 唔， 老實講呢啲 code 應該老早就寫好， 而家先嚟慢慢寫真係有啲問題囉。
不過點都好啦， 都總算寫好喇， solve 埋另一個麻煩問題後就可以由得部機係咁 run 喇。
話時話今日有個 friend 生日， 打電話返去竟然俾佢識穿係我。 唔， 冇來電顯示的確係有啲容易穿煲喇。
2009/3/18 (水曜日)
越嚟越近嘅 deadline ， 到而家都係叫做寫好大部份嘢， 寫埋另一個 for comparison 嘅 algorithm， 寫完哂。 好好！ 可以 run 喇啩？ Run 一陣都好哋哋， 不過正式 run 耐啲就發現出事， too many open files... 邊度？ 唔， 搵搵搵， 都未搵得哂全部問題。 唔理咁多喇， 做到幾多就幾多啦。 遲少少再解決個問題。
雖然 deadline effect 應該嚟咗， 不過意外地清閒， 基本上都係等 data， 雖然都有少少嘢要 debug... 今次其車唔趕得切真係幾成問題。
2009/3/17 (火曜日)
蛇王， 留喺屋企， 本來諗住留喺屋企都應該做到啲嘢啦， 不過一如以往， 始終喺屋企嘅話冇 deadline effect 好難做到啲乜嘢出嚟。 剩係整嘢食等等， 其實都要幾多時間....
anyway 夜晚約咗包括 E さん在內嘅一班東大人， 對上一次見應該都係 E さん披露宴嗰時喇？ 過埋今次之後睇怕都冇乜機會見到 E さん， 今次名義上係慶祝佢“九州大合格＋新生活開始”， 不過其實都包括 farewell 喺入面喇。 唔， 前幾日先幫 O さん搞完 farewell， 今次又到 E さん， 呢個季節真係有少少傷感。
點都好， 去到渋谷時其實早咗去到， 行咗陣， 去到 Outback 時 E さん已經到咗， 哎呀呀， 咁早嘅， 要主角等。 Anyway 其它人都陸續嚟到， 中間有少少時間鼠咗出去整本相簿， 本相簿係 I くん嘅 idea， 自己都預備咗一個 message 俾 E さん喇。 其中一小段：
101 + 110 = 幸せ∞
正常人都應該睇唔明㗎喇， 不過冇諗到連主角都諗唔明囉， 唔緊要啦， 唔明咪解到明囉。 之後都係不斷食飯吹水， 新見嘅一位朋友 K くん， 意外地有趣， 有機會都可以傾多啲喇。 最有趣嘅應該係佢過咗好耐突然間問咗我一句
你學咗廣東話幾耐？
真係估你唔到... 完全意料之外嘅一個問題... Anyway 今日見咁多朋友吹咁多水都算係幾唔錯嘅一日喇！
2009/3/16 (月曜日)
朝早起身， 打咗陣機先捨得出門口， おいおい。 Deadline 雖然延遲咗， 不過都唔好咁啦， 唔， deadline effect 唔見哂
今日都算係延悠閒咁做嘢， 途中收到學校 ITC 嘅 mail 話之前 interview 份 parttime OK 咗， 呼， 咁總算有啲穩定啲嘅收入喇。
Simulation program 最麻煩嘅部份應該算係寫好咗， 跟住就係再執唔同嘅嘢， 唔， 應該都趕得切 run 個 simulation 啩？
夜晚返到屋企，繼續永劫回帰... 第十章完咗時主角俾人插死咗， 心諗點會死吖主角， 但無端端出 scrolling... 唔？ えっ．．．Bad end?? 奇怪喇。 無理由㗎喎？ 我唔記做過啲乜嘢會 bad ending 㗎喎？
之後出現第十一章... ... ... 被騙！！ 哎呀呀。
今次永劫回帰， 除咗 graphic 之外真係冇得彈（但係 animation 嘅部份就一流）。 而故事嚟講， 雖然當然也有女主角專屬嘅一章， 不過其它嚟講都係成個 UPW 所有人嘅大故事， 同女主角之間嘅關係就比較輕描淡寫。 睇你點睇啦， 我覺得都唔錯， 主角， 女主角， 配角， 敵角， 全部角色都好鮮明， 而エンジェル隊每一個人個別嘅故事（2－7章）每一個都好感動， 但都唔及最後一章...
いや， 總之好耐都冇試過喊咁多次喇。
2009/3/15 (日曜日)
友人 O さん好快就會歸國， 今日提早少少， 一班羽毛球友同佢搞個 farewell party。 由於係 surprise party， 雖然比預定早少少去。
不過喺横浜等火車時， 等等吓有一位失明人仕喺自己面前用枝杖篤吓篤吓， 自己當時排最前， 喺我前面換句話講就係差少少去到路軌， 咁嘅情況當然要捉住佢等佢冇事... 而家突然有啲明白點解咁鬼多交通意外。 雖然話自己係最近佢嗰個， 冇諗過其它人真係唔到最後一秒都唔郁...
Anyway 一大班去到銀座一間秋田料理， 唔，由於要去接另一個友人 A さん， 結果遲咗少少上去， 但係就喺料理店個 building 嘅玄関見到今日嘅主角 O さん， 哎呀呀， 穿煲穿煲...
唔緊要喇， 坐底， 叫嘢食， 食食食， 吹水吹水同埋吹水， 同平時冇乜變化嘅內容， 識咗咁耐都真係好唔捨得， 話哂係自己嚟到日本時識得嘅第一批朋友， 喺日本研究室以外嘅人睇怕見佢應該係最多？
之後喺銀座行咗陣， 其實都冇乜好行， 自己都唔係屬於呢個地方㗎喇。 之後飲嘢之後竟然去咗 Karaoke， 自己都冇諗過會嚟嘅地方。 唔， 其實先後去咗兩間， 第一間係拎咗房之後突然有人話貴去第二間， 唔， 係就早啲出聲嘛... anyway 好耐冇去嘅 Karaoke， 始終都有啲唔慣囉。
返屋企， 繼續永劫回帰...
2009/3/14 (土曜日)
羽毛球， 好多人都話有事嚟唔到， 索性 cancel， 結果就留咗喺屋企， 休息吓嘛。 瞓多陣， 打吓機又一日。
永劫回帰進行咗一半啩？ 唔， 老實講啲畫真係麻麻哋， 不過個故事雖然未完， 但係好似寫得好好， 但一開始嗰吓真係有啲想喊...
2009/3/13 (金曜日)
朝早又有 meeting， 呢兩個星期真係幾多 GCOE 要做， 差啲想死， 不過都好彩， 朝早收到個 email 話個国際会議嘅 deadline 會延期兩個禮拜， 都仲叫有啲時間寫。
Anyway 開會， 今次又幾特別喎， 唔知點解比起平時早完， 不過同學 A さん嘅 presenetation 時真係忍唔住要去釣大魚... 冇計啦， 人係有限界㗎嘛。
開完 meeting 之後， 本來食咗碗拉麵， 唔太夠， 於是去食多個飯， 真係幾鬼大食， 食咗碗拉麵其實真係唔食都應該得， 不過反正唔止自己一個， 食就食啦， 唔理得咁多。
之後寫咗陣 program， 準備一吓廣東話班啲嘢之後， 悠悠閒閒， 突然間巴斯光年嗰陣煙臭味充斥住個 lab， 冇計， 早啲走人。 去到渋谷時都仲好鬼早。 唔理咁多喇。
上堂， 今次用咗一個關於港女嘅 video 做教材， 反應幾有趣， 既然佢哋對香港嘅文化咁有興趣， 都不妨俾佢哋欣賞一吓港女嘅實態嘛。話時話之後餐飯都幾好食， 不過略嫌貴咗少少囉。
2009/3/12 (木曜日)
戦利品：
ギャラクシーエンジェルＩＩ 永劫回帰の刻 デラックスバック
今日返學校做埋少少埋數嘅嘢， 用咗三十萬， 要交番 report 㗎嘛， 不過乜嘢都齊， 就係搵唔到本 bankbook， 奇怪， 尋日先打完簿， 去咗邊呢？ 講開嚟尋日同今日件外套唔同， 尋日去打簿之後就袋住本存摺... 唔， 原來係咁。 今日係 deadline 前一日， 聽日又有 meeting， 即係話今日唔搞掂就好麻煩。 唔... 冇計， 返屋企拎
返屋企前買咗今日嘅戰利品， 不過冇時間慢慢睇， 返到去搵到本存摺， 即刻返去， 乜都搞掂哂， 可以鬆番一口氣， 不過到呢個時候就突然覺得好眼瞓， 冇計， 尋日嘅生活節奏完全亂哂， 今日有精神就真係有鬼。
返到屋企， 即刻就開始永劫回帰の刻， 唔， 唔係かなん嘅畫始終都好唔自然（之前絶対領域の扉都係）， 唔理咁多先喇。
2009/3/11 (水曜日)
尋日真係做足一日， 唔係同你講笑， 幾攰。 今日返到學校， 做少少雜務， 下晝去咗日吉駅嘅銀行清埋個戶口條數， 順手去嗰邊食個 lunch。 一碟牛肉回鍋肉， 唔...
好多牛肉！！
如果係喺香港食乾炒牛河有咁多牛肉都唔出奇， 不過喺日本呢度牛肉應該唔平， 咁多牛肉真係抵到冇嘢好講。 而且食落去軟好滑口， 有少少入口即溶嘅感覺。
一路食， 除咗好食就係櫃面個阿姐不斷同裏面另一個阿姐傾計， 好大聲， 又會咁繞， 返到去 lab 時就睇到新聞， 中國某某官員走出嚟話中國人講嘢大聲係“文化差異”， 哦。 講乜都得啦。 最近勁 hit 嘅機場阿嬸， 佢發顛嘅行為都可以用“文化差異”嚟形容？
夜晚， 瞓咗陣， 起身做埋份 report， 唔， 估唔到自己起到身， 起身時聽到鬧鐘响， 仲以為已經天光， 望一望出面， 天黑黑。
2009/3/10 (火曜日)
晨咁早起身， 去好耐都冇去過嘅三田キャンパス， 要準備 GCOE 嘅 poster presentation， 真係， 上個禮拜先至喺矢上 present 完（雖然係行行企企）， 今日又要去做人板， 搵時間嚟哂。 最慘係要迫火車。 朝早嘅 JR 真係唔係人咁笨。
去到學校附近， 雖然朝早食咗早餐， 不過都唔知點解好肚餓， 正想去附近 7－11 買嘢食時， GCOE 嘅 I さん突然拍我膊頭， 話未去過三田キャンパス喎， 就係咁就陪佢一齊去， 冇時間買嘢食... 去到會場， 一嚟就係體力勞動。 好多嘢要搬， 搬完之後貼 poster， 跟住執頭執尾。 快快手手做完佢， 有少少時間， 即刻買咗鑵粟米飲... 好肚餓....
之後開始自己學校 professor 嘅 presentation， 聽過都好多次嘅 presentation 喇， 加上眼瞓， 所以好快就瞓咗。 中途都叫做起吓身拍吓手掌咁㗎， 交足功課啦（？）。
Lunch time， 本來想去附近嘅お寿司食， 點知執咗變咗間香港料理， おいおい， 冇計， 去其它地方搵嘢食， 搵到間泰式餐廳， 唔錯咁， 入去食一個 set lunch， 一千円， 算係貴， 不過好大份好好食， 所以都冇乜所謂喇。
下晝嘅 session 有一啲 guest speaker 嚟講 talk， 有其中一個本來都想聽嘅， 之前幾個唔太關事瞓着咗， 中途起一起身， 結果想聽嗰個 talk 比想像中失望， 唔， 可能自己真係對（認真嘅）presentation 要求高咗啦。 唔， 真係幾哂時間。
之後 poster session， 好大部份 guest 都走咗， 小貓三四隻咁囉。 結果都係一大班 RA 吹水， 都真係唔知為乜， 上個禮拜又係咁， 今日又係。 結果挨完個幾鐘頭之後， 又係體力勞動， 係咁搬嘢... orz...
夜晚嘅懇親会可以話係唯一值得一提嘅地方， 攞正旗號吹水嘛， 都好， 有一啲人平時真係冇乜幾多句講， 唔理得咁多喇， 今次唔知點解好多嘢食， 平時通常食完第一 round 之後想食嘅嘢就會冇咗， 今次食完都仲有得再食， 生果無限供應， 奇怪， 不過咁就仲好， 係咁食....
夜晚返到屋企， 休息咗一陣， 跟住好耐冇認真傾過計嘅 P くん傾咗好耐， 啱啱去完澳洲嘅佢真係有好多唔同諗法， 同埋有某啲共通嘅地方， 嗰啲位都真係幾有共鳴㗎。 當然始終同佢個 case 唔同， 佢有啲嘢我都諗唔係太明... 不過聽佢講嘅嘢好多真係幾得意囉。 搵一年去流浪， 身邊仲要係自己鍾意嘅人， 真係幾羡慕...
2009/3/9 (月曜日)
休息充足， 返到學校之後坐一陣之後起勢咁寫 program， 唔， deadline effect？ 唔理咁多喇， 有個勢喺度就係咁嚟喇， 不過都係未寫完個 simulation program， 本來仲諗住寫好佢聽日由佢係咁 run 添， 冇辦法啦。
返屋企執吓屋先。 唔， 意外地有行動力嘅一日。 做咗之前應該要做但係懶得做嘅嘢...
2009/3/8 (日曜日)
本來諗住喺屋企寫 program， 點知結果剩係顧住打機.... orz... 不過隻 TOW2 總算 ending 喇。 雖然 ending 之後仍然可以不斷咁儲 level....
休息一下都要嘅， 不過遲吓嘅 deadline 趕唔趕得切呢？
2009/3/7 (土曜日)
羽毛球日。 算係幾平常嘅一日。 不過平常嘅日子總會有啲變化。 呢個羽毛球部（？）嘅一位創立人（？）Oさん就快要返去泰國， 雖然剩低嘅 members 都應該會繼續玩， 但係總覺得有啲寂莫...
不過人就總係咁樣離離合合㗎喇， 唔捨得都係咁話。 剩得都仲有幾日會見， 珍惜埋呢段時間啦。
2009/3/6 (金曜日)
晨咁早返到學校連 poster， 五分鐘搞掂， 跟住真係唔知做乜， 吹水， 吹咗個幾鐘頭先開始 GCOE 嘅 poster session， 咦？ 咁咁早返到嚟為乜？？
唔理咁多， 其實四個鐘頭嘅 poster session 都係行行企企， 自己份 poster 唔係太想 present， 周圍走， 扮去睇吓其它人嘅 poster， 不過其實全世界都係吹水， 真係冇邊個知呢個 presentation 為咗啲乜而搞。
唔理咁多， 坐多一陣去廣東話班。 今日其它嘢乜都冇所謂喇， 最緊要係佢有嚟到嘛， 不過有因為 Aちゃん早走關係佢都一齊走， 除咗上堂嗰時都冇講過啲乜嘢， 唔， 都冇辦法， 但係起碼都係一件好事喇。 自己點諗暫時都未整理好， 俾多啲時間啦。
2009/3/5 (木曜日)
基本上留喺屋企嘅一日。 做吓唔同嘅雜務， 打吓機（おいおい）， 出去食飯， 行吓街， 返到屋企， 就發現唔知點解好似冇咗一日咁？ 奇怪喇， 乜一日原來係咁鬼短㗎咩？
不過其實最在意嘅， 係今日下晝收到嘅一個 email， 內容真係冇乜特別嘢寫， 不過聽日會係點就真係好想知... 唔， 聽日先算喇。
2009/3/4 (水曜日)
偷懶唔返學， 本來諗住寫好個 program 佢， 結果都唔係用得好多時間去過 program 嗰度。
唔， 真係 timing 唔係幾好， 咁啱呢個時候朋友 E 君同埋 S さん喺香港嚟咗， E 君嚟出 trip， S さん好似話被迫放冇薪假過嚟喎。 我都唔係好知詳細情形。 Anyway 尋日應承咗出嚟， 所以都要出。 不過佢一嚟個 message 就係話冇錢...
吓？？？
冇錢走嚟旅行？ 出到去見到佢時， 佢同我講話帶唔夠円過嚟， 唔好玩啦。 跟住仲要加多句話因為啲錢拎哂去夾公仔...
吓？？？？？？
真係幾識搞笑㗎喎。 唉， 唔理咁多， 佢可以連 cash card 都冇帶， 去銀行又嫌食水深， 所以想我幫手。 總之我死人都唔收港幣㗎喇， 唔知收嚟做乜。 其實真係唔應該幫手， 不過算啦。 玩佢一陣先算。 扮冇錢（其實真係唔係好多錢可以借）， 唔理， 行咗陣， 去吓旅行社， 幫佢哋問去伊東嘅嘢， 之後再去食嘢， 過咗陣做完嘢嘅 E 君都嚟到， 吹吓水咁， 之後就去銀行㩒咗錢俾佢哋， 唉， 真係心軟得濟。
其實真係幾大鑊， 呢個時候 deadline effect 都應該差唔多嚟料喇啩？ 但係後日又有死人 GCOE presentation.... 嘥哂啲時間....
2009/3/3 (火曜日)
返到學校， 主要嘅目的就係印張 poster， 其它時間都係有少少懶散咁。 唔。 simulation 個 algorithm 其實都有 check 吓， 應該冇問題， 之後完埋個 implementation 就可以 test 喇啩？ 距離 deadline 越嚟越少時間添...
話時話印 poster 時拎部 notebook 去做嘢（一張 poster 要 print 廿幾分鐘， 仲要 cut）， 平時喺 lab 太多 interference 上唔到 wireless， 一上到嚟就即刻用到... 真係冇嘢好講。
2009/3/2 (月曜日)
戦利品：
ギャラクシーエンジェルＩＩ 天使の羽休め ３
朝早遲咗少少出門口， 因為拎部 notebook 去賣。 唔， 呢部 notebook 都用足三年有多喇， 個 mon 都開始有少少退化， 電池就更加唔駛講啦。 但係其它各方面都真係唔太大問題， 成日聽日講死 harddisk， 我部機又冇事喎。 Anyway 既然新機嚟到， 舊機都差唔多係時候退役喇， 結果部機賣咗一萬五千， 比想像中低， 不過個 mon 嘅問題就真係冇計啦。
返學校， 係咁諗個 algorithm， 都應該冇問題啩？ 不過好眼瞓囉... anyway 冇乜特別嘅一日， 除咗個肚有少少痛之外（尋日食得太多嘢喇）
2009/3/1 (日曜日)
Holiday mode， 同 K さん去咗散步， 真係冇特別諗過做啲乜或者去啲乜地方囉， 直至前一日先決定去鎌倉。 幾好呀， 好耐冇去過， 呢個地方真係幾唔錯， 夠靜， 古舊嘅風貎真係一個好大嘅 sell point 囉。 而且横浜去好鬼近嘛。 真係得閒應該嚟多啲先得。
真係冇乜目的嘅程況之下， 首先第一件事係醫肚， 周圍走吓， 難得嚟到鎌倉緊係要食和食啦！ 冇理由走去鋸扒㗎嘛！ 去咗一間有魚生食嘅和式料理， 感覺好好， 好舊， 但係個老板娘真係招呼一流。 嘢食唔係話好平， 不過貴咗少少咁， 冇計啦， 遊客區嘛。 但係後來先發現出事， 隔離枱個阿嬸食完嘢之後就即刻整支飯後煙， 臭氣薰天。 哎， 自殺行遠少少得唔得呀？
之後好例牌咁去咗鶴岡八幡宮， 今次去到又有人結婚， 不過上之都叫做睇過一次， 都冇太好心機慢慢睇佢。 繼續散步， 同埋同 K さん講埋啲無無謂謂嘢咁。 真係唔明啲話題點解可以咁怪囉。 去到カフェ繼續講， 本來呢間カフェ分二三樓， 三樓好似話禁煙， 但坐坐吓裏面嗰枱個女人起勢煲， 問個侍應佢竟然話只係外面幾枱， 唔好玩啦。 咁同冇分吸唔吸煙區有乜分別？
之後告別 K さん去 join P ちゃん嘅生日 party， 除咗 P ちゃん有另外三個人， 三個人都係第一次見。 去到呢間墨西哥餐廳， 叫咗嘢飲之後冇幾耐， 發覺好鬼臭， 今次唔係有人食煙， 係頭先擺低嗰份 menu 燒着咗！ 嘩！ 唔得你死！ 即刻吹熄佢， happy birthday!!
之後不斷吹水， 都唔錯呀， 後來有個真嘅生日蛋糕走出嚟， 仲要有煙花添， 真係幾型， 但係中途啲火熄咗之後， 唔知點解 Y さん諗住整返着佢， 拎支蠟燭過嚟點， 跟住啲蠟倒咗上個蛋糕上面.... orz.... 估佢唔到。 哈哈。
希望今日 P ちゃん enjoy 個 party 啦。
今日鎌倉嘅相同埋 P ちゃん生日 party 嘅相