2009/6/30 (火曜日)
唔知點解朝早好早返到學校， 做咗陣嘢， 朝早嚟講難得高效率...
食完飯之後 meeting， 呢排又真係好咗精神聽佢哋講嘢喎， 唔知點解呢？ 不過之後伏兵出現， 上個學期畢業嘅 T さん， 因為一個共同研究 project 嚟咗做一個 presentation， 本來諗住廿分鐘左右乜都夠， 不過實際好似講咗成兩個鐘？ 啲 slide 真係完全想死...
之後做多少少嘢都冇時間慢慢玩， 準備吓下個禮拜自己嘅 presentation， 唔想嘥人時間嘛， 所以呢方面自己想做好啲。 唔， 不過始終都要啲時間準備先得喇。
2009/6/29 (月曜日)
返學前去咗 Docomo shop 問吓 HT-03A 月費等等問題， 坐底慢慢問， 結果個 staff 就由好基本嘅嘢開始講， 如果唔係睇在佢靚女份上一早打斷咗佢講嘢， 哈哈， 横掂有時間慢慢傾吓都好嘅。 不過結論嚟講都真係問唔到乜嘢新嘅 information 囉。
返到學校， 呀， 結果都係集中唔到精神， 去搵咗 HTC Magic 嘅說明書番嚟慢慢睇。 最大嘅問題都係點樣令部電話唔好係咁不斷同 Google server sync data 囉。 係咁 sync 嘅話真係唔掂㗎嘛。 有 Wifi 嘅話 sync 到夠都唔理咁多， 冇嘅話真係個個月都用到盡...
同 Madu 傾開呢個話題時， 就傾到下個月出機都冇話唔得， 不過要俾成萬円解約費， 等多三個禮拜可以慳成萬円喎！ 跟住佢就補咗句
まあ、いいか
你條友平時唔見你講日文， 一講就窒頭窒勢， 雖然以自己性格嚟睇的確有提早解約嘅可能.... いやいや， 等多三個禮拜啫， 等到嘅！... 應該...
之後 GCOE lecture， P4 同 P3 嘅 panel discussion， P4 嗰個基本上冇聽到， P3 嗰個基本上係巴斯光年嘅 one man show， 真係悶到飛起， 之後 QA 冇人問問題， 自己問咗一條問題， 一如所料巴斯光年又係遊花園， 中途已經忍唔住窒佢一句“我諗我問得唔清楚， 我係問你... ”， 不過其實講嚟講去都係大龍鳳喇。 成個 seminar room 入面邊度有人 care 個 panel discussion 講乜先得㗎。 証據就係一個 professor 都冇嚟到， 唔止今次， 次次都係咁。
2009/6/28 (日曜日)
基本上昏迷嘅一日。 由於冇糧草嘅關係點都要出去買嘢食， 不過自己真係貴人喇， 總之就係落雨， 冇計， 去咗食嘢先。 呢排一個人冇乜特別嘢想食時， 好多時都會去咗車站附近嗰間泰國嘢食， 始終自己有一半係泰國人嘅仔（いやいや、関係ない！）， 嗰間嘢又真係幾好食嘅。
之後行咗陣街， 去咗 Docomo shop 睇部 HT-03A， 本來想問啲 details 不過好似要等好耐咁所以都冇問到。 唔緊要， 再行多陣， 去咗買個羽毛球袋， 四千大洋左右， 唔算太貴。 不過冇貨要遲啲先有得攞。
返屋企休息， 悠悠閒閒咁又一日。
2009/6/27 (土曜日)
同窓会
朝早起身遲咗， 本來 B さん話今日多人嚟最好早啲去霸場， 結果都係同平時差唔多時間去到。 今日 B さん帶嚟嘅四個人， 基本上都係唔太識打， 不過其實唔緊要， 呢度一向都冇乜所謂㗎喇。 不過問題係其中一個中國人， 唔， 總之就係唔夾啦。 冇話題可言。
之後都係慣例去食嘢， 食完之後去咗渋谷同朋友 D くん買羽毛球袋， 睇吓睇吓自己都想買個， 其實之前都有諗過買， 今日咁啱有 30％ discount， 唔， 唔， 聽日前都仲可以諗...
之後夜晚一年一度嘅同窓会， 去舊年一樣拎住塊羽毛球拍去， 好鬼注目囉。 冇所謂喇， 唔通特登返去擺低咩？ 唔緊要喇， 見到好多以前嘅朋友， 亦都傾吓最近嘅嘢， 唔錯唔錯， 自己現役都係加埋出年， 之後唔知仲喺唔喺日本， 唔。 到時先算啦。
話時話， HT-03A 嘅 mock 終於都到咗， 唔， 九成九會換喇...
2009/6/26 (金曜日)
Last day@広東語サークル
朝早返學做 simulation 嘢， 算係幾順利啩？ 要盡量快手啲做哂啲嘢先得， 唔係七月嘅 deadline 真係幾難 meet。 不過題外話， 同研究室嘅 L 君， 竟然喺第一日買咗部 iPhone 3G S， 估佢唔到， 一兩個月之前先見佢買咗部 iPod shuffle， 跟住前兩個禮拜？ 就見到部 iPod touch， 點知今日就 iPhone， 有錢嘅人諗乜有時真係唔係好明。 我？ 有錢都唔會俾 Softbank 啦！ 等緊八月嚟換 Android...
之後都算係冇乜特別， 係咁寫 task 啲嘢， 同埋諗埋個 tutorial， 唔。 仲有時間都仲可以慢慢諗。
夜晚廣東話班， 去到就見到後任嘅 J さん， 之後冇幾耐就見到影の神様 K くん， anyway 決定呢個サークル命運嘅三個人都算嚟齊， 其它人未到可以私底下講吓啲閒話先， 都有一段時間冇見， 有啲幾意外嘅嘢發生咗。 唔， 呢度無謂講太多嘅嘢喇， 希望佢冇問題啦。
之後學生都陸續嚟到， 基本上 J さん都已經應承咗接手， 剩低嘅係教嘅內容， 講就講咗， 不過自己都覺得內容幾空泛囉。 唔， 都要俾佢適應喇。 講完之後， 叫做教埋最後一堂， 本來都冇諗住教， 不過都嚟齊就即管吹吓水囉， 掟個 topic 出嚟， 關於如果諗拍一套戲嘅話要點點點， 雖然唔係易講嘅一個 topic， 結果得其中兩個人叫有心機傾個話題， 上個禮拜（我覺得）出問題嘅兩個人好明顯態度有問題囉。 最初自己叭喺張枱度， 聽都唔聽。 discussion 嘅 topic 對佢嚟講應該唔係冇興趣（雖然難咗少少）， 不過有時真係有興趣都剩係用日文傾， 跟本唔係上堂...
唉， 唔鬼理咁多， anyway 都去咗食飯， 傾咗陣， 走人。 之後有機會都可以嚟玩吓， 不過... 睇吓點先啦。
2009/6/24 (水曜日)
戦利品：
ハヤテのごとく!! キャラクターCD 2nd series 01 三千院ナギ
ハヤテのごとく!! キャラクターCD 2nd series 02 桂ヒナギク
返學校繼續寫個 simulation， 下晝都算係順利咁寫咗自己嘅 idea 嘅最重要嘅部份出嚟， 之後寫多少少嘢 de 埋 bug 就可以交俾個 simulation 做喇。 今次 simulation 個 framework， 應該可以寫哂啲 parameter 跟住一次過 simulate， 唔駛咁多人手 intervention， 用咁多時間都係值得嘅。
話時話朝早同香港嘅朋友 P くん傾咗陣計， 發現佢去咗八達通做， 呀.... 以前做過咁多間公司， 係呢間最有問題喇。 人心險惡呢四個字都係喺嗰度學返嚟， P くん啱啱開始喺嗰度做， 本來都唔想嚇親佢， 不過有問題都扮冇問題一向都唔係自己嘅作風喇。
講開問題， 夜晚返去時同 Madu 傾好多呢啲嘢， 包括某啲 professor 嘅作風， 同埋永遠嘅話題 GCOE。 講吓講吓， 擦鞋講句， 自己嘅 professor 真係好好， 唔會計較一啲小事， research 嘅自由度又夠大（呢方面唔同人有唔同諗法喇）， 以前佢話過笹瀬先生嗰度問唔到乜嘢 details 嘢， 不過諗真啲， 去到呢個 level 唔係吓吓要人餵你食嘢㗎喇嘛。 其它 professor 有時真係會有好多嘢自己係唔會諗得到㗎囉。 詳細呢度唔講， 不過自己都覺得好似做得過咗少少火位囉.... 另外當然有提到 GCOE， 表面功夫真係做得幾一流， 但係實際上做到嘅嘢就真係有限公司囉。 尤其係當你喺其它地方讀過書嘅話某程度都會知道都唔定...
2009/6/23 (火曜日)
平平靜靜嘅一日。 下晝有研究室 meeting， 平時通常都會拎部電腦做自己嘢， 或者瞓覺， 不過今次又唔知點解咁好精神去插佢哋啲 presentation， 哈哈。 算啦。 B4 嘅 presentation 係咁上下㗎喇， 唔要求得太多。 插幾多就睇佢哋有幾有心機準備啦。 有啲真係一睇就發覺有問題囉。
之後返上 lab 靜靜寫 simulation， 寫咗大圍嘢， 之後 details 聽日再慢慢寫。
話時話 Madu 嫂好似有啲事要 Madu 陪佢去睇醫生， 希望佢冇乜嘢啦。
2009/6/22 (月曜日)
前幾日搞到成個人亂哂， 生理時鐘完全 randomize 咗囉， 好在都算可以喺朝頭早起返身， 不過起身時個人都係溫吓溫下咁...
點都要返學校， 當一個人忙嘅時候就唔知點解會覺得呢個世界嘅 information 真係多得濟。 尤其係 email 同一大堆 RSS feed （RSS feed 係自己問題）...
Anyway 做嘢， 做咗一陣又係 GCOE， 呢排佢哋都真係老馮去到六點半㗎喎。 一個 professional 嘅 talk 有幾可要成個鐘呀？ 仲要兩個連續一齊嚟， 真係冇嘢好講... 自己成日睇 TED 嘅 talk, 又易明, 又多嘢拎得走, 但係不過係十八分鐘之嘛. 好嘅 talk 跟本唔係睇個時間囉 (當然, lecture 係有啲唔同)
返到屋企, 広東語サークル方面有啲新消息。 方向會係點就要禮拜五傾先知喇。 自己要走就唔會變㗎喇。
呀， 話時話， KLL 嗰邊嘅研究費批咗， 又要諗點駛錢喇...
2009/6/21 (日曜日)
完全係前兩日嘅反動， 今日起身時已經係 4:00， 正確啲寫係 16:00... 瞓咗成十三個鐘先捨得起身...
決定咗唔教個廣東話班， 寫咗個有骨嘅 email，send 出去。 啃唔啃骨就睇你造化喇。 話時話有骨嘅嘢最近都好近都唔係成日講或者成日寫， 不過要寫嘅話可以好有攻擊性㗎。
跟住同其中幾個人傾呢個問題， 有人同意， 亦都有人唔知頭唔知路， 不過覺得自己寫嘅嘢難明。 有幾難明我就唔知， 不過諗返轉頭寫嘅嘢都係幾 pin point， 所以唔明嘅人就真係唔會明。
Anyway 既然大家都係大人， 要為自己嘅行為負責喇。 最對唔住嘅， 係當中幾個真係純粹想學廣東話嘅人。 喺呢方面， 唯有盡自己能力做一啲嘢啦！ 講到尾， 教廣東話本身幾好玩， 不過人際關係， 特別係大人間嘅人際關係自己就總之唔想理囉。
2009/6/20 (土曜日)
キャリアアップワークショップ
五點先叫做瞓得着， 跟住因為今日嘅キャリアアップワークショップ， 所以都要早啲起身去新宿嗰邊。
去到新宿， 諗起自己原來未食嘢， 於是去車站附近求其搵啲嘢食咗先算。 跟住行去工学院大学， 以前經過佢個門口好多次， 不過今次都係第一次入去。 去到二十樓嘅會場， 已經好多人， 登記咗之後去自己坐嗰張枱， 今次分咗幾個 group， 其中自己個 group 係「外資系企業で必要とされるスキル」， guest speaker 係 Google 裏面嘅一個 engineer， 女性嚟講比較少見。
Discussion 裏面都問咗好多問題， 幾好， Google 係自己想入嘅其中一間公司， 裏面嘅人講嘅嘢自然都會想聽啦。 Anyway 幾有趣嘅 discussion， 得益都算幾多。
之後嘅懇親会， 唔， 日本嘅傳統喇， 一定會有嘅嘢， 都唔錯， 同好多唔同嘅人傾計， 嗰度啲人學生最少都讀緊 master， 做緊嘢嘅有一堆 doctor 囉。 真係非同少可以場面。 可以傾到好多嘢， 幾好幾好。 懇親会之後二次会， 一間平時一定唔會去嘅舖頭， 個阿叔都幾得意。
之後返去時同埋兩個 GOLD 嘅 committee 一齊坐東横線， 其中一個比較多話題嘅好早落咗車， 自己就同另一個人一齊坐到去横浜， 真係全程冇乜嘢好講， 自己同嗰個人都唔係好多話題嗰種人...
話時話， 原來讀 doctor 嘅人裏面都有幾靚嘅人㗎喎！ 真係估唔到。
呀， 差啲唔記得， 生日快樂呀！
2009/6/19 (金曜日)
尋晚唔知點解唔係咁瞓得着， 瞓唔着都冇計， 打咗陣機， 跟住瞓得着時我諗都應該四點幾？ 遲瞓， 跟住遲起身都好正常啫， 況且都唔算遲好多， 都仲可以原諒啩？
返到學校開始 plan 個 program， 雖然唔駛大改不過 Java interface 有啲嘢要執喇。 不過其實過哂 design phase 先嚟改interface 其實唔係咁 preferable， 又或者話之前個 design 跟本就諗得唔周到？ 哈哈。 冇所謂啦。 自己嘅 one man project， 如果話係同其它人夾就話啫。
anyway 今日基本上都係一個人靜靜咁過， 最多都係去買咖啡同食飯時同收銀個阿姐講個句唔該咁大把。 起碼自己可以專心啲做嘢喇， 不過今日都係諗多過做， 始終之前諗咗嘅方法， 實際 implement 時就會有唔同嘅問題要考慮， anyway 應該都算係解決咗。 下個禮拜應該可以完成到啩？
跟住廣東話班。 有兩個香港朋友嚟咗（其中一個係第一次見）， 既然係咁就 吹吓水喇， 不過之前準備咗段 video， 就教咗佢先算。 之後傾計， 分 group， 之前冇諗到太多可以點樣分， 於是亂嚟， 係咁易。 結果... 同預期效果有啲唔同， 不過都算係過得去啩？
之後食飯時， 成日去嘅ジョナサン竟然冇位， 冇計， 又去咗下面嗰間中華料理， 其實都唔係唔 OK， 不過始終嗰間舖頭都係多人食煙， 之後再連場去間 coffee shop， 雖然坐嘅地方叫做非吸煙區， 不過實際上跟住阻唔到啲煙， 結果一如以往對眼好唔舒服囉。 同埋隔離坐咗一個神神化化嘅女人， 冇位之下都唔理得咁多...
另外個サークル好以出咗少少問題咁， 唔係教嘅嘢嘅問題（應該話教嘅嘢一路都有問題）， 而係人際關係上嘅問題， 本來呢啲嘢唔想理咁多， 但又要扮睇唔到嘅話有做唔到... 唔， 睇吓有冇地方可以做啲嘢啦。 不過講真， 都真係幾露骨... 本來自己都算係幾遲鈍嘅一個人， 不過就係連咁遲鈍嘅自己都睇得到個問題就真係幾大問題喇。 唔...
... 結果諗咗好耐， 打呢段字嘅時候已經差唔多五點。 結論... 就係以前都諗過嘅結論喇。
2009/6/18 (木曜日)
尋日休息充足，今朝可以準時起身， 照樣做咗啲雜務先， 跟住， 唔知點解好快就用哂啲時間... 尤其係朝早叮啲芋頭時， 唔知點解個微波爐唔停， 結果叮過龍， 冇哂水份， 唔食得...
返到學校， 都係做少少嘢， 之後就要開工。 叫做幾和平嘅一日喇。 最唔鍾意就係去到收工時有啲人硬係懶死唔走囉。 你做唔哂啲嘢你嘅事吖， 唔好阻住人收工先得㗎！
話時話呢期成日都幫襯大戸屋， 真係幾鍾意， 本來ペッパーランチ都好好， 不過感覺上大戸屋健康少少， 同埋食完唔會成陣燒肉味囉！
和平嘅一晚...
2009/6/17 (水曜日)
今日起唔到身， 下晝先返到學校嘅話就不如唔好返， 所以決定留喺屋企做嘢。
近來嘅 update 真係多到睇唔哂。 新聞啦， mixi update 啦， twitter 啦， facebook 啦。 有時真係唔睇得咁多， 不過今日蛇王， 就俾自己慢慢睇啦。
喺屋企做嘢， 其實有時都幾好， 唔駛執個人， 唔駛時間搭車， 有時都會幾 efficient， 不過始終環境唔同， 偷懶嘅機會又大... 有好有唔好啦。
anyway review 份論文， 唔， 用 word 我本身冇乜所謂， 不過通常幾俾心機都好啲 formatting 都會亂哂， 睇得鬼咁辛苦... 結果 review 嘅評價俾得幾低， 哈哈。 有 80％ acceptance, 應該死唔去啩？ 睇佢做化喇。
之後到自己個 program， 唔， 搵到條死蟲喇！ 搵咗我咁鬼耐， 原來就之後嗰幾行 code， 唔， 不過 programming 就係咁㗎喇...
2009/6/16 (火曜日)
朝早都係返學校同條臭蟲死過。 不過唔係太多時間， 因為下晝有 meeting， 同埋條臭蟲又唔係咁易出嚟， 結果朝早都係無功而還...
研究室 meeting， 出乎意料自己竟然冇瞓着, 仲要問到問題， 都真係覺得自己幾勁...
之後再搵條蟲， 雖然未正式搵到， 不過大概地點都 lock on 咗， 到時係咁噴殺蟲劑應該 OK 喇啩？
夜晚約咗 C ちゃん同佢兩個 friends 做 interview， 上次都做過一次㗎喇， 今次第二次， 去到駒場做。 頗為順利喇。 冇乜問題， 不過要錄音， 佢哋幾部機好似都有啲問題咁， 結果好耐冇用過嘅 PDA 錄音， 後來聽返又比起想像中唔錯喎。
Interview 完咗之後同 C ちゃん去食粥， 落雨落到狗屎咁， 食嘢， 本身呢度啲嘢食都 OK， 不過始終唔係禁煙， 所以都係坐唔耐， 算， 聽日仲要返學校， 費時去到咁夜喇。
2009/6/15 (月曜日)
下晝約咗朋友 A ちゃん食飯， 早早返學校又唔係， 不如留喺屋企做嘢， 話時話上個禮拜有隻死 bug 未清， 尋日沖涼嗰時突然諗到個問題所在， 於是就喺屋企同隻 bug 死過， 寫寫寫， 唔， 好似真係清咗隻蟲喎？ 不過都要俾多啲時間 check 清楚， 點都好， 搞掂呢個麻煩嘢都好。
之後去秋葉原會合 A ちゃん， 早咗少少去到， 行一陣， 冇乜特別嘢， 好耐冇嚟過仲諗住有嘢想買啦， 不過又真係搵唔到。 話時話自己幾耐冇嚟過呢？ 真係唔係幾記， 呢度好似都變咗唔少咁。 anyway join 咗 A ちゃん之後搵地方食飯， 去咗一間普通嘅和食， 不過條燒魚好好食囉（A ちゃん嘅海鮮丼都好似好唔錯）， anyway 主要目的都係吹水為主喇。 講到結婚嘅問題， 真係唔知講乜嘢好囉。
之後再行咗陣， 都係冇嘢好買， 算數， 慢慢行其實應該搵到都唔定， 不過始終都要返學校， 冇計， GCOE 嘛... 點都要做嘢嘅。 今次連續兩個叫做 panel discussions 嘅 presentations， 冇太大心機聽， 但係中途唔知點解突然俾人叫自己個名囉？ 當堂唔知發生乜嘢事...
2009/6/14 (日曜日)
大昏迷。 完全處於死亡狀態。 朝早都算係起過身食過嘢， 不過都係唔知自己發生乜嘢事， 再瞓過。 之後天黑先叫做回復正常活動... 如果唔係有份 paper 要 review 真係又死過都唔出奇。
2009/6/13 (土曜日)
羽毛球日。 今日都唔知有幾多人嚟， 不過照去啦。 結果係五大個麻甩佬。 唔， 其實都冇乜所謂， 以打波嘅角度嚟講其實仲好， 五個人嘅實力雖然講唔上差唔多（其中兩個人比較勁喇）， 不過都算係 balance 得到， anyway 都係嗰個問題：人數一少就好快攰囉！ 打多幾吓就已經肌肉酸痛， 哈哈， 持久力始終都唔夠喇。
之後去 cafe 吹水， 唔， 冇乜話題.... 悶鬥悶...
返到屋企睇書睇 web， 咁又一日。
2009/6/12 (金曜日)
改完個 algorithm， 諗住問題不大， 誰知另一隻臭蟲又走咗出嚟， 果然大執嘅時候會有唔少問題走出嚟， 都唔係冇諗到， 不過真係冇諗到嚟得咁密啫。
解決唔到住都冇辦法， 其它仲有幾十個 tasks 等住自己去做， 處理咗其它問題先。 不過其它問題又有啲另外嘅麻煩嘢阻頭阻勢， 都唔明喺咁嘅情況之下自己之前點解可以咁悠閒㗎囉。
Anyway 夜晚廣東話班， 兩分鐘多啲嘅內容， 唔知點解講咗兩個鐘都剩係講到一半， 係唔係真係太難呢？ 不過正常人講嘢就係呢個 speed 呢個語氣㗎喇， 所以偶然俾啲認真少少嘅內容刺激一吓都唔錯？（自我欺騙？）
話時話， 生日快樂！
2009/6/11 (木曜日)
戦利品：
ハヤテのごとく！キャラクターＣＤ１２
朝早， 同尋日個 pattern 好鬼似， 起身， 食早餐， 飲咗杯咖啡， 聽埋尋晚嘅收音機， 全部做齊， 不過之後都係走咗上張床到...
之後食完飯之後， ITC part time ， 大致都係和平嘅一日， 唔知點解今日見到好多識嘅人出現囉... 平時都冇㗎？
之後， 和平嘅一日...
2009/6/10 (水曜日)
戦利品：
本日、満開ワタシ色！
早早起身， 食個飽， 聽吓尋日收音機光明頂嘅 archive， 順便等杯咖啡冇咁熱諗住可以飲， 誰知， 坐坐吓， 瞓着咗... 有床唔瞓， 坐喺度瞓着， 我都得㗎喇。 一起身杯咖啡都凍哂...
返學校寫 program， 日日如是， 不過都叫做執返靚啲 code， 之前真係嚇死人喇條蟲， 寫寫寫， 可能食唔夠甜嘢， 總覺得好眼瞓...
之後早少少走， 處理啲雜務， 跟住去買 CD， 平時去開ゲーマーズ買， 點知去到已經賣哂， 冇計之下走咗去アニメート， 冇乜所謂喇， 今日點都要過東口嗰邊， 不過話時話， 東口條路啲二手煙好鬼勁， 隨時勁過西口囉。 踩住單車理論上唔會咁覺， 但係發現事與願違囉。 冇計， 唯有再踩發兩步。
買完 CD， 再去赤レンガ嗰邊買份禮物， 之前望一望都覺得唔錯嘅一樣嘢， 希望佢滿意啦。
2009/6/9 (火曜日)
返學校同個 program 死戰。 搵咗隻臭蟲搵咗好耐都搵唔到， 好明顯出咗好大問題， 點解之前可以一直都唔覺㗎呢？ 好在今日都終於搵到個問題所在喇！ 嘩， 真係好大條， 之前一直都見唔到， 搵到之後都真係打咗一大個冷震...
中間要研究室 meeting， 冇乜心機聽， 反而之後笹瀬先生閒聊傾吓研究室嘅情況， 其中提到關於 PhD 學生嘅問題， 唔， 過多兩年又少幾個， 唔知到時會點。 而自己又可以做啲乜嘢幫到手呢？
夜晚 Google 嘅 Vice President (Product management) Mr Bradley Horowitz 嚟到學校演講， Seamless Web， 真係完全唔同 level， live 嘅 presentation 嚟講呢個算係一個最有興趣㗎喇！ 全場逼爆人， 真係 Google 個名冇得彈， 理論上英文嘅 talk 應該冇乜人先係， 不過真係完全出乎意料囉。 個 presentation 同埋 QA 完咗之後， 走咗出去同佢傾咗幾句， 好 nice， 今日個幾鐘真係獲益良多！
另外， 今個禮拜水樹奈々嘅 album オリコン第一位！ 恭喜恭喜！ 買咗隻 CD 之後我都不斷咁 loop 嚟聽...
2009/6/8 (月曜日)
朝頭早又試唔知點解喺屋企用咗好多無謂時間先出到門口， 呢啲咁嘅生活節奏遲早都會累死自己...
好在返到學校都算係可以集中到精神做嘢， 之前嗰啲 maintenance 嘢都算係做哂， 繼續執好啲 code 佢。 認真睇落去， 都真係又唔知幾多嘢要改囉。
又要 GCOE lecture， 上個禮拜自己有份做 panel discussion， 跟住個 guest speaker 都算係講得幾好， 不過今日就好大對比， panel discussion 基本上係啲 RA 將自己嘅 research 格梗話可以 apply 去 medical application， 係唔係㗎？ 不過唔理得定唔得， 搵嚟吹吓都不失為一個好 topic 嘅。
之後某公司（無謂開名喇）嘅一個所謂 cheif researcher， 講個 topic... 唔記得咗， 基本上係用嚟量度心脈嘅一個 application， 完全唔掂囉。 真係唔知佢講乜， 先後有朋友話“罰ゲーム？”“日本の研究は腐っているね”等等， 真係冇嘢好講， 最慘係今日自己唔知撞乜鬼， 鬼打咁精神， 瞓唔着， 於是拎咗 Madu 部 iPod touch 玩 bejeweled... 呢條友， 仲要超時半個鐘， 將啲 slide 翻炒翻炒再翻炒， 炒飯都係翻炒一次之嘛！
2009/6/7 (日曜日)
約咗 K さん去 Y150 行吓， 主要都係去散吓步喇。 之前踩單車過去， 好鬼多人， 行都行唔到， 今次相對少啲人， 而且天氣出奇地好， 散步真係一流。
搭車去到馬車道， 行到去會場， K さん見到隻蜘蛛咁大隻， 決定都係唔入去， 結果都係喺外面行， 一路行， 一路去到大残橋， 再行到去山下公園， 突然間見到香港經濟發展局， 唔？？ 跟住再睇清楚， 發現有人喺度爬龍舟！ 真係估唔到會喺今日囉。 一見到龍舟就想食粽囉。 反正近近哋， 走去中華街搵粽食。
食完， 再行返去赤レンガ嗰邊， 睇吓有冇乜嘢紀念品賣， 不過好多人， 又唔係好多時間慢慢揀， 唔， 下次先算， 平日行過嚟睇好過。
之後再係咁行吓， 想買嘢但係又搵唔到， 冇所謂喇， 返屋企休息好過。 話時話， 每次見到超級市場有特價魚生時都會覺得好開心囉。
2009/6/6 (土曜日)
今日叫咗一個 friend 去打波， 唔知點解好早起身， 呢啲情況通常都會即刻再瞓過， 不過， 唔知點解， 瞓唔着（！！）， 唔緊要， 返正有好多嘢未做完， 處理埋啲雜務佢都好。
去到體育館， 唔知點解好多人囉。 唔單止多一班唔識嘅人打排球， 連自己呢 group 都突然好多人， 有今次我帶嚟嘅 friend， 有 B さん帶嚟嘅 friend， 亦都有 D くん嘅 friend。 結果加加埋埋有成十個人。 都好， 又可以吹水又可以打波， 不過今日先發現俾 C ちゃん呃咗囉， 話自己係澳門代表喎！ 吹水吹得佢咁大， 不過都冇乜所謂嘅。
之後吹水， 唔知點解 C くん突然講起幾個幾 serious 嘅問題， 由電腦嘅基本嘢去到日本嘅教育， 唔？ 發生乜事？ 不過另外 B さん同佢台灣朋友一路用普通話傾計， 完全唔明佢哋講乜...
之後又係食嘢， 去咗渋谷嘅一間泰國餐廳， 幾好食， 不過， 好大問題， 就係隔離班女人係咁煲煙... 唔， 泰國禁煙禁得咁好， 喺日本嘅泰國餐廳都應該學吓嘢至係㗎？？
夜晚返到屋企， 煲電話粥。 好耐冇同 P ちゃん傾過計喇。 見佢一年到尾都咁鬼忙， 好多次想打電話俾佢， 但係最後都冇打。 今次一傾就傾咗幾個鐘.... 都真係覺得自己幾誇張....
2009/6/5 (金曜日)
好難得尋晚已經準備好今日廣東話嘅嘢。 今日返到學校可以專心做返啲 research 嘢。 唔。 繼續返個 program， 有個好大嘅問題自己一直都冇發覺... 講真啲 code 好耐都冇 review 過喇， compile 到就冇理到咁多。
夜晚廣東話班， 平時剩得四五個人嘅班， 今日突然好熱鬧... 呢排房都冇 book 剩係去交流コーナー， 搞到有啲唔夠位咁添。 不過今日真係好多謝突然嚟玩嘅 S くん， 仲有今次開始參加嘅 Mさん同埋Iさん...
另外加埋好耐冇見嘅 I くん同埋 H ちゃん， 食飯嗰時竟然有成十個人， 成晚就係咁吹水喇。 講嘅話題好多時都係香港嘅嘢， 不過都會講其它嘢嘅， 今日 Mさん同埋Iさん叫做第二次一齊食飯， 好在都算係可以傾到計（啩？）， 算係 OK 啦。
話時話前嗰排有諗過停教呢個廣東話班， 如果照而家情況嘅話都可以繼續一段時間喇。
2009/6/4 (木曜日)
朝早起身時等 Amazon 送書嚟， 十點左右到， 跟住出門口， 距離返工嘅時間有啲唔湯唔水， 同埋都係時候去捐血， 所以就去咗西口個捐血站喇。
同平時一樣都係成份捐血， 之前兩個禮拜有少少傷風所以都冇捐， 今日先至嚟得到喇。 今次部機好似係新機， 以往啲機都係一鬆一緊咁抽血同埋輸血， 今次呢部好似有啲唔同喎。 詳細我都冇理咁多， 都係咁捐。
不過出事喇。 捐咁多次血第一次出事。
中途有少少虚脱嘅跡象， 最初都仲覺得係錯覺冇理咁多， 跟住越嚟越唔到路， 有少少想嘔嘅感覺， 唔... 都係唔掂， 同個護士講叫停， 跟住喺張床到瞓咗半個鐘（成個人傾斜， 對腳向上個頭向下）... 原因好似係因為血壓急降。 瞓咗半個鐘之後其實都冇乜嘢喇。 死唔去。 血壓都回復正常...
Anyway 之後返學校， 因為意外用多咗時間所以晏都冇食， 剩係咗兩條 Soyjoy， 死人都似。 好在 ITC 嘅工作都幾清閒， 慢慢休息吓。 反正今日都不宜操勞...
放工之後去定食屋食嘢， 食完之後經過 supermarket， 見到啲お寿司又忍唔住手買咗嚟食， 反正今日下晝都冇食， 唔緊要啩？ 結果食咗好多嘢...
夜晚試燒 DVD video， 咦？ 比起想像中簡單喎？ 不過今次燒嘅又真係比較簡單喇。 所以都冇乜特別。
2009/6/3 (水曜日)
戦利品
水樹奈々 Ultimate Diamond
寧靜嘅一日。 本來買咗本書， 想等埋先返學校， 不過横掂都唔係咁急， 遲啲先算都得（結果本書就十二點送過嚟冇人收）
返到學校， 終於都叫搞掂咗個 driver 喇。 個 solution 竟然係 delete 鬼咗個 xorg.conf 就搞掂。 完全兩個世界囉。 dual screen 轉嚟轉去都唔會 hang， 完全變返一個 stable 嘅狀態！ 好好！
隻新 CD 本來想遲少少先買， 不過嚟緊兩晚都有嘢做， 唔等得咁多， 好！ 早啲買咗佢先！ 跟住聽， 一如以往奈々さん嘅唱功都真係好得， 不過其中一首歌， 望望歌詞， 咦？ 唔介嘅？ 不過冇所謂啦！
2009/6/2 (火曜日)
真係幾大鑊， 今日成日都同個 xorg 死戰， 之前用 ATI card 冇乜大問題， 不過見 open source 嘅 Radeonhd 好似算係 workable， 直頭轉 driver （鬼叫 ATI update 得鬼咁慢）。 function 上冇太大問題， 不過就係唔穩定，玩一陣就 hang 機， 真係唔明....
下晝研究室 meeting， 完全冇聽到入腦。 一來太眼瞓， 二來班人都係對住張紙嚟讀， 真係有興趣嘅話遲啲慢慢睇都唔遲。 結果都係做自己嘢。
呀， 成日就係做埋啲奇怪嘢。 呢啲嘢其實應該留返放假先做， 不過學校部機拎返屋企做又奇奇怪怪咁...
2009/6/1 (月曜日)
諗吓今日做過啲乜呢... 成日都係咁。 朝早遲咗少少起身， 返到學校時間又唔湯唔水咁， 睇咗少少 paper 嘢， 之後基本上都係等 meeting， 冇計， 自己約咗個 group 啲人 prepare 個 GCOE 嘅 panel discussion， 都算係順利啩？
之後正式 discussion， 有啲擺上神枱嘅感覺， 都唔知發生乜嘢事， 成班 RA 都算， 不過之後山中先生走咗入嚟， 都算， 連笹瀬先生都嚟埋... 有乜咁好睇呢？ 唔... 不過正式 panel discussion， 感覺上好多人問自己問題囉， 唔知點解... 話時話四個 projects 八個 groups， 自己呢 group 第一 group 去做白老鼠， 算係咁啦。 如無意外應該係最多留學生嘅一 group 囉。
之後 JEITA 嘅 invited lecture， 其實好想瞓， 不過可能個 panel discussion 太突出， 總覺得個 guest speaker 成日都望住我咁嘅....
話時話之前有人問乜嘢係 GCOE， 即管解釋吓。 簡單嚟講... 就係麻煩嘢啦。 正式係文部科学省嘅 "Global Center of Excellence"， 一個發展某啲大學成為 global 據點嘅計劃。 不過係咁做咁多無謂嘢可以發展得幾好， 我都真係覺得好有疑問囉。 我哋呢啲 RA （Research Assistants）， 叫就叫得好好聽， 不過雜務多囉... 食得鹹魚抵得渴喇...