2009/4/30 (木曜日)
話咁快又到月尾喇。 開學... 冇乜特別轉變， 學校嘅嘢跟本同開唔開學冇關。 另外開始咗新嘅 part time， 今日都有返， 都算慣咗， 只係有時唔知好唔好意思收佢咁多人工做自己嘢咁。
做乜自己嘢？ GCOE 個 poster 囉， 嗰邊就真係要貼錢幫佢做嘢， 呢個世界就係咁奇怪㗎喇。 不過 GCOE 有個好大嘅好處， 就係而家七樓間房喇。 五樓嗰個印度人真係頂唔順， 而平時研究室到又鬼咁熱鬧， 最近仲要唔知邊個帶咗部 Wii 嚟...
唔理佢哋咁多， 放工返屋企， 食飽飯唔知點解死咗， 起身時都已經三點... 咦...？
2009/4/29 (水曜日)
放假， 本來應該寫份 poster 啲嘢， 不過就係唔想做， 哈哈， 始終都未到 deadline effect 啩？ 唔， 其實真係唔想做， 個 PhD forum 會有幾多人嚟真係唔太期待，不過剩係知道嗰日撞正 part time， 冇得返 part time 就自然冇咗幾千円... 幾千円差唔多夠食一個禮拜喇...
下晝都係出咗街行吓， 悠悠閒閒咁啦。 六點幾先嚟食 lunch， 真係唔知自己想點。 哈哈。 懶得濟， 不過都差唔多係時候發揮 deadline effect 喇（雖然冇 deadline）。
返屋企之前， 本來直路返屋企， 突然轉個灣， 去去好近但係基本上冇點去過嘅地方行吓。 原來都有幾多餐廳， 得閒可以試吓。 另外亦都有体育館， 唔， 似乎要抽吓時間做運動先得喇。
2009/4/28 (火曜日)
成日都係咁， 朝早起到身， 去到掉垃圾， 仲有閒情食埋早餐， 而且總係夠力爬返上張床， 不過就係唔夠力起返身， 唔， 結果十點先正式起身， 大件事...
都冇辦法喇。 返學校之前去咗新裝修好嘅大戶屋食晏， 餐廳嚟講都幾鍾意呢間嘢， 好味嘛 （日日食學校嘅飯堂真係想死）， 之後 lab meeting， 無風無險， 不過班人用返以前嘅 slide 嚟做 tutorial， 都唔緊要， 唔該做定少少準備啦， 雖然班四年班唔識問問題， 不過笹瀬先生嘅問題， present 個人基本上都係答唔到。 即係話佢自己都唔知自己講緊乜嘢啦。
Meeting 之後自己走返去七樓做自己嘢， 唔， 走咗一大個圈， 返返轉頭都係用返舊 scheme， 理論上冇乜問題， 寫埋個 simulation 佢先得... 呀， 又有 GCOE 嘅 poster... 一年要 print 幾多張咁嘅 poster 先得？
好耐冇搵嘅朋友， 突然有閒情煲電話粥， 話時話以前都好多時煲粥， 唔知幾時開始都冇咗呢個習慣喇。 又話時話， 最近上到七樓基本上一日都唔駛點講嘢... 就嚟啞都似。
2009/4/27 (月曜日)
戦利品:
ハヤテのごとく！！ ナイトメアパラダイス 特別版
朝早因為等宅急便所以遲咗出門口， 都冇計， 返到學校， 繼續諗個新 scheme， 繼續改啲 code， 改吓改吓好似有啲問題， 夠竟個 scheme 係唔係真係 work 都成問題。 唔， 做 research 就係咁㗎喇。 除咗諗咁多之外， 始終都要有理論 backup 先得。
點都好， 始終都要去 GCOE 嘅 lecture， 今日三個新 RA 嘅 present， 撞鬼， 冇一個聽得明， 本來四個人入面有一個嘅都應該聽得明， 點知佢冇到， 另外三個人一來 present 能力唔得， 二來就係自己都唔明佢哋個 area， 都唔知邊度插咀好。 唉。
返到屋企， 挑戰鯖の塩焼き， 失敗。 唔， 始終冇工具都有限界啩？ 唔理咁多， 打機...
2009/4/25 (土曜日)
本來羽毛球日， 不過落雨濕濕， 傾咗陣之後嘅結論就係唔去， 決定休息。 都好， 多返一日出嚟休息。
不過呢個世界就係冇咁理想㗎喇。 屋企今日完全斷糧， 唔出去都唔得， 今日落嘅雨仲要鬼咁大， 唉， 點都好， 唔出去嘅話等餓死都似。
順手買咗少少雜物之後返屋企， 唔， 繼續戦場のヴェルキュリア二周目， 有啲勢如破竹嘅感覺， 唔係幾好意思。
2009/4/24 (金曜日)
朝早返到學校， 係咁重新執啲 code 同埋睇吓有冇其它 simulator， 睇過吓 ns3， 不過又似乎唔係真係咁啱用， 算。
下晝唔知點解好鬼頭痛， 唔， 可能係休息嘅時間太過大出入啩？ 尋日先瞓咗九個鐘， 今日瞓得嗰一半， 真係... 應該習慣返每日瞓少啲， 唔可以再俾自己一時時瞓成十個鐘以上喇。
anyway 過咗陣頭痛之後都算係可以正常工作， 繼續改 code 同埋做少少資料搜集咁。 又夠鐘去廣東話。 今日其中一個學生嘅 farewell 喇， 嗰個學生之後會搬去香港住， 唔， 呢個世界就係咁， 有人想留喺日本住時就有人想去香港。 如果可以嘅話， 可唔可以交換國籍呢？ 咁咪唔會有咁多麻煩嘢囉。
2009/4/23 (木曜日)
本來今日 part time 日， 不過學校假期， 所以唔駛返工（應該話冇得返工）， 唔， 冇辦法， 基本上都係留喺屋企打機， 戦場のヴァルキュリア二周目， 唔， 有啲嘢原來順返時序嚟睇會好唔同...
基本上ダメ人間嘅一日， 本來都有諗過寫吓 part time 嘅 code， 結果開都冇開過個 editor....
2009/4/22 (水曜日)
戦利品：
ハヤテのごとく １６−１９
HiNA （桂ヒナギク）
尋日去唔到嘅健康診断， 今朝先去， 不過去之前唔知點解走咗日吉本町嗰邊當失路， 哈哈。 搵嚟玩， 本來係想搵間 book off 喇， 不過行行吓都知自己去咗邊， 算， 返轉頭。
之後做埋個健康診断之後就去七樓自閉， 喺七樓自閉同埋喺屋企自閉最大嘅分別就係七樓可以好集中精神喇。 真係鬼影都冇隻， 冇人會煩自己， 同埋基本上冇乜引誘... 集中完一段時間之後嘅結論係， 都係唔用 OMNet++ 做 simulation 住喇。
搞完一輪， 返屋前買埋幾本書， 唔覺意見到隻 CD （其實係好多隻 CD）， 忍唔到手要買喇。 唔， これでダメかも.... 不過啲歌又真係好好聽， 唔聽又唔得喎。 唔。 眼前一大個泥氹等自己踩落去...
2009/4/21 (火曜日)
拎返起個 OMNet++ 嚟用， 最近嘅 4.0 其實做得幾唔錯， integrate 咗去個 debugger 時感覺上幾好。 而且其它嘅 NED tools 之類都比起以前好好多咁。 可以一試
下晝 lab meeting， tutorial 同埋一啲 introduction， 唔算係好長， 不過都好眼瞓， 同埋本來打算去嘅健康診断都去唔到... 冇計， 聽日 last day 先去。
夜晚 P ちゃん突然約食飯， 都好， 不過其實好眼瞓 唔知點解， 一向都係返到屋企過咗九點之後先會精神啲。 有鬼。 返到屋企繼續睇書...
2009/4/20 (月曜日)
戦利品：
ハヤテのごとく １１−１５
撞鬼， 呢排都唔知點解成日都咁遲起身。 一起身， 都仲識得爬落床整停個鬧鐘， 但係唔知點解仲會有力爬返上去， 但無力再落返嚟.....
唔理咁多， 都要出門口， 不過真係完全唔記得咗今日有 health check， 其實真係 check 唔 check 都係咁， 反正身高體重呢十年好似都冇變過咁濟（極量係最近呢排好似肥咗少少）， 視力可能有少少衰退啩？ 不過都唔方大問題， 驗尿... 反正 keep 住有去捐血， 驗血結果嘅 item 仲要 details 好多，咁真係為乜要去呢？ 冇計， 例行驗查， 都有 X－ray check 嘅， 算係唯一一樣叫做特別少少嘅嘢啩？
返學途中去咗中途站嘅一間 book off 買漫畫， 完全預期呢套ハヤテのごとく會係自己嚟緊嘅一個泥足， 要買嘅嘢應該多到數唔哂.... 唔， 唔。 唔 。 唔理咁多喇。
風平浪靜咁， 試吓 OMNet++ 嘅新 IDE， 大概都明白個 flow， 不過始終都唔集慣一啲地方， 唔， 例如可以點樣 integrate vim 呢？ 寫 code 要我唔用 vim 其實真係有啲想死嘅感覺囉。 唔。 真係完全慣咗... .
之後又要上 GCOE lecture， 唔， 例行地悶同埋做自己嘢， 都冇乜 complain 可以再講喇， 要講嘅都唔知講咗幾多千次...
夜晚剪頭髮去也。 有時頭髮真係覺得多得濟... おっと， 絕對唔係嫌氣。 呢一方面始終都要多謝阿爸阿媽嘅遺傳， 老實講， 自己先天嚟講嘅 spec 我自己幾滿意㗎， 不過後天可能有啲問題都唔定？ 唔， 呢個唔講咁多喇。
2009/4/19 (日曜日)
約咗朋友睇「赤壁II」， 本來諗住朝早喺屋企做好啲雜務佢， 結果唔知點解完全喺死亡 mode 起唔到身。
anyway 早少少出到去會合其中一個朋友 I さん， 佢同埋另外三個朋友一齊， 三位都係第一次見， 不過呢， 其中一個人識得我另一個朋友， 証明呢個世界其實真係幾細...
Anyway 飲飽食醉（？）之後， 趕頭趕命咁去到戲院， 買咗飛之後慢慢欣賞， 今次套戲比起 part I 真係兩個世界， part I 點講都不過係 introduction 喇， 不過同史實或者係演義最唔同， 應該係其中兩個女角－－孫尚香同埋小喬嘅故仔喇， 講真真係幾令人感動。 唔寫太多喇， 不過結局就真係有啲奇怪， 咁樣完法真係唔太可以接受囉。
睇完戲之後幾個人去咗一間歌舞伎町嘅上海料理（？！）食飯， 唔， 老板娘應該係上海人啩？ 嘢食又真係幾好食嘅， 不過加加埋埋， 好似貴咗少少咁囉？ 唔... 微妙....
2009/4/18 (土曜日)
朝早起身， 不斷咁消化啲漫畫， 笑到死咁濟... 非常識にも限度があるよ！
之後羽毛球， 好耐冇試過咁多人囉。 加埋 Aちゃん嘅朋友， 計計埋埋十個人， 真係幾難得。 不過場就得一個， 前幾個禮拜開始有一大班人， 老實講唔係好似我哋呢班玩玩吓囉。 但係我哋十個人佢哋八個人， 佢哋霸兩個場我哋得一個場， 唔， 雖然都唔係話好大問題， 反正我哋都唔係話有咁多體力打咁耐嗰隻。 不過就係諗唔明囉。
返屋企繼續睇書， いや〜〜ヒナギク格好良くてかわいい！！
2009/4/17 (金曜日)
戦利品
ハヤテのごとく！ ５−１０
唔知搞乜鬼， 好晏先起身。 唔， 其實七點都起過身， 不過好快又瞓返着。 可能之前累積咗一堆疲勞？
雖然學有照返， 不過就不過去咗 lab 個幾鐘頭就走人。 冇計， 要上廣東話班嘛。 其實而家個廣東話班真係越嚟越少人， 都唔知教唔教落去好， anyway 既然咁少人其實冇乜要 book 房喇， 唔理咁多， 起碼都仲未要貼錢嘅。 不過最重要嘅係開始冇咗個方向感囉。 自己諗教乜唔係唔得， 不過未必係佢哋想學嘅嘢吖嘛。 反正又唔係多人，可以比較 pin-point 啲嘅話我諗個効果會更加好囉。
夜晚又去咗買漫畫.... やばい。完全にハマってしまった。 話時話途中經過一個工事現場， 無端端有個小丑放咗喺度... 唔？ 乜嘢事呢？？？
2009/4/16 (木曜日)
捐血日， 唔， 可今日唔知點解好快就捐完， 成份捐血一般都要五十分鐘以上， 今日四十分鐘就搞掂， 而且循還次數都只係三次， 一般都係四次嘛。 唔， 唔緊要， 快有快捐。 不過下次要去到五月尾先可以捐， 可能因為捐得太多要休息一下補充一下？ 唔。 冇所謂喇。
返到學校， 都差唔多夠鐘開工。 今日比起之前少咗好多人申請 account， 唔， 當然嘅事喇， 不過就開始有人問一啲電腦上嘅問題， 有啲問題真係唔熟環境就答唔到咁多。 唔， 要累積吓經驗值喇。 Anyway overall 其實都係好得閒...
返完工始終太夜， 都廢時自己煮嘢食。 出去食其實好多時都去同一間舖頭， 去開有感情嘛。 不過留意咗好耐， 有一個 staff 特別有印象， 由我搬嚟横浜嗰時已經喺嗰間舖頭到做喇。
去還埋隻碟佢， 睇咗陣嘢， 冇乜特別， 算， 返屋企。
2009/4/15 (水曜日)
戦利品
ハヤテのごとく １−４
テイルズオブシンフォニア １−２
尋晚都唔算好夜瞓啫？ 但係起身時竟然差唔多十一點.. 奇怪。 唔理咁多喇， 返到學校， 今日唯有做晏啲啦（唔做都冇人迫自己嘅雖然）。 結果今日差唔多成日都喺七樓， 嗰度又冇乜人喎， 所以成日都差唔多冇講過嘢。
不過戦場のヴァルキュリア嘅主題曲真係幾好聽， 首先走咗去日吉搵啦。 結果搵唔到... 唔， 唔服氣， 夜晚再去 MM21 搵， 搵就搵到喇， 不過心諗， 原來係 new release， 係唔係即係日吉嗰邊都係放咗喺 new release 嗰邊呢？ 唔。 都唔理得咁多喇。
順手咁去咗途中間 Book off 買漫畫 ，一買就買幾本， 不過頭痛嘅係， 其實屋企已經冇乜位放喇， 點算呢？ 不過又停唔到手喎。 唔。
2009/4/14 (火曜日)
今日有研究室 meeting， 唔， 有份 presentation 都未準備好， 返到學校時即刻整起佢， 好在都唔算用好多時間。
之後嘅 meeting， 基本上係 team introduction， 究竟自己今次係第幾次聽呢？ 雖然話每年都有少少分別， 不過可以有幾大吖， 結果當然係好似死魚咁恰眼瞓。
無事完咗個 meeting 之後繼續自己嘅 research 嘢， 唔， 個 idea 大致上似樣， 不過真係要做得 concrete 少少先知道可唔可行。 唔。 俾心機啦。
夜晚返到屋企， 繼續打仗， 二周目....
2009/4/13 (月曜日)
尋日打仗打到好夜， 所以都冇乜點瞓， 起身嗰時都已經十點... orz...
都要返學校做嘢， 去到， 都係覺得好眼瞓， 唔... 大件事。 好在都唔係完全冇做到嘢， 諗到個 idea， 不過唔知 work 唔 work 囉。
好耐冇上嘅 GCOE lecture， 今日笹瀬先生同埋大槻先生嘅說明會同埋其中一個 RA 嘅 internship report， 個 internship report 真係悶到飛起囉...
夜晚， 終於都打低咗マクシミリア， 最終決戰亦都告一段落... 另外嘅斷章仲等緊自己...
2009/4/12 (日曜日)
睇電視睇到好夜， 朝早好晏先嚟起身， 玩咗陣戦場のヴァルキュリア， 大逃走， 其實跟本唔駛咁多兵出擊囉... 話時話呢隻 game 都應該就嚟到尾聲喇。
下晝去 meet 香港嚟嘅朋友 Y さん同埋佢同行嘅朋友。 基本上十次有香港朋友嚟， 佔咗九次係會去新宿 join 佢哋㗎喇。 講真呢個地方又真係幾方便， 但係本身就冇乜嘢睇咁囉。 講到尾自己都係鍾意横浜多啲。 Anyway join 咗佢哋之後， 第一件事就係周圍行吓， 佢哋啱啱先喺北海道飛落嚟， 東京又係第一次嚟， 所以都唔熟路喇。 不過最大問題係， 我都唔熟路囉... 唔理喇。 去搵嘢食， 結果都真係幾求其咁去咗中村屋。 今次有個カレー食べ放題， 好少有。 不過老實講， 真係麻麻哋囉。 唔算太好食。
食完， 陪咗佢地一陣， 幫佢哋 plan 吓聽日可以點行， 不過得一日都唔可以行太多喇。 好多地方要取捨... 唔。 希望佢哋班得開心啲啦！
打機打到五點幾， 最後決戦... 火力唔好再誇張啲吖笨！
2009/4/11 (土曜日)
冇得打羽毛球， 因為今日要返 ITC parttime， 人窮就好多嘢都要做㗎喇。 不過今日清閒到鬼咁， 諗返轉頭， 自己今日做過啲乜呢？ 每兩個鐘頭巡一次房， 睇吓 ITC 嘅 workflow， 食晏， 之後最多都係做自己嘢， 唔， 冇嘢做都冇計。
夜晚約咗 P ちゃん， 佢話介紹一個新朋友俾自己識， 不過去之前喺日吉行咗陣， 自己喺度咁耐都唔覺得呢度有乜嘢行， 唔， 果然行開街嘅人係可以發現一啲自己唔會發現嘅嘢。 唔理咁多喇， 之後 join 咗佢個朋友。 同一間大學嘅前輩， 大自己都唔少喇。 不過由於都係理工學， 所以某程度都算係幾啱傾。 去咗 campus 裏面嘅協生館食嘢， 一間禁煙嘅酒吧， 好少有喇（雖然自己一向都唔多去吧）， 食嘢， 真係完全唔可以飽肚囉。 不過都係吹水多過食嘢喇。
之後帶呢個咁耐冇返過嚟嘅前輩周圍行吓。 剩係呢兩年都多咗兩棟 building， 更何況呢個前輩好耐冇返嚟， 個 campus 真係變咗好多喎。 都可以理解嘅。
2009/4/10 (金曜日)
尋晚顧住打機都冇準備到今日嘅廣東話 notes， 朝早返到學校就係咁寫... 不過其實都冇乜特別， 搬字過紙咁解。
但係之後發現出事， lab 嘅 printer 因為 replacement 所以唔用得住， 本身用開嘅 Brother 都暫時停機。 唔。 冇計， 幫手 set 部新 printer， 其實都好簡單喇， set 好個 IP 就基本上用得。
之後自己心裏面 Linux 嘅不死傳說有啲動搖！ 話說今日開個 mplayer 時部 notebook 突然 freeze 咗， 冇計之下㩒 power 熄機， 點知開番機時就發現 boot 唔起！ 原因係有兩個 files 死鬼咗， 強制熄機時特有嘅 file corruption 喇， corrupt 咗嘅 file 又 delete 唔到， 唔... search 咗一陣， 唔， 整咗隻 systemrescuecd 嘅 USB， boot 機， "fsck.reiserfs --fix-fixable"， 搞掂！ 冇問題起返部機。 唔。 諗緊如果係 Windows 嘅話可以點做呢？
夜晚嘅廣東話班， 開始少人， 唔， 都要檢討吓可以點樣改進。 今日剩係講 grammar 都用哂啲時間， 下晝 prepare 嘅 notes 都完全冇用到。 唔， 冇所謂啦。
2009/4/9 (木曜日)
朝早起身， 都係玩咗一陣， 其實尋晚玩到好夜所以有啲眼瞓喇。 俾着平時真係繼續瞓多。
Anyway 今日返學.. 唔係， 係返工。 雖然都係去同一個地方（矢上キャンバス）， 但係今日其實開始 part time 喇， 之前一路做嘅 part time 都係一次過， 所以收入都算係幾唔穩定。 尤其係 scholarship 一路咁減， 唔認真做嘢都唔得。
去到， 四條友坐底， 由於係學期頭， 所以都係比較多 account 嘢要處理。 唔。 都算係手辦眼見嘢喇， 之後睇怕都唔會多得去邊（下個禮拜應該都仲有嘅...）， 其它時間， 唔， 每兩個鐘去巡吓 lab， 跟住冇人嘅時候基本上就可以做自己嘢， 老實講， 有少少唔好意思收人工囉。 不過冇話唔好嘅， 咁有嘢時始終都要做㗎嘛。 其實呢個世界好多公司都好似係咁... 都好。 anyway 可以兩份 part time 喺同一個時間做都唔定....
2009/4/8 (水曜日)
本來都算係搞掂嘅 PC update， 突然間等咗好耐嘅 Xserver 1.5 突然 mark stable， 咁唯有 update 啦。 不過話時話， 加埋三部機， 三部機都做同一個動作其實好似有啲冇效率咁囉。 冇所謂喇。 三部機雖然都係 Gentoo， 不過三部機嘅 display adapter 都唔同 （Nvidia, Intel, AMD 齊哂）， 冇計...
不過話時話， 搬返去先端研之後， 又少少雜物都要買返， 例如 keyboard mouse， 呢兩樣嘢感覺上一向都唔值錢， 通常都唔會計落 cost 到， 不過唔知點解呢度啲 keyboard 可以咁鬼貴囉。 用咗又唔會曉飛， 可以過成萬円一個。 都唔知邊度值錢。 技術完全冇乜特別， 比起例如 CPU 或者 monitor， keyboard 十幾年嚟頂哂龍都係轉咗個 connector， 其它真係冇嘢好講囉。 唉， 都要買， 買個最平嘅算數...
Set 好哂部機， 繼續諗研究嘅 idea， 唔， 諗到幾個方法， 但係唔知行唔行得通。 果然冇滋擾嘅情況下係高效率啲嘅。
夜晚繼續ヴァルキュリア， 唔， 要儲吓 level 先。
2009/4/7 (火曜日)
日吉キャンパス新起好嘅独立館， 冇乜嘢做， 走咗過去行吓， 唔。總之覺得好大， 始終喺一個 open 嘅環境度嗰陣時， 總係會覺得舒服啲。
之後 meeting， 年頭嘅例會， 講吓今年會點樣點樣啦。 唔。 新嘅學生聽講話成績麻麻， 不過睇落感覺唔太差， 點講呢， 好難判斷喇。
Meeting 之後上返去自己新嘅 workiing space， 搞返掂部 PC 先算， xorg 唔係太穩定咁， 始終自己走去裝新 version 係自己嘅問題喇。 另外試咗裝 Wordpress， 雖然唔會裝而家呢個 blog 移過去， 不過純粹當知多樣嘢， 同埋研究室個古老 homepage 可以用喇。
夜晚繼續ヴァルキュリア， 能力覺醒嘅アリシア... 格好良すぎ〜〜〜 另外セルベリア... 雖然係敵人但係都好重要嘅一個人...
2009/4/6 (月曜日)
本來要返學校嘅一日， 結果朝早諗住玩一陣， 玩到停唔到手， 自己都真係要檢討一吓， 真係非常過份嘅一日囉。 不過呢隻戦場のヴァルキュリア SLG part 真係冇得彈， 戰略性又高， 而且畫風 （好似叫 canvas 嘅 system）真係幾獨特， 睇起上嚟好舒服。 由於 PS3 太過 powerful， 好多 game 嘅畫都越嚟越似真人， 反而冇咗個吸引力。 另外最近玩嘅 GA graphic 都好好 ， 不過戰略性其實唔係太多囉。 每架紋章機其實性能唔算好大分別。
2009/4/5 (日曜日)
整日哋上戦場， 不過下晝休息一吓， 難得有さくら嘛， 一個人去咗屋企附近嘅三ツ沢公園同埋横浜国立大学散步， 話時話其實兩個地方都係徒步範圍， 不過搬嚟咁耐都係第一次過嚟。
三ツ沢公園有唔少人嚟睇さくら， 自己就係咁影相， 一來係さくら， 二來係第一次嚟嘅公園（重複一次， 係可以由屋企行上嚟嘅）， 公園地勢起伏好勁， 唔， 喺度剩係走圍行吓都係一個唔錯嘅運動...
之後過埋隔離嘅横浜国立大学， 作為浜っ子唔嚟好似有啲唔好意思， 仲有 B'z 同埋眞鍋かをり都喺度讀過書嘛。 不過始終都係假期嘅關係， 成個 campus 靜到鬼咁， 而且又大， 不過冇人嘅感覺真係幾舒服喇。 之後行行吓入黑， 唔？ 唔？ 條路去咗邊？ 呢個 building 頭先咪見過㗎囉？ 唔？ 當失路。 終於出到 campus 時去到公園， 不過唔係頭先嘅三ツ沢公園， 常盤台？ 邊度嚟㗎？ 結果行咗好耐先出得返去。
喺屋企附近當失路都真係可以係一個紀錄喇。 話時話今日本來諗住係咁易散吓步， 之後先發現原來自己去咗行山...
2009/4/4 (土曜日)
羽毛球， 今日竟然得嗰三個人嚟， 真係有啲唔開心。 最唔開心嘅， 其實唔係少人， 係唔嚟嘅話有聲交待其它人會有準備囉。
之後一個不意打去睇さくら， 本來都冇諗過， 九段下靖国神社一帶， 好多人， 雖然夜晚嘅さくら真係幾靚， 不過一張相都冇影， 冇計， 冇帶相機嘛。 手提？ 唔好講笑， 嗰部嘢邊可以用嚟影相㗎。 就算係一部認真少少嘅相機， 呢個環境最少都要有支腳架先得啦。 人嘅定力始終有毎限度嘛。
另外今日都同啲波友吹咗唔少水， 人嘅問題真係好複雜... 好似只係一齊打波嘅朋友， 但其實有好多問題都收埋咗囉。 純粹以打波嚟講其實唔駛介意太多嘢囉。 不過有時真係相處落， 原來都唔少嘢冇留意到。
2009/4/3 (金曜日)
戦利品
戦場のヴァルキュリア
研究同埋整機， 可能一次過 update 咗太多 packages， lab 部 notebook 有啲問題， 唔， ATI driver 真係冇咁穩定囉。
今日嘅廣東話班 cancel 咗。 夜晚行咗陣 sofmap， 買咗隻新 game. 本來諗住試吓玩啦。 點知停唔到手... 話時話ギャラクシーエンジェル都係完咗一半左右...
2009/4/2 (木曜日)
戦利品
名探偵コナン 64
ギャラクシーエンジェル画集 ANGELS III ~KANAN's works~
正常嘅一日， 無乜人返學校， 吹吓水食吓飯。 唔， 最需要擔心嘅 research 最近有個 idea， 不過 idea 還 idea， 點樣 implement 又係另一個問題。
夜晚不斷咁睇書， 當然就係今日嘅戦利品喇。 不過每次コナン單行本最乞人憎就係故仔完唔哂， 要等下一期先有答案。 尤其今期完嘅位係怪盗キッド嘅予告状... 唔好喺啲咁嘅位停得唔得呀.... orz...
2009/4/1 (水曜日)
来日四周年
2005年嘅今日， 由香港飛到日本呢個地方， 充滿期待， 離開屋企人生活， 好多嘢都要自己做， 雖然話以前都叫喺大學住過宿舍， 不過就始終係兩回事。
今日， 原來已經嚟咗四年， 冇阿媽每日叫自己起身， 有嘅， 係 PC 裏面 set 好嘅一個 cron job （簡單嚟講， 即係鬧鐘囉）， 同埋手提電話每日都會響起嘅音樂。 早餐， 唔準備就唔好諗住食。 離開屋企有好大嘅自由， 但同時要對自己負嘅責任， 大過以前好多。
Anyway 今日除咗係嚟到日本四周年之外， 亦都係 April Fool， 講吓大話都冇問題啦， 反正無傷大雅。 其中有：
- 去 Facebook 由“獨身”update 咗自己嘅 status 去“交際中”
- 喺 mixi 話俾人聽自己打算返香港。
- 下晝食飯時同其中一個泰國朋友話自己下年結婚。
唔知自己係唔係平時講得少大話啦， 差唔多全部都冇人懷疑（或者係 no comment 都唔定？）， 都覺得幾意外， 不過其實 mixi 嗰個 joke 真係唔多似 joke， 有幾個朋友真係擔心自己有啲乜嘢囉。 唔... 唔... 真係有啲唔好意思喇。
而除咗自己之外， 都有唔少人講 joke 喇， 其中最嚇人嗰個， 莫過於係無端端有人話水樹奈々結婚... 撞鬼， 雖然都知道係假， 不過都真係有少少嚇親囉。